ભારતીય ટેસ્ટ ટીમમાં વાપસીની રાહ જોઈ રહેલા મુંબઈના બેટર સરફરાઝ ખાને પોતાની પસંદગીને લઈને સવાલો ઉઠાવ્યા છે. ડોમેસ્ટિક ક્રિકેટમાં સતત રન બનાવવા, ફિટનેસ પર મહેનત કરવા અને પોતાનું વજન 22 કિલો ઘટાડવા છતાં ટીમ ઇન્ડિયામાં નિયમિત તક ન મળતાં તેની નિરાશા સામે આવી છે. સરફરાઝે સવાલ કર્યો કે જ્યારે આટલી મહેનત પછી પણ તક મળતી નથી, તો પછી વધુ મહેનત શા માટે કરવી? સોમવારે મુંબઈ અને રેલવે વચ્ચેની રણજી ટ્રોફી મેચના પ્રથમ દિવસે રમત પૂરી થયા બાદ સરફરાઝે પત્રકારો સાથે વાતચીત કરી હતી. તેણે કહ્યું કે દરરોજ સવારે 5 વાગ્યે ઊઠીને મેદાન પર જવાનો તેનો નિત્યક્રમ છે. તે મુંબઈ માટે રણજી ટ્રોફીમાં રન બનાવી રહ્યો છે, પરંતુ ભારતીય ટીમમાં વાપસી ક્યારે થશે તેની તેને ખબર નથી.
'દરરોજ સવારે એક જ સવાલ થાય છે'
સરફરાઝે પોતાની નિરાશા વ્યક્ત કરતાં કહ્યું કે ઘણી વખત સવારે ઊઠીને મનમાં એક જ સવાલ આવે છે કે હવે વધુ મહેનત શા માટે કરવી? તેણે ઉમેર્યું કે સામાન્ય દિનચર્યા સાથે પણ તે મુંબઈ માટે રણજી ટ્રોફીમાં 30, 50 અને 100 રન બનાવી શકે છે. જોકે, જ્યારે તે પોતાના પિતાને સતત મહેનત કરતા જુએ છે ત્યારે ફરી મેદાનમાં ઉતરીને તેમના માટે રન બનાવવાની પ્રેરણા મળે છે. સરફરાઝે પોતાના પિતા નૌશાદ ખાનને પોતાની સૌથી મોટી તાકાત ગણાવ્યા હતા. તેના કહેવા પ્રમાણે, મુશ્કેલ સમયમાં પિતા જ તેની સાથે ઊભા રહ્યા છે.
દક્ષિણ આફ્રિકા અને ઇંગ્લેન્ડમાં સદી ફટકાર્યાનો આપ્યો દાખલો
સરફરાઝે ભારતીય ટીમમાં પોતાની પસંદગી અંગે એક મહત્વનો મુદ્દો ઉઠાવ્યો હતો. તેના મતે, ટીમ મેનેજમેન્ટ તેને મુખ્યત્વે ભારતની ઘરઆંગણાની પરિસ્થિતિઓમાં રમવા યોગ્ય ખેલાડી તરીકે જુએ છે. જોકે, વિદેશી ધરતી પર પણ તેણે રન બનાવ્યા હોવાનું સરફરાઝે જણાવ્યું હતું. તેણે કહ્યું કે દક્ષિણ આફ્રિકામાં ભારતની સિનિયર ટીમ સામે ભારત-A તરફથી રમતી વખતે તેણે 63 બોલમાં સદી ફટકારી હતી. ત્યારબાદ ઇંગ્લેન્ડમાં પણ ભારત-A તરફથી રમતી વખતે 76 બોલમાં 101 રન બનાવ્યા હતા. આ પ્રદર્શન છતાં તેને બંને વિદેશી પ્રવાસ માટે સિનિયર ટીમમાં સ્થાન મળ્યું નહોતું. સરફરાઝે સ્પષ્ટ કર્યું કે પસંદગીકારોએ તેને ક્યારેય સીધું એવું કહ્યું નથી કે તે માત્ર ભારતીય પરિસ્થિતિઓમાં જ રમવા યોગ્ય છે. પરંતુ ટીમ સાથે રહ્યા ત્યારે તેને આવું સાંભળવા મળ્યું હતું. તેણે કહ્યું કે પસંદગીકારોનો પોતાનો દૃષ્ટિકોણ હોઈ શકે છે, પરંતુ તેનું કામ ક્રિકેટ રમવાનું છે.
