નાના પડદાનો સૌથી મોટો રિયાલિટી શો બિગ બોસ 20 પોતાના 20મા વર્ષમાં એક નવા અને ચોંકાવનારા અવતારમાં પરત ફરી રહ્યો છે. કન્ટેસ્ટન્ટ્સના નામ અંગે અટકળો વચ્ચે હવે શોના સૌથી મહત્વના ભાગ એટલે કે બિગ બોસના ઘરની પહેલી ઝલક સામે આવી છે. આ વખતે મેકર્સે ઘરની દીવાલોને માત્ર લક્ઝરીથી સજાવી નથી, પરંતુ એક એવી જાદુઈ ફેન્ટસી દુનિયા બનાવી છે, જ્યાં જે દેખાય છે તે હકીકતમાં હોતું નથી. આ સીઝનની આખી થીમ ડ્યુઆલિટી એટલે કે બેવડાપણું અને કલ્પના તથા વાસ્તવિકતાના ટકરાવ પર આધારિત છે. ઘરમાં પ્રવેશતા જ એવું લાગે છે જાણે કોઈ સપનાની કે વિચિત્ર દુનિયામાં આવી ગયા હોઈએ. ડિઝાઇનમાં રોજિંદા જીવનમાં જોવા મળતી વસ્તુઓને પણ એકદમ અલગ અંદાજમાં રજૂ કરવામાં આવી છે.
ટીપોટથી ઓક્ટોપસ સુધી, ઘરની અનોખી ડિઝાઇન
કિચનની જાણીતી ટીપોટ હવે એક વિશાળ સોફા પર ચા રેડતી જોવા મળે છે, જેને કન્ટેસ્ટન્ટ્સ માટે બેસવાની જગ્યા બનાવવામાં આવી છે. આ ઉપરાંત ઓક્ટોપસ પોતાના ટેન્ટેકલ્સમાં ચેસના મહોરા પકડીને ઊભો છે, જે બિગ બોસની રમતમાં ચાલતી દિમાગી ચાલો અને અનિશ્ચિતતાનું પ્રતીક છે. લાઉન્જમાં આકાશમાં ઉડતો હોટ-એર બલૂન હવે જમીન પર સુંદર અને આરામદાયક બેઠક બની ગયો છે. કિચનની પાસે એક વિચિત્ર નળમાંથી પાણીની જગ્યાએ સુંદર ફૂલો વહેતા જોવા મળે છે, જે ઘરના ગ્લેમરસ લુકને વધુ સુંદર બનાવે છે. ઘરની અલગ-અલગ દીવાલો પર મોટી આંખો બનાવવામાં આવી છે, જે દરેક ક્ષણે યાદ અપાવે છે કે બિગ બોસની નજરથી કોઈ બચી શકતું નથી.
રૂમ નંબર 20નું રહસ્ય હજુ પણ અકબંધ
આ વખતે ઘરમાં સૌથી વધુ ચર્ચા રૂમ નંબર 20ની થઈ રહી છે. મેકર્સે આ રૂમને સંપૂર્ણપણે ગુપ્ત રાખ્યો છે અને તેની અંદર શું હશે તે રહસ્ય 6 સપ્ટેમ્બરે પ્રીમિયરના દિવસે જ ખુલશે. એવી અટકળો છે કે આ રૂમમાંથી બહાર થનારા કન્ટેસ્ટન્ટ્સ માટે કોઈ ગુપ્ત જગ્યા હોઈ શકે છે અથવા તો રમતનો આખો વળાંક બદલી નાખતી કોઈ ખાસ પાવરનું કેન્દ્ર હોઈ શકે છે.
https://www.instagram.com/reel/Dc08yPeMTQZ/?utm_source=ig_web_copy_link&igsi=MzRlODBiNWFlZA==
વિચારસરણીને પડકારશે આ ડ્રીમસ્કેપ
ઘરની આ અનોખી ડિઝાઇન વિશે જાણીતી આર્ટ ડાયરેક્ટર વર્ષા જૈને જણાવ્યું કે સીઝન 20ના ઘરને ડિઝાઇન કરવાનો હેતુ એવી દુનિયા બનાવવાનો હતો, જે સતત માણસની વિચારસરણીને પડકારે. તેઓ ડ્યુઆલિટીના વિચારને રજૂ કરવા માગતા હતા, જ્યાં જાણીતી વસ્તુઓ નજીકથી જોતા જ એકદમ અલગ રૂપમાં જોવા મળે. ટીપોટ સોફા બની જાય છે, ઓક્ટોપસ ચેસ રમે છે અને બલૂન બેઠક બની જાય છે. દીવાલો પર દેખાતી આંખો દર્શાવે છે કે અહીં કંઈપણ છુપાયેલું રહેતું નથી. આ ઘર એક ડ્રીમસ્કેપ જેવું છે, જ્યાં હકીકત અને કલ્પના એકસાથે જોવા મળે છે.
6 સપ્ટેમ્બરથી શરૂ થશે બિગ બોસ 20
સલમાન ખાનની હોસ્ટિંગવાળો બિગ બોસ 20 6 સપ્ટેમ્બર 2026થી દર્શકો વચ્ચે આવી રહ્યો છે. દર્શકો આ શોને OTT પર JioHotstar પર રાત્રે 9:00 વાગ્યે અને ટીવી પર કલર્સ ચેનલ પર રાત્રે 10:30 વાગ્યે જોઈ શકશે.
આ પણ વાંચો-TMKOC : ન્યૂયોર્કમાં તારક મહેતાની માધવીનો ગ્લેમરસ લુક, સાડીમાં જોઈને ફેન્સ થયા ફિદા!
