ઉત્તર પ્રદેશના બાગપતમાં થયેલા ચર્ચિત ડબલ મર્ડર કેસમાં પોલીસે મુખ્ય આરોપી મહંત નરેશનાથની કોલકાતાથી ધરપકડ કરી છે. પોલીસના જણાવ્યા અનુસાર, 25 જુલાઈએ ગણેશ મંદિરમાં અંકિત અને ઇસરાર નામના 2 મિત્રોની હત્યા કર્યા બાદ બંનેના મૃતદેહ મંદિર પરિસરમાં જ દફનાવી દેવામાં આવ્યા હતા. ત્યારબાદ ઉપર ટાઇલ્સ લગાવી દેવામાં આવી હતી.
13 ઓગસ્ટે ખોદકામમાં મળ્યા મૃતદેહ
બાગપતના ચાંદીનગર પોલીસ સ્ટેશન વિસ્તારના લહચૌડા ગામના ગણેશ મંદિરમાં આ ઘટના બની હતી. સિંગૌલી તગા ગામના અંકિત અને તેનો મિત્ર ઇસરાર 25 જુલાઈથી ગુમ હતા. પરિવારની ફરિયાદ બાદ પોલીસે તપાસ શરૂ કરી હતી.
મૃતદેહો ઉપર ટાઇલ્સ બિછાવી દેવામાં આવી
તપાસ દરમિયાન શંકા જતા 13 ઓગસ્ટે મંદિર પરિસરમાં ખોદકામ કરવામાં આવ્યું હતું. જમીનની નીચે એક ખાડામાં દફનાવેલા બંનેના મૃતદેહ મળી આવ્યા હતા. મૃતદેહો ઉપર ટાઇલ્સ બિછાવી દેવામાં આવી હતી.
અંકિતની બહેન સાથે સંબંધ હોવાનો દાવો
પોલીસના જણાવ્યા પ્રમાણે, પૂછપરછ દરમિયાન નરેશનાથે અંકિતની બહેન સાથે સંબંધ હોવાનો કથિત ખુલાસો કર્યો હતો. પોલીસના દાવા મુજબ, અંકિત પાસે બંનેની કેટલીક તસવીરો હતી અને તે તસવીરોના આધારે નરેશનાથ પર પૈસા માટે દબાણ કરતો હતો.
અંકિતને રસ્તામાંથી હટાવવાનું કાવતરું
પોલીસ તપાસ અનુસાર, બદનામીના ભયને કારણે અંકિતને રસ્તામાંથી હટાવવાનું કાવતરું ઘડાયું હોવાનો આરોપ છે. અંકિત સાથે તેનો મિત્ર ઇસરાર પણ હાજર હોવાથી તેને પણ નિશાન બનાવવામાં આવ્યો હોવાનું પોલીસનું કહેવું છે.
ચામાં ઊંઘની ગોળીઓ ભેળવી હોવાનો આરોપ
પોલીસના જણાવ્યા અનુસાર, નરેશનાથે બંનેને ચામાં ઊંઘની ગોળીઓ ભેળવીને પીવડાવી હતી. ત્યારબાદ બંનેની હત્યા કરી મૃતદેહોને મંદિર પરિસરમાં દફનાવી દીધા હોવાનો પોલીસનો દાવો છે. હત્યા બાદ પુરાવા છુપાવવા માટે ખાડા ઉપર ટાઇલ્સ લગાવવામાં આવી હતી, જેથી સામાન્ય રીતે જોતા ત્યાં કોઈ ખાડો હોવાની જાણ ન થાય.
હરિદ્વારથી નેપાળ અને પછી કોલકાતા
પોલીસના જણાવ્યા મુજબ, હત્યાકાંડ બાદ નરેશનાથ હરિદ્વાર પહોંચ્યો હતો અને ત્યાં ગંગામાં સ્નાન કર્યા બાદ નેપાળ ભાગી ગયો હતો. નેપાળમાં પૂર જેવી સ્થિતિ સર્જાયા બાદ તે કોલકાતાના વિધાનનગર વિસ્તારમાં પહોંચ્યો હતો.
ભિખારીનો વેશ ધારણ કર્યો
ત્યાં પોતાની ઓળખ છુપાવવા માટે તેણે ભિખારીનો વેશ ધારણ કર્યો હતો અને એક મંદિરની બહાર રહેવા લાગ્યો હતો.
સર્વેલન્સથી પોલીસ પહોંચી આરોપી સુધી
ડબલ મર્ડર બાદ ફરાર નરેશનાથ પર પોલીસે 25,000નું ઇનામ જાહેર કર્યું હતું. તેની શોધ માટે પોલીસ સતત દરોડા પાડી રહી હતી. સર્વેલન્સ અને લોકેશન ટ્રેસિંગની મદદથી પોલીસને તેની કોલકાતામાં હાજરીની માહિતી મળી હતી.
નરેશનાથને ઝડપી લીધો
ત્યારબાદ બાગપત પોલીસે કાર્યવાહી કરીને વિધાનનગર વિસ્તારમાંથી નરેશનાથને ઝડપી લીધો હતો. કાયદેસરની કાર્યવાહી બાદ તેને કોર્ટમાં રજૂ કરવામાં આવ્યો હતો, જ્યાંથી તેને જેલ મોકલી દેવાયો છે.
આ પણ વાંચો : Kanpur: Instagramની દોસ્તી પ્રેમમાં બદલાઈ, 3 બાળકોની માતા 25 વર્ષની યુવતી સાથે રહેવા ઘર છોડીને ભાગી
