વર્લ્ડ ટેસ્ટ ચેમ્પિયનશિપ એટલે કે WTCની ફાઇનલમાં પહોંચવાની લડાઈ હવે વધુ રસપ્રદ બની ગઈ છે.દક્ષિણ આફ્રિકાએ ઓસ્ટ્રેલિયાને બીજા ટેસ્ટમાં ઇનિંગ્સ અને 31 રનથી હરાવીને પોઈન્ટ ટેબલમાં પોતાની સ્થિતિ મજબૂત કરી છે.આ પરિણામથી ઓસ્ટ્રેલિયા,ન્યૂઝીલેન્ડ અને દક્ષિણ આફ્રિકા વચ્ચે ફાઇનલમાં સ્થાન મેળવવાની સ્પર્ધા વધુ રોમાંચક બની છે.બીજી તરફ ભારતીય ટીમ માટે ફાઇનલ સુધી પહોંચવાનો રસ્તો મુશ્કેલ બનતો દેખાઈ રહ્યો છે.
દક્ષિણ આફ્રિકાએ ઓસ્ટ્રેલિયાને કારમી હાર આપી
ગેબેરહાના સેન્ટ જ્યોર્જ પાર્ક સ્ટેડિયમમાં રમાયેલી બીજી ટેસ્ટના અંતિમ દિવસે દક્ષિણ આફ્રિકાના બોલરોએ શાનદાર પ્રદર્શન કર્યું હતું.ઓસ્ટ્રેલિયાની બીજી ઇનિંગ્સ માત્ર 295 રનમાં સમેટાઈ ગઈ હતી. પરિણામે દક્ષિણ આફ્રિકાએ આ મુકાબલો ઇનિંગ્સ અને 31 રનથી જીતી લીધો હતો.આ જીતથી દક્ષિણ આફ્રિકાને શ્રેણીમાં મોટો ફાયદો થયો છે.સાથે જ વર્લ્ડ ટેસ્ટ ચેમ્પિયનશિપના પોઈન્ટ ટેબલમાં તેની સ્થિતિ પણ સુધરી છે.પ્રથમ ટેસ્ટમાં હાર્યા બાદ દક્ષિણ આફ્રિકા પર દબાણ હતું, પરંતુ બીજી ટેસ્ટની જીતે ફાઇનલની રેસમાં તેનો દાવો મજબૂત કર્યો છે.
WTC પોઈન્ટ ટેબલમાં કઈ ટીમ ક્યાં?
હાલના આંકડા પ્રમાણે ઓસ્ટ્રેલિયા 75 ટકા પોઈન્ટ સાથે પ્રથમ સ્થાને છે. ન્યૂઝીલેન્ડ 72.22 ટકા સાથે બીજા અને દક્ષિણ આફ્રિકા 66.67 ટકા સાથે ત્રીજા સ્થાને છે. બાંગ્લાદેશ 55.56 ટકા સાથે ચોથા ક્રમે છે, જ્યારે ભારત 51.52 ટકા સાથે પાંચમા સ્થાને છે.આ આંકડા દર્શાવે છે કે ફાઇનલની રેસમાં ભારતે પોતાની સ્થિતિ સુધારવા માટે આગામી ટેસ્ટ શ્રેણીઓમાં શાનદાર પ્રદર્શન કરવું પડશે. બીજી તરફ ટોચની ત્રણ ટીમો પાસે ફાઇનલમાં પહોંચવાની સારી તક છે,પરંતુ બાકીની મેચોનાં પરિણામો અંતિમ ચિત્ર બદલી શકે છે.
