ફિલ્મ પઠાન આ મહિને રિલીઝ થવા જઈ રહી છે
ઘણી જગ્યાએ તેના હોર્ડિંગ્સની તોડફોડના અહેવાલ
આખી કારકિર્દીમાં આનાથી વધુ ખરાબ મંદી જોઈ નથી
શાહરૂખ ખાન અને દીપિકા પાદુકોણની ફિલ્મ પઠાન આ મહિને રિલીઝ થવા જઈ રહી છે. તેનું ગીત બેશરમ રંગ ખૂબ ચર્ચામાં છે. ઘણા લોકોના વાંધા બાદ એવા સમાચાર છે કે સેન્સર બોર્ડ દ્વારા ગીતના કેટલાક ભાગને એડિટ કરવા માટે કહેવામાં આવ્યું છે. ફિલ્મમાંથી આખું ગીત હટાવવાની પણ ચર્ચાઓ સાંભળવા મળી રહી છે, જોકે આ અંગે કોઈ સત્તાવાર અહેવાલ નથી. હવે સેન્સર બોર્ડના ચીફ રહી ચૂકેલા આશા પારેખનું કહેવું છે કે આ ગીતને ફિલ્મમાંથી કાઢી નાખવું જોઈએ. તેની પાછળ તેમણે નક્કર કારણ પણ આપ્યું છે.
વાંધાજનક વસ્તુ દૂર કરો
પઠાન ફિલ્મની રિલીઝ પહેલા ઘણી જગ્યાએ તેના હોર્ડિંગ્સની તોડફોડના અહેવાલ છે. સોશિયલ મીડિયા પર પણ ફિલ્મનો બહિષ્કાર કરવામાં આવી રહ્યો છે. તેના એક ગીત પર કેટલાક લોકોએ નારાજગી વ્યક્ત કરી છે. આશા પારેખે જણાવ્યું હતું કે, અમને હવે ફ્લોપ ફિલ્મ નહિ પરવડે. મને ખબર નથી કે સેન્સર બોર્ડ આ અંગે શું કહે છે. પરંતુ હું કહું છું કે જે ભાગમાંથી નારાજગી છે તેને દૂર કરો જેથી ફિલ્મ આરામથી રિલીઝ થઈ શકે.
આવી મંદી ક્યારેય જોઈ નથી
આશા પારેખ માને છે કે ફિલ્મ જોવા જનારા લોકોના મનમાં ડર બેસાડવામાં આવ્યો છે. આ રીતે આપણી ફિલ્મ ઈન્ડસ્ટ્રીની હત્યા થઈ રહી છે. આમિર ખાનની ફિલ્મ (લાલ સિંહ ચઢ્ઢા) સાથે પણ આવું જ થયું હતું. પઠાન સાથે આવું ન થવું જોઈએ. અમારા ઉદ્યોગને મોટી હિટની જરૂર છે. હું 60 વર્ષથી વધુ સમયથી આ ફિલ્મ ઈન્ડસ્ટ્રીનો ભાગ છું. મેં મારી આખી કારકિર્દીમાં આનાથી વધુ ખરાબ મંદી જોઈ નથી. આપણે હિટ મેળવવી જોઈએ. આ માટે આપણે એ સુનિશ્ચિત કરવાનું રહેશે કે ફિલ્મ બહિષ્કાર કલ્ચરનો શિકાર ન બને. તેઓ 1998 થી 2001 સુધી સેન્સર બોર્ડની ચીફ રહ્યા હતા.
