CBSEનો ધો.10 બોર્ડની પરીક્ષાને લઈ મોટો નિર્ણય; વર્ષમાં બે વખત પરીક્ષા લેવાશે

CBSE એ 2026 થી વર્ષમાં બે વાર ધોરણ 10 બોર્ડની પરીક્ષાઓ લેવાના ડ્રાફ્ટ નિયમોને મંજૂરી આપી દીધી છે. આ અંતર્ગત બે તબક્કામાં પરીક્ષા લેવામાં આવશે. પ્રથમ તબક્કો ફેબ્રુઆરી-માર્ચમાં અને બીજો તબક્કો મે મહિનામાં યોજાશે. બંને પરીક્ષાઓ સંપૂર્ણ અભ્યાસક્રમ પર લેવામાં આવશે.

જાહેર કરાયેલ ડ્રાફ્ટ નિયમોમાં શું છે?

• ધોરણ 10ની બોર્ડ પરીક્ષાના બંને તબક્કામાં સંપૂર્ણ અભ્યાસક્રમ આવરી લેવામાં આવશે.
• પ્રથમ તબક્કો ફેબ્રુઆરી-માર્ચમાં યોજાશે જ્યારે બીજો તબક્કો મે મહિનામાં યોજાશે.
• પરીક્ષાના બંને તબક્કા માટે અલગ-અલગ પરિણામ જાહેર કરવામાં આવશે.
• જો કે, પ્રાયોગિક અથવા આંતરિક મૂલ્યાંકન માત્ર એક જ વાર હાથ ધરવામાં આવશે.
• બંને પરીક્ષાઓ માટે એક જ કેન્દ્ર ફાળવવામાં આવશે.
• પરીક્ષા ફીમાં વધારો કરવામાં આવશે.
• પરીક્ષા ક્યારે યોજાશે?

CBSE અધિકારીઓએ જણાવ્યું કે આ નીતિ હેઠળ ધોરણ 10 બોર્ડની પરીક્ષાનો પ્રથમ તબક્કો 17 ફેબ્રુઆરીથી 6 માર્ચ, 2026 દરમિયાન લેવામાં આવશે, જ્યારે બીજો તબક્કો 5 મેથી 20 મે, 2026 દરમિયાન લેવામાં આવશે. બંને પરીક્ષાઓ સમગ્ર અભ્યાસક્રમને આવરી લેશે અને વિદ્યાર્થીઓને બંને તબક્કા માટે એક જ પરીક્ષા કેન્દ્ર ફાળવવામાં આવશે.

9 માર્ચ સુધી પ્રતિસાદ આપવા માટે બોર્ડની વિનંતી

આ ફેરફાર વિદ્યાર્થીઓને તેમના પરીક્ષાના પરિણામો સુધારવાની વધારાની તક આપશે. અધિકારીઓએ એમ પણ જણાવ્યું હતું કે પરીક્ષા ફીમાં વધારો કરવામાં આવશે અને વિદ્યાર્થીઓ પાસેથી અરજી દાખલ કરતી વખતે બંને પરીક્ષા માટે ફી લેવામાં આવશે. CBSE અનુસાર, બંને તબક્કાઓ પૂરક પરીક્ષાઓ તરીકે પણ લેવામાં આવશે, જેનો અર્થ છે કે કોઈ પણ સંજોગોમાં કોઈ વિશેષ પરીક્ષા લેવામાં આવશે નહીં. ડ્રાફ્ટ નિયમો જાહેર પ્લેટફોર્મ પર મૂકવામાં આવશે અને હિતધારકોને 9 માર્ચ સુધીમાં તેમના મંતવ્યો આપવા વિનંતી કરવામાં આવી છે. આ પછી, નીતિને અંતિમ સ્વરૂપ આપવામાં આવશે.