સુરેન્દ્રનગર જિલ્લાના લીંબડી તાલુકાના રાસકા ગામે તસ્કરોએ ભારે આતંક મચાવ્યો છે. ગત મોડી રાત્રે તસ્કરોએ ગામની એક જ લાઈનમાં આવેલા 5 મકાનોને નિશાન બનાવી ચોરીનો નિષ્ફળ પ્રયાસ કર્યો હતો. જોકે, ગ્રામજનો જાગી જતાં મોટી ચોરી ટળી હતી, પરંતુ વારંવાર બનતી આવી ઘટનાઓને પગલે સ્થાનિકોમાં ભારે આક્રોશ અને ભયનો માહોલ જોવા મળી રહ્યો છે.
જાગૃત રહીશો સામે તસ્કરો નમાલા સાબિત થયા
મળતી માહિતી મુજબ, રાસકા ગામે તસ્કરોએ આયોજનબદ્ધ રીતે એક જ શેરીના પાંચ મકાનોના તાળા તોડ્યા હતા. ચોરીની પેરવીમાં રહેલા બે શંકાસ્પદ તસ્કરો મકાનમાં પ્રવેશે તે પહેલા જ રહીશોને ગંધ આવી ગઈ હતી. લોકો જાગી જતાં અને બુમાબુમ થતાં ગભરાયેલા તસ્કરો પોતાનું બાઈક ઘટનાસ્થળે જ મૂકીને અંધારામાં ફરાર થઈ ગયા હતા. હાલ આ બાઈક કબજે કરી પોલીસ તસ્કરો સુધી પહોંચવા ચક્રો ગતિમાન કર્યા છે.
