- વેબ સિરીઝ 'ધ ટ્રાયલ'માં કાજોલ સાથે કામ કરનાર અભિનેત્રીનું મોત
- નૂર મલબીકા દાસ મુંબઈમાં તેના ઘરે મૃત હાલતમાં મળી આવી
- પોલીસે 6 જૂને નૂર મલબીકા દાસનો મૃતદેહ તેના લોખંડવાલા ઘરમાંથી મળ્યો
ફિલ્મ ઈન્ડસ્ટ્રીમાંથી એક ચોંકાવનારા સમાચાર સામે આવ્યા છે. વેબ સિરીઝ 'ધ ટ્રાયલ'માં કાજોલ સાથે કામ કરનાર અભિનેત્રી અને કતાર એરવેઝની પૂર્વ એર હોસ્ટેસ નૂર મલબીકા દાસનું નિધન થયું છે. અભિનેત્રી મુંબઈમાં તેના ઘરે મૃત હાલતમાં મળી આવી હતી. કહેવામાં આવી રહ્યું છે કે અભિનેત્રીએ આત્મહત્યા કરી લીધી છે. આટલી નાની ઉંમરમાં અભિનેત્રીના અચાનક મૃત્યુના સમાચારે બધાને ચોંકાવી દીધા છે.
પંખા સાથે લટકીને કરી આત્મહત્યા
મળતી માહિતી મુજબ, પોલીસે 6 જૂને નૂર મલબીકા દાસનો મૃતદેહ તેના લોખંડવાલા ઘરમાંથી મળ્યો હતો. જ્યાં અભિનેત્રીનો મૃતદેહ પંખા સાથે લટકતી હાલતમાં મળી આવ્યો હતો. પોલીસનું કહેવું છે કે તેણે આત્મહત્યા કરી છે. જો કે હજુ સુધી મોતનું કારણ બહાર આવ્યું નથી. પોલીસ આ મામલે તપાસ કરી રહી છે.
પોલીસને કોણે જાણ કરી?
પોલીસનું કહેવું છે કે નૂર માલાબિકા પાસે રહેતા લોકોને તેના ઘરમાંથી દુર્ગંધ આવી રહી હતી. જ્યારે પડોશીઓએ આ અંગે ઓશિવરા પોલીસને જાણ કરી તો તેઓએ અભિનેત્રીના ઘરનો દરવાજો તોડીને ફ્લેટમાં જઈને તપાસ કરી હતી. અંદર પ્રવેશતા જ પોલીસને નૂરનો મૃતદેહ પંખા સાથે લટકતી હાલતમાં મળી આવ્યો હતો.
એવું પણ કહેવામાં આવી રહ્યું છે કે જ્યારે પોલીસે નૂરના પરિવારનો સંપર્ક કરવાનો પ્રયાસ કર્યો તો કોઈ આગળ આવ્યું નહીં અને કોઈએ તેનો મૃતદેહ લીધો નહીં. આવી સ્થિતિમાં, પોલીસે લાવારસ મૃતદેહોના અગ્નિસંસ્કાર કરનાર એનજીઓની મદદથી રવિવારે નૂરના અંતિમ સંસ્કાર કર્યા હતા.
કોણ છે નૂર મલબીકા દાસ?
નૂર મલબીકા દાસ 32 વર્ષની હતી. તે આસામની રહેવાસી હતી. તેણે ઘણી હિન્દી ફિલ્મો અને વેબ સિરીઝમાં કામ કર્યું છે. જેમાં સિસાકિયાં, વોકમેન, સ્પાઈસી ચટની, પ્યુબિક રેમેડી, ઓર્ગેઝમ, દેખી અનદેખી, બેકરોડ હસ્ટલ વગેરેનો સમાવેશ થાય છે.
છેલ્લી પોસ્ટ 5 દિવસ પહેલા કરી હતી
તમને જણાવી દઈએ કે નૂર મલબીકા દાસ સોશિયલ મીડિયા પર ઘણી એક્ટિવ હતી. તેણે 5 દિવસ પહેલા હસતો વીડિયો શેર કર્યો હતો. એક્ટ્રેસની છેલ્લી પોસ્ટ પર કોમેન્ટ કરીને ફેન્સ પોતાનું દુઃખ વ્યક્ત કરી રહ્યા છે.
