[[$googlead]]
કટિંગ સમયે જ ત્રાટકી SMC ની ટીમ
ઘટનાની મળતી માહિતી અનુસાર, ભૂજના ધાણેટી પાસે જ્યારે વિદેશી દારૂના મોટા જથ્થાનું કટિંગ ચાલી રહ્યું હતું, બરાબર તે જ સમયે ગાંધીનગરથી આવેલી સ્ટેટ મોનિટરિંગ સેલની ટીમે આકસ્મિક રેડ કરવામાં આવી હતી. પોલીસની ગાડીઓ જોઈને બુટલેગરોમાં નાસભાગ મચી ગઈ હતી, પરંતુ પોલીસે કોર્ડન કરીને દારૂનો જંગી જથ્થો અને વાહનો કબ્જે કર્યા હતા.
કરોડોનો મુદ્દામાલ અને તપાસનો ધમધમાટ
આ રેડમાં દારૂની હજારો બોટલો સાથે ટ્રક અને અન્ય વાહનો સહિત કરોડોનો મુદ્દામાલ જપ્ત કરવામાં આવ્યો છે. હાલમાં SMC દ્વારા દારૂની બોટલોની ગણતરી અને પકડાયેલા વાહનોની તપાસ ચાલી રહી છે. સ્થાનિક પોલીસની જાણ બહાર થયેલી આ સીધી કાર્યવાહીએ જિલ્લા પોલીસની કામગીરી પર પણ સવાલો ઉભા કર્યા છે. આ કેસમાં સંડોવાયેલા મોટા માથાઓની ધરપકડ કરવા માટે ચક્રો ગતિમાન કરવામાં આવ્યા છે.
5 કરોડ 9 લાખથી વધુનો મુદ્દામાલ જપ્ત કરાયો
પશ્ચિમ કચ્છ જિલ્લાના પધ્ધર પોલીસ સ્ટેશન હદમાં આવેલા વડવાળા ગામના સર્વે નંબર 39 ખાતે SMC ટીમ દ્વારા પ્રોહિબિશનની રેડ કરવામાં આવી હતી. આ કાર્યવાહી દરમિયાન પોલીસએ 56 હજારથી વધુ દારૂની બોટલો જપ્ત કરી છે, જેની કિંમત અંદાજે 4 કરોડથી વધુ છે. પોલીસે સ્થળ પરથી 2 ટ્રક, 3 ટાટા મીની ટ્રક અને 1 મહિન્દ્રા પીકઅપ સહિત કુલ 6 વાહનો, 2 મોબાઇલ ફોન અને અન્ય સામાન કબ્જે કર્યો છે. સમગ્ર મુદ્દામાલની કુલ કિંમત 5 કરોડ 9 લાખથી વધુ થવા જાય છે.
લિસ્ટેડ બુટલેગરનું નામ ખુલ્યું
આ કેસમાં જસરામ જગા ભરવાડ અને વિશાલ બીરેન કરમાકમ નામના બે આરોપીઓને ઝડપી પોલીસને સોંપવામાં આવ્યા છે. જ્યારે 23 આરોપી વોન્ટેડ છે, જેને પકડવા પોલીસે તપાસ હાથ ધરી છે. પ્રોહિબિશનના કેસમાં નવઘણ રાજગોર, અનોપ સિંહ રાઠોડ અને દેવેન્દ્ર કાપડી નામના લિસ્ટેડ બુટલેગરનું નામ ખુલ્યું છે. જેને લઈને પોલીસે વધુ તપાસ હાથ ધરી છે.