https://x.com/Maina_Singhx77/status/2113307750008770750?s=20
ભારત માટે હવે દરેક ટેસ્ટ મહત્ત્વની
ભારતીય ટીમ માટે ન્યૂઝીલેન્ડ સામેની આગામી બે ટેસ્ટની શ્રેણી અત્યંત મહત્ત્વપૂર્ણ બની શકે છે.આ બંને મેચ WTCનો ભાગ હોવાથી ભારતે શક્ય તેટલી વધુ જીત મેળવવી પડશે.ન્યૂઝીલેન્ડ સામેની શ્રેણી બાદ ભારતે આગામી વર્ષે ઓસ્ટ્રેલિયાની યજમાની કરવાની છે.જો ભારત પોતાની બાકીની તમામ 7 ટેસ્ટ મેચ જીતી લે, તો પણ તેના પોઈન્ટની ટકાવારી 70.37 ટકા સુધી પહોંચી શકે છે.એટલે કે ભારત માટે માત્ર જીત મેળવવી જ નહીં, પરંતુ અન્ય ટીમોનાં પરિણામો પર પણ નજર રાખવી જરૂરી બનશે.
ઓસ્ટ્રેલિયા,ન્યૂઝીલેન્ડ અને દક્ષિણ આફ્રિકાનું સમીકરણ
દક્ષિણ આફ્રિકાના પ્રવાસ બાદ ઓસ્ટ્રેલિયાએ ઘરઆંગણે ન્યૂઝીલેન્ડ સામે રમવાનું છે.ત્યારબાદ ભારતીય ટીમ ઓસ્ટ્રેલિયાના પ્રવાસે જશે.ઓસ્ટ્રેલિયા પોતાની બાકીની 7 મેચ જીતી લે તો પણ તેની પોઈન્ટ ટકાવારી 68.18 ટકા રહેવાનો અંદાજ છે.ન્યૂઝીલેન્ડ પાસે હજુ 10 ટેસ્ટ મેચ બાકી છે. જો તે આમાંથી 3 મેચ હારી જાય, તો પણ તેની પોઈન્ટ ટકાવારી 70.83 ટકા સુધી પહોંચી શકે છે.ન્યૂઝીલેન્ડે ભારત ઉપરાંત ઓસ્ટ્રેલિયા,શ્રીલંકા અને પાકિસ્તાન સામે પણ રમવાનું છે.દક્ષિણ આફ્રિકાએ પણ હજુ 8 ટેસ્ટ મેચ રમવાની છે.જો તે આમાંથી 6 મેચ જીતી લે,તો તેની પોઈન્ટ ટકાવારી 71.43 ટકા સુધી પહોંચી શકે છે. દક્ષિણ આફ્રિકાએ ઘરઆંગણે બાંગ્લાદેશ અને ઇંગ્લેન્ડની યજમાની કરવાની છે.ત્યારબાદ તે શ્રીલંકાના પ્રવાસે જશે.
શું ભારત WTC ફાઇનલમાં પહોંચી શકશે?
ભારત માટે ફાઇનલમાં સ્થાન મેળવવું અશક્ય નથી, પરંતુ હવે રસ્તો વધુ પડકારજનક બની ગયો છે. ટીમ ઇન્ડિયાએ પોતાની બાકીની મેચોમાં સતત જીત મેળવવાની સાથે ઓસ્ટ્રેલિયા, ન્યૂઝીલેન્ડ અને દક્ષિણ આફ્રિકાના પરિણામો પણ ધ્યાનમાં રાખવા પડશે.જો આ ત્રણમાંથી કોઈ ટીમ બાકીની મેચોમાં અપેક્ષા કરતાં નબળું પ્રદર્શન કરે, તો ભારત માટે ફાઇનલનો માર્ગ ખુલ્લો થઈ શકે છે. હવે ભારતીય ટીમ માટે દરેક ટેસ્ટ નિર્ણાયક બની શકે છે અને એક પણ બિનજરૂરી હાર ફાઇનલમાં પહોંચવાની આશાને મોટો ફટકો આપી શકે છે.
આ પણ વાંચો- Daren Sammy tweet : ‘હવે કોઈ સ્કોર સુરક્ષિત નથી!’ ડેરેન સેમીના પોસ્ટથી ક્રિકેટ જગતમાં બવાલ
