મોટા પડદા પર આપણે ઘણી ઈન્ટરેસ્ટિંગ સ્ટોરીઓ જોઈએ છીએ, પરંતુ પડદા પાછળ પણ ઘણી મજેદાર અને સુંદર કહાણીઓ છુપાયેલી હોય છે. આવો જ એક કિસ્સો અમિતાભ બચ્ચન અને શ્રીદેવી સાથે જોડાયેલો છે.
આ કિસ્સા મુજબ 1992માં રિલીઝ થયેલી ફિલ્મ ખુદા ગવાહમાં દિગ્દર્શક અમિતાભ બચ્ચન સાથે શ્રીદેવીને લેવા માગતા હતા, પરંતુ તે સમયે અભિનેત્રી માત્ર ગ્લેમરસ ભૂમિકા કરવા માગતી નહોતી. તેથી તેમણે આ ફિલ્મમાં કામ કરવાની ના પાડી દીધી હતી.
શ્રીદેવી તે સમયની ટોચની અભિનેત્રીઓમાંની એક હતી. જ્યારે તેમણે ફિલ્મ કરવાની ના પાડી ત્યારે અમિતાભ બચ્ચને તેમને મનાવવા માટે એક ખાસ રીત અપનાવી. અમિતાભ બચ્ચને શૂટિંગ સેટ પર શ્રીદેવી માટે ગુલાબના ફૂલોથી ભરેલો આખો ટ્રક મોકલ્યો. આ જોઈને શ્રીદેવી આશ્ચર્યચકિત થઈ ગઈ હતી, પરંતુ સાથે ખુશ પણ થઈ હતી. બિગ બીની આ રીતે મનાવવાની રીત તેમને ખૂબ ગમી અને તેમણે ફિલ્મ માટે હા પાડી દીધી. કોરિયોગ્રાફર સરોજ ખાને એક ઈન્ટરવ્યૂમાં જણાવ્યું હતું કે ટ્રક આવ્યો હતો અને તેના બધા ગુલાબ શ્રીદેવી પર વરસાવવામાં આવ્યા હતા. એ પળ ખૂબ સુંદર લાગી રહી હતી.
જોકે ફિલ્મ માટે હા પાડવાની સાથે જ અભિનેત્રીએ એક શરત પણ મૂકી હતી. તેમની શરત હતી કે તેઓ ફિલ્મમાં મા અને દીકરીની બેવડી ભૂમિકા ભજવશે. ખુદા ગવાહ 1992ની ભારતીય ક્રાઇમ-એક્શન ફિલ્મ છે, જેને મુકુલ એસ. આનંદે લખી અને દિગ્દર્શિત કરી હતી. આ ફિલ્મમાં અમિતાભ બચ્ચન, શ્રીદેવી, નાગાર્જુન, શિલ્પા શિરોડકર, ડેની ડેન્ઝોંગપા અને કિરણ કુમારે મહત્વની ભૂમિકાઓ ભજવી હતી. શ્રીદેવીએ ફિલ્મમાં બેવડી ભૂમિકા ભજવી હતી.
ફિલ્મનું સંગીત લક્ષ્મીકાંત-પ્યારેલાલે આપ્યું હતું. ઇન્કલાબ 1984 અને આખરી રસ્તા 1986 પછી ખુદા ગવાહ શ્રીદેવી અને અમિતાભ બચ્ચનની સાથેની ત્રીજી ફિલ્મ હતી. અફઘાનિસ્તાન અને ભારતની પૃષ્ઠભૂમિ પર બનેલી આ ફિલ્મ બાદશાહ ખાનની કહાણી છે. તે એક અફઘાન યોદ્ધા છે, જે પોતાની પ્રેમિકા બેનઝીરના પિતાની હત્યાનો બદલો લેવા ભારત આવે છે. પોતાનું કામ પૂરું કર્યા પછી તેના પર બીજી હત્યાનો ખોટો આરોપ મૂકવામાં આવે છે અને તેને ભારતમાં જેલમાં મોકલી દેવામાં આવે છે.