CBSE સાથે વિવાદોનો નાતો ખતમ થવાનું નામ નથી લઈ રહ્યો. ઓન સ્ક્રીન માર્કિંગને લઈને પહેલાથી જ બોર્ડ પર ગંભીર સવાલો ઉઠી ચૂક્યા છે, હવે એક એવો વિદ્યાર્થી સામે આવ્યો છે, જેને CBSE તરફથી એવી માર્કશીટ જાહેર કરી દેવામાં આવી, જેમાં માર્ક્સ જ નહોતા. તમને સાંભળીને હેરાની ચોક્કસ થઈ રહી હશે, પરંતુ ખરેખર એવું બન્યું છે. આ વિદ્યાર્થીએ કોરી માર્કશીટનો ફોટો શેર કર્યો છે, જેમાં કોઈ પણ વિષયના માર્ક્સ નહોતા. વિદ્યાર્થીના પિતાએ આખા મામલા વિશે જણાવ્યું અને કહ્યું કે છેલ્લા કેટલાક દિવસોમાં જે કંઈ પણ થયું છે, તેનાથી તેમનો બાળક હવે ડિપ્રેશનમાં આવી ગયો છે.
સાચી માર્કશીટ માટે ખાવા પડ્યા ધક્કા
રાજધાની દિલ્હીના 12મા ધોરણના વિદ્યાર્થી તનિષ્કને 81 ટકા માર્ક્સ આવ્યા, પરંતુ તેને બ્લેન્ક માર્કશીટ જાહેર કરી દેવામાં આવી. રિઝલ્ટ આવ્યું ત્યારે કોરી માર્કશીટ આવી. તનિષ્કના પિતા સચિને જણાવ્યું કે એક અઠવાડિયા સુધી સ્કૂલના ધક્કા ખાધા, પછી CBSE ના પણ ચક્કર કાપવા પડ્યા, પરંતુ કેટલાય દિવસો સુધી કોઈ સુનાવણી ન થઈ અને કોઈએ જવાબ ન આપ્યો.
રી-ઇવેલ્યુએશન પ્રોસેસમાં થઈ રહી છે મુશ્કેલી
વિદ્યાર્થી તનિષ્કના પિતાએ જણાવ્યું કે આશરે એક અઠવાડિયા પછી કોઈક રીતે રિઝલ્ટ આપવામાં આવ્યું, પરંતુ માર્ક્સ ઓછા આવ્યા હતા. આ પછી સ્કેન કોપી મંગાવવામાં આવી, તનિષ્કે તમામ 6 વિષયોની કોપી માગી, પરંતુ પાંચ વિષયની કોપી આપવામાં આવી. વિદ્યાર્થીના પિતાએ જણાવ્યું કે હવે તેમને રી-ઇવેલ્યુએશન પ્રોસેસમાં મુશ્કેલી થઈ રહી છે.
રી-ચેકિંગમાં અડચણ, પરિવાર પરેશાન
કાલે એટલે કે 6 જૂને આની છેલ્લી તારીખ છે અને હજુ સુધી રી-ઇવેલ્યુએશન પ્રોસેસ પૂરી થઈ નથી, જેના કારણે તેમનો પુત્ર ડિપ્રેશનમાં છે. સચિને જણાવ્યું કે તેઓ પોતાના પુત્રને સતત સમજાવી રહ્યા છે અને તેની સાથે ઉભા છે, પરંતુ આટલું કરવા છતાં પણ તે એ જ કહી રહ્યો છે કે તેની જ સાથે આવું કેમ થઈ રહ્યું છે. તેમની કોશિશ છે કે હવે ગમે તે રીતે પુત્રની તમામ કોપીઓનું રી-ઇવેલ્યુએશન પૂરું થઈ જાય.
