બોલીવુડમાં આ દિવસોમાં ડરનો માહોલ બનેલો છે. થોડા દિવસો પહેલાં 18 ઓક્ટોબરના રોજ ટાઈગર શ્રોફ પર ગોળીબારની ઘટના સામે આવી હતી, જેમાં તેઓ સહેજમાં બચી ગયા હતા. આ પછી હવે અમિતાભ બચ્ચન અને દિલજીત દોસાંઝને લઈને માહિતી સામે આવી રહી છે કે તેમને જાનથી મારી નાખવાની ધમકી મળી છે. તેમની સાથે જ મેયર ઋતુ તાવડે પણ નિશાના પર છે.
ધમકીભર્યા ઈ-મેલથી મુંબઈમાં ફફડાટ
મળતી માહિતી મુજબ, મુંબઈ અને નવી મુંબઈમાં ધમકીભર્યા ઈ-મેલ મળ્યા છે, જેના પછી મુંબઈમાં દોડધામ મચી ગઈ છે. નવી મુંબઈના ઐરોલી સ્થિત વિબગ્યોર હાઈસ્કૂલને ઈ-મેલ મોકલીને બોમ્બથી ઉડાવી દેવાની ધમકી આપવામાં આવી છે. જણાવવામાં આવી રહ્યું છે કે આ ઈ-મેલમાં પંજાબી સિંગર દિલજીત દોસાંઝને પણ નિશાન બનાવવાની ધમકી આપવામાં આવી છે.
દિલજીત દોસાંઝ અને અમિતાભ બચ્ચન પર હુમલાની ધમકી
પંજાબી સિંગર દિલજીત દોસાંઝનો 27 નવેમ્બરના રોજ મુંબઈના મહાલક્ષ્મી રેસકોર્સમાં લાઈવ કોન્સર્ટ યોજાવાનો છે. આ ઈ-મેલમાં અમિતાભ બચ્ચનનું નામ પણ સામેલ છે. તેમના જુહુ સ્થિત બંગલા જલસા પર પણ હુમલો કરવાની ધમકી આપવામાં આવી છે. ઈ-મેલમાં ગ્રેનેડથી હુમલો કરવાની વાત કહેવામાં આવી છે. ધમકીમાં 27 થી 30 ઓક્ટોબર વચ્ચે નિશાન બનાવવાનો ઉલ્લેખ કરવામાં આવ્યો છે.
ખાલિસ્તાની સંગઠનોએ લીધી જવાબદારી: સુરક્ષા એજન્સીઓ એલર્ટ
આ ઈ-મેલમાં ખાલિસ્તાન નેશનલ આર્મી અને બબ્બર ખાલસાએ કથિત રીતે આની જવાબદારી લીધી છે. જોકે, ઈ-મેલમાં કરવામાં આવેલા આ દાવાઓની કોઈ પુષ્ટિ થઈ નથી. ધમકી મળ્યા પછી પોલીસ અને સુરક્ષા એજન્સીઓ સતર્ક થઈ ગઈ છે. સમગ્ર મામલાની તપાસ કરવામાં આવી રહી છે અને ધમકીની ગંભીરતાને ધ્યાનમાં રાખીને સુરક્ષા સંબંધિત પગલાં લેવામાં આવી રહ્યા છે.
ટાઈગર શ્રોફ પર થયો હતો જીવલેણ હુમલો
ટાઈગર શ્રોફ પર થોડા દિવસો પહેલાં જ જીવલેણ હુમલો કરવામાં આવ્યો હતો, જેમાં એક્ટરને ગોળીઓના છરા વાગવાથી ઈજાઓ થઈ હતી. તેના નિશાન પણ તેમણે બતાવ્યા હતા. આ ગોળીબારની ઘટના પછી મુંબઈમાં ખળભળાટ મચી ગયો હતો, જે બાદ ક્રાઈમ બ્રાન્ચની 20 સ્પેશિયલ ટીમો બનાવવામાં આવી હતી અને આ કેસમાં અત્યાર સુધીમાં લગભગ 10 ધરપકડ થઈ ચૂકી છે. શૂટર્સને પણ પકડી લેવામાં આવ્યા છે. કેસની ગંભીરતાને જોતાં પોલીસ આ મામલે ઝડપથી તપાસ કરી રહી છે.
આ પણ વાંચો-Kannada Film : હનુમાન અંશ કરતાં પણ ડબલ કમાણી, આ કન્નડ ફિલ્મે બોક્સ ઓફિસ પર મચાવ્યો તહેલકો!