શ્રીલંકા પ્રવાસમાં ટીમમાં પસંદગી થઈ, પણ રમવાની તક ન મળી
સરફરાઝને તાજેતરમાં સાઈ સુદર્શન ઈજાગ્રસ્ત થતાં શ્રીલંકા પ્રવાસ માટે ભારતીય ટેસ્ટ ટીમમાં સામેલ કરવામાં આવ્યો હતો. જોકે, તેને પ્લેઇંગ ઇલેવનમાં સ્થાન મળ્યું નહોતું. ત્યારબાદ તે મુંબઈ પરત ફર્યો અને ડોમેસ્ટિક ક્રિકેટ રમવા લાગ્યો. તેણે કહ્યું કે શ્રીલંકા પ્રવાસ માટે બોલાવવામાં આવશે તેની તેને અગાઉથી જાણ નહોતી. તે નેશનલ ક્રિકેટ એકેડમીમાં હતો ત્યારે તેને ટીમમાં જોડાવા માટે ફોન આવ્યો હતો. જોકે, ત્યાં રમવાની તક ન મળતાં તે પાછો આવીને મુંબઈ માટે રમવા લાગ્યો. સરફરાઝે કહ્યું કે ભારતીય ટીમ તરફથી બોલાવવામાં આવશે તો તે રમવા જશે અને તક નહીં મળે તો મુંબઈ માટે ક્રિકેટ રમવાનું ચાલુ રાખશે.
ફિટનેસ માટે ઘટાડ્યું 22 કિલો વજન
સરફરાઝે પોતાની ફિટનેસ પર પણ ઘણી મહેનત કરી છે. તેણે જણાવ્યું કે અગાઉ તેનું વજન લગભગ 97 કિલો હતું અને હવે તે 75 કિલોની આસપાસ છે. એટલે કે તેણે કુલ 22 કિલો વજન ઘટાડ્યું છે. તેના કહેવા પ્રમાણે, કોઈએ તેને વજન ઘટાડવા માટે સીધું કહ્યું નહોતું. પરંતુ સોશિયલ મીડિયા અને આસપાસના લોકોની વાતો સાંભળ્યા બાદ તેણે પોતાની ફિટનેસ પર કામ કરવાનું નક્કી કર્યું હતું.
છેલ્લી ટેસ્ટ સિરીઝમાં નિષ્ફળતા પણ બની ચર્ચાનો વિષય
સરફરાઝે ભારત માટે અત્યાર સુધી 6 ટેસ્ટ મેચ રમી છે. તેની છેલ્લી ટેસ્ટ મેચ નવેમ્બર 2024માં ન્યૂઝીલેન્ડ સામે મુંબઈના વાનખેડે સ્ટેડિયમમાં હતી. ન્યૂઝીલેન્ડ સામેની પુણે અને મુંબઈ ટેસ્ટમાં તેની છેલ્લી 4 ઇનિંગ્સમાં 11, 9, 0 અને 1 રન આવ્યા હતા. આ પ્રદર્શન બાદ તેને ટીમમાંથી બહાર કરવામાં આવ્યો હતો. સરફરાઝે તે સમયની મુશ્કેલી વિશે વાત કરતાં કહ્યું કે વિદેશ પ્રવાસ પછી અચાનક ભારતમાં અત્યંત ટર્ન લેતી પીચો પર રમવું સરળ નહોતું. ડોમેસ્ટિક ક્રિકેટમાં મહેનત કરીને ટીમમાં સ્થાન મેળવ્યા બાદ આવી મુશ્કેલ પીચો પર તરત જ સારું પ્રદર્શન કરવું પડકારજનક બની શકે છે.
આ પણ વાંચો: IND VS NS ODI: મોટો ખતરો કે નવી રણનીતિ? ભારતીય પેસ એટેકનો આ નવો પ્રયોગ ટીમ પર ભારે પડશે કે ઇતિહાસ રચશે?
