દેશભરમાં બોર્ડની પરીક્ષાઓની તૈયારીઓ વચ્ચે સેન્ટ્રલ બોર્ડ ઑફ સેકન્ડરી એજ્યુકેશન (CBSE)એ ધોરણ 10 અને 12ની પ્રેક્ટિકલ પરીક્ષાઓની દિશામાં પ્રથમ મોટું પગલું ભર્યું છે. બોર્ડે શૈક્ષણિક વર્ષ 2026-27 માટે વિન્ટર બાઉન્ડ (શિયાળુ) શાળાઓની પ્રેક્ટિકલ પરીક્ષાઓ, પ્રોજેક્ટ વર્ક અને ઇન્ટરનલ એસેસમેન્ટનું સંપૂર્ણ સમયપત્રક અને માર્ગદર્શિકા જાહેર કરી છે.
શિયાળામાં ભારે હિમવર્ષા અને કડકડતી ઠંડીનો સામનો કરતા વિસ્તારોમાં આવેલી આ શાળાઓમાં પ્રેક્ટિકલ પરીક્ષાઓ 9 નવેમ્બરથી શરૂ થઈને 19 ડિસેમ્બર 2026 સુધી ચાલશે. બોર્ડે સ્પષ્ટ કર્યું છે કે હાલ આ સમયપત્રક માત્ર વિન્ટર બાઉન્ડ શાળાઓ માટે જ લાગુ પડશે. સામાન્ય (રેગ્યુલર સેશન) શાળાઓ માટે પ્રેક્ટિકલ પરીક્ષાનું અલગ સર્ક્યુલર જાહેર કરવામાં આવશે.
CBSE પ્રેક્ટિકલ પરીક્ષા 2026-27: મુખ્ય માર્ગદર્શિકા
CBSE પ્રેક્ટિકલ પરીક્ષા 2026-27: મુખ્ય તારીખો અને નિયમો
- પરીક્ષાની તારીખો: 9 નવેમ્બરથી 19 ડિસેમ્બર 2026 સુધી પ્રેક્ટિકલ પરીક્ષાઓ યોજાશે.
- કઈ શાળાઓ માટે: આ સમયપત્રક માત્ર વિન્ટર બાઉન્ડ એટલે કે શિયાળુ વિસ્તારોમાં આવેલી શાળાઓને લાગુ પડશે.
- એક્સટર્નલ એક્ઝામિનર અને ઑબ્ઝર્વર: જરૂરિયાત મુજબ શાળાઓએ સંબંધિત રિજનલ ઑફિસનો સંપર્ક કરવાનો રહેશે.
- ફોટો સબમિશન: પ્રેક્ટિકલ પરીક્ષા દરમિયાન CBSE દ્વારા આપવામાં આવેલી એપ લિંક મારફતે દરેક બેચનો ગ્રુપ ફોટો અપલોડ કરવો ફરજિયાત રહેશે.
- રેગ્યુલર સેશનની શાળાઓ: સામાન્ય શાળાઓ માટે પ્રેક્ટિકલ પરીક્ષાનું અલગ સર્ક્યુલર જાહેર કરવામાં આવશે.
કડક નિયમ: માત્ર LOC ધરાવતા વિદ્યાર્થીઓને જ મળશે પ્રવેશ
CBSEએ તમામ શાળાઓને પોતાની પાસે ઉપલબ્ધ અંતિમ 'લિસ્ટ ઑફ કેન્ડિડેટ્સ' (LOC)ની કાળજીપૂર્વક ચકાસણી કરવાની કડક સૂચના આપી છે. પ્રેક્ટિકલ, પ્રોજેક્ટ વર્ક અથવા ઇન્ટરનલ એસેસમેન્ટમાં માત્ર એવા વિદ્યાર્થીઓને જ બેસવાની મંજૂરી આપવામાં આવશે, જેમનાં નામ ઓનલાઈન LOC મારફતે બોર્ડને મોકલવામાં આવ્યાં છે.
આ ઉપરાંત, ધોરણ 10 માટે ઇન્ટરનલ એસેસમેન્ટ માત્ર એક જ વાર યોજવામાં આવશે. શાળાઓએ નિર્ધારિત સમયમર્યાદામાં તમામ વિદ્યાર્થીઓનું મૂલ્યાંકન પૂર્ણ કરીને તેમના ગુણ CBSEના પોર્ટલ પર અપલોડ કરવાના રહેશે.
કેમેરાની નજરમાં રહેશે પરીક્ષા, દરેક બેચનો ગ્રુપ ફોટો અપલોડ કરવો પડશે
પરીક્ષાની પારદર્શિતા, વિશ્વસનીયતા અને નિષ્પક્ષતા જાળવવા માટે CBSEએ આ વખતે ટેક્નોલોજીનો ઉપયોગ વધાર્યો છે.
1. ગ્રુપ ફોટોગ્રાફ ફરજિયાત: બોર્ડ શાળાઓને એક ખાસ એપ લિંક આપશે. પ્રેક્ટિકલ પરીક્ષા દરમિયાન દરેક બેચનો એક ગ્રુપ ફોટો પાડીને આ એપ પર અપલોડ કરવો ફરજિયાત રહેશે.
2. બે થી ત્રણ શિફ્ટમાં યોજાશે પ્રેક્ટિકલ: જો કોઈ શાળામાં વિદ્યાર્થીઓની સંખ્યા 30થી વધુ હશે, તો લેબોરેટરીની સુવિધા અને માળખાને ધ્યાનમાં રાખીને એક દિવસમાં બે થી ત્રણ શિફ્ટમાં પરીક્ષાઓ યોજવામાં આવશે. જેથી ભીડ ન થાય અને મૂલ્યાંકન યોગ્ય રીતે થઈ શકે.
3. એક્સટર્નલ એક્ઝામિનરની નિમણૂક: ધોરણ 12ની પ્રેક્ટિકલ પરીક્ષાઓ માટે એક્સટર્નલ એક્ઝામિનર અને ઑબ્ઝર્વરની નિમણૂક કરવા શાળાઓને તેમની સંબંધિત રિજનલ ઑફિસનો તાત્કાલિક સંપર્ક કરવાની સૂચના આપવામાં આવી છે.
વધુ સમાચાર વાંચવા ડાઉનલોડ કરો સંદેશ ન્યૂઝ એપ : https://sandesh.com/d
