બોલિવૂડ ફિલ્મો બનાવવામાં ઘણા મહિનાઓ નીકળી જાય છે. જો ફિલ્મની સ્ટોરી, એક્ટીંગ અને ડાયરેક્શન જો પરફેક્ટ હોય તો ફિલ્મના રિલીઝ સમયે કોઈ મુશ્કેલી આવતી નથી. એક ફિલ્મ એવી હતી જે 1972 માં રિલીઝ થઈ હતી અને તેને બનાવવામાં 15 વર્ષ લાગ્યા હતા. અમે વાત કરી રહ્યા છીએ રોમેન્ટિક ડ્રામા ફિલ્મ પાકીઝા વિશે, જે કમાલ અમરોહી દ્વારા લખાયેલી, દિગ્દર્શિત અને નિર્મિત છે. કમાલ અમરોહી અને અભિનેત્રી મીના કુમારીના લગ્ન 1952માં થયા હતા અને તેમના સંબંધો પર આધારિત ફિલ્મ "દાયરા" (1953) બનાવી હતી. આ ફિલ્મ દર્શકોને પ્રભાવિત કરી શકી નહીં, ત્યારબાદ કમાલ અમરોહીએ 1956માં તેમની પત્ની મીના કુમારી સાથે મળીને પાકીઝા બનાવવાની યોજના બનાવી.
શરૂઆતમાં, સેટ ગોઠવવામાં, મીના કુમારીના સમય અને મુખ્ય ભૂમિકાને અંતિમ સ્વરૂપ આપવામાં કેટલીક મુશ્કેલીઓનો સામનો કરવો પડ્યો. આ બધું શાંત થવામાં 1964 સુધીનો સમય લાગ્યો, અને આ જ વર્ષે કમાલ અમરોહી અને મીના કુમારી વ્યક્તિગત મતભેદોને કારણે અલગ થયા. પરંતુ છૂટાછેડા ખરેખર ક્યારેય થયા નહીં. પાંચ વર્ષ પછી, મીના કુમારી આખરે ફિલ્મ પર કામ ફરી શરૂ કરવા સંમત થઈ. પાકીઝાનું શૂટિંગ નવેમ્બર 1971 માં પૂર્ણ થયું હતું અને એક મહિના પછી એડિટિંગ પૂર્ણ થયું હતું. 1.25 કરોડ રૂપિયાના બજેટમાં બનેલી, પાકીઝાએ બોક્સ ઓફિસ પર 6 કરોડ રૂપિયાથી વધુની કમાણી કરી અને તે વર્ષની સૌથી વધુ કમાણી કરનારી હિન્દી ફિલ્મ બની.
