બોલીવુડ એક્ટર અભિષેક બચ્ચન ટૂંક સમયમાં તેની આગામી ફિલ્મ 'બી હેપ્પી'માં જોવા મળશે. એક્ટર સતત ફિલ્મના જોરશોરથી પ્રમોશનમાં બિઝી છે. તાજેતરમાં એક્ટરે પેરેન્ટિંગના વિષય પર વાત કરી અને કહ્યું કે શું માતાપિતા તેમના બાળકોના સારા મિત્ર બની શકે છે કે નહીં.
મીડિયા સાથે વાત કરતા અભિષેકે કહ્યું કે "ઘણી વાર, સામાન્ય ચર્ચાઓમાં, આપણે ભૂલી જઈએ છીએ કે એક પિતા શું અનુભવતો હોવો જોઈએ. મને લાગે છે કે પુરુષો તેમની લાગણીઓ વ્યક્ત કરવામાં ખૂબ સારા નથી. આ આપણી એક મોટી ખામી છે અને અમને લાગે છે કે આપણે શાંતિથી આપણી જવાબદારીઓ અને દબાણો સાથે આગળ વધવું જોઈએ."
પિતા તેમના શ્રેષ્ઠ પ્રયાસો કરે છે: અભિષેક બચ્ચન
તેમને વધુમાં કહ્યું કે "એક પિતા ક્યારેય માતાનું સ્થાન લઈ શકતા નથી. સ્ત્રીઓ ચોક્કસપણે શ્રેષ્ઠ હોય છે, પરંતુ તેનો અર્થ એ નથી કે પિતા જે કરે છે તેને અવગણવું જોઈએ. ક્યારેક એ વાત પર ભાર મૂકવો સરસ રહેશે કે કદાચ તેઓ માતાની સરખામણીમાં કંઈ નથી, પરંતુ તેમ છતાં, પિતા તેમના શ્રેષ્ઠ પ્રયાસો કરે છે."
બાળકો સાથેના પોતાના સંબંધો વિશે વાત કરતા અભિષેક બચ્ચને કહ્યું કે "મને લાગે છે કે તમારે તમારા બાળક સાથે મૈત્રીપૂર્ણ રહેવું જોઈએ, પરંતુ તમે તેમના મિત્ર ન બની શકો. તમે તેમના માતાપિતા છો. તેમનું રક્ષણ કરવું અને તેમને માર્ગદર્શન આપવું એ તમારી ફરજ છે. પરંતુ તમારે એટલા મૈત્રીપૂર્ણ રહેવું જોઈએ કે તેઓ તમારી સાથે ખુલીને વાત કરી શકે અને જ્યારે પણ કોઈ સમસ્યા હોય, ત્યારે તેઓ પહેલા તમને ફોન કરે. પરંતુ તે જ સમયે, એ સમજવું પણ મહત્વપૂર્ણ છે કે તમે તેમના માતાપિતા છો, અને તેમને આ ખબર હોવી જોઈએ."
અભિષેક બચ્ચને કેમ કહ્યું જાતે જ શોધવો પડશે રસ્તો
અભિષેકે એમ પણ કહ્યું કે માતા-પિતા બન્યા પછી લોકો ઘણી સલાહ આપે છે, પરંતુ માતા-પિતાએ પોતે જ નક્કી કરવાનું છે કે તેમના બાળકને શું શીખવવું. એક્ટરે વધુમાં કહ્યું કે "આખરે, તમારે તમારી ભૂલો પોતે જ કરવી પડશે અને તમારો રસ્તો જાતે જ શોધવો પડશે. જીવન તમને એ જ શીખવે છે. દરેક માતા-પિતા અલગ હોય છે, અને તેમના બાળકોને ઉછેરવાની તેમની રીત પણ અલગ હોય છે. આ સ્વ-શોધની સફર છે કારણ કે જ્યારે તમારે બીજા કોઈ વિશે વિચારવું પડે છે અને તમારા વિશે નહીં - જેમને તમે તમારા કરતાં વધુ પ્રેમ કરો છો - ત્યારે તમે તમારી જાતને વધુ સારી રીતે સમજી શકો છો."
અભિષેક બચ્ચનના વર્કફ્રન્ટ વિશે વાત કરીએ તો, તેની અપકમિંગ ફિલ્મ બી હેપ્પી 14 માર્ચે એમેઝોન પ્રાઈમ પર રિલીઝ થશે. જોની લીવર, નોરા ફતેહી અને હરલીન સેઠી સહિત ઘણા મોટા સ્ટાર્સ મુખ્ય ભૂમિકામાં જોવા મળશે.
