જાણીતા પંજાબી સિંગર દલેર મહેંદી સાથે એક લાઈવ ઇવેન્ટ દરમિયાન થયેલા જાહેર અપમાન અને ગેરવર્તણૂકના મામલાએ હવે જોર પકડ્યું છે. આ ઘટનાથી નારાજ થઈને ફિલ્મ અને ટેલિવિઝન ઇન્ડસ્ટ્રીની જાણીતી સંસ્થા ફેડરેશન ઓફ વેસ્ટર્ન ઇન્ડિયા સિને એમ્પ્લોઇઝ એટલે કે FWICE દ્વારા વડાપ્રધાન નરેન્દ્ર મોદી અને ઉત્તરાખંડના મુખ્યમંત્રી પુષ્કર સિંહ ધામીને પત્ર લખવામાં આવ્યો છે. આ પત્રમાં કલાકારોના સન્માન, તેમની ગરિમા અને જાહેર મંચો પર જનપ્રતિનિધિઓના વર્તન અંગે ગંભીર સવાલો ઉઠાવવામાં આવ્યા છે.

લાઈવ ઇવેન્ટમાં મંત્રીએ ઉઠાવ્યા હતા સવાલો

આ સમગ્ર વિવાદ તાજેતરમાં ઉત્તરાખંડમાં આયોજિત એક ધાર્મિક અને નવરાત્રિ સાથે જોડાયેલી લાઈવ કમ્યુનિટી ઇવેન્ટ દરમિયાન સામે આવ્યો હતો. રિપોર્ટ મુજબ જાણીતા ગાયક દલેર મહેંદી સ્ટેજ પર પોતાનું પરફોર્મન્સ આપી રહ્યા હતા, ત્યારે જ ઉત્તરાખંડ સરકારના મંત્રી સુબોધ ઉનિયાલ અચાનક સ્ટેજ પર પહોંચી ગયા હતા. તેમણે લાઈવ પ્રોગ્રામની વચ્ચે જ ગાયકને અટકવા કહ્યું અને તેમની શારીરિક સ્થિતિ, તેમના બોલવા કે ઊભા રહેવાની ક્ષમતા તેમજ તેઓ લાઈવ ગાઈ રહ્યા છે કે લિપ-સિંક કરી રહ્યા છે તેના પર સવાલો ઊભા કર્યા હતા. આ સાથે તેમના પર દારૂના નશામાં હોવાનો આરોપ પણ લગાવ્યો હતો. FWICE નું માનવું છે કે મંત્રી દ્વારા આ રીતે બધાની સામે રોકવા અને સ્ટેજ પર કરેલી આપત્તિજનક ટિપ્પણીથી દલેર મહેંદીનું જાહેરમાં અપમાન થયું છે.

પીએમને પત્રમાં શું લખ્યું?

FWICE ના જનરલ સેક્રેટરી અશોક દુબેની સહી સાથે જાહેર કરાયેલા આ પત્રમાં વડાપ્રધાન કાર્યાલયનું ધ્યાન આ સંવેદનશીલ અને ગંભીર મુદ્દા તરફ દોરવામાં આવ્યું છે. પત્રની શરૂઆતમાં જ આ ઘટનાનો સખત વિરોધ કરતાં કહેવામાં આવ્યું છે કે કોઈ પણ જાહેર કે ધાર્મિક કાર્યક્રમમાં સારી વ્યવસ્થા જાળવી રાખવી જરૂરી છે, પરંતુ કોઈ પણ ફરિયાદ કે સવાલો દ્વારા સ્ટેજ પર જાહેરમાં કોઈ કલાકારનું અપમાન કરીને નહીં, આ સમસ્યાનો ઉકેલ સંવેદનશીલતા અને ગુપ્તતા સાથે લાવવો જોઈતો હતો. પત્રમાં સ્પષ્ટ રીતે એ પણ જણાવવામાં આવ્યું છે કે દલેર મહેંદી કોઈ પણ પ્રકારના આલ્કોહોલ એટલે કે દારૂનું સેવન કરતા નથી. આ ઉપરાંત FWICE એ એ વાતનો પણ ઉલ્લેખ કર્યો કે તેઓ આ દિવસોમાં સ્વાસ્થ્ય સંબંધિત સમસ્યાઓ સામે લડી રહ્યા છે અને તાજેતરમાં જ તેમની એક સર્જરી પણ થઈ છે, જેનાથી તેઓ અત્યારે રિકવર થઈ રહ્યા છે. આવા સમયે કોઈ પણ કલાકારની શારીરિક સ્થિતિ વિશે પૂરી સચ્ચાઈ જાણ્યા વગર ખોટો અર્થ કાઢવો અને તેના પર હોબાળો મચાવવો ખૂબ જ દુર્ભાગ્યપૂર્ણ છે.
https://x.com/PTI_News/status/2112883328852562115?ref_src=twsrc%5Etfw%7Ctwcamp%5Etweetembed%7Ctwterm%5E2112883328852562115%7Ctwgr%5E%7Ctwcon%5Es1_c10&ref_url=

પત્રમાં આગળ એ વાત પર ભાર મૂકવામાં આવ્યો છે કે કલાકારો આપણા દેશના સાંસ્કૃતિક વારસાનો સૌથી કિંમતી હિસ્સો છે. પોતાની સખત મહેનત, સમર્પણ અને વર્ષોની લગનથી તેઓ માત્ર લાખો-કરોડો લોકોનું મનોરંજન જ નથી કરતા, પરંતુ આખી દુનિયામાં ભારતની કલા અને પરંપરાઓનો ડંકો પણ વગાડે છે. દલેર મહેંદી ભારતીય મ્યુઝિક જગતનું એવું જાણીતું અને સન્માનિત નામ છે, જેમની સાથે થયેલું આવું વર્તન સમગ્ર એન્ટરટેઇનમેન્ટ ઇન્ડસ્ટ્રી માટે ચિંતાનો વિષય બની ગયું છે.

કલાકારો સાથે સન્માનપૂર્વક વર્તન થાય

FWICE એ પોતાના પત્રમાં એ પણ કહ્યું કે કલાકારો સાથે તેમના હોદ્દા કે પરિસ્થિતિઓથી ઉપર ઊઠીને યોગ્ય અને પ્રોફેશનલ રીતે વર્તવું જોઈએ. પત્રના અંતમાં વડાપ્રધાન કાર્યાલયને એવી વિનંતી કરવામાં આવી છે કે તેઓ આ બાબતે યોગ્ય માર્ગદર્શન આપે જેથી દેશભરમાં જનપ્રતિનિધિઓ અને ઇવેન્ટ ઓર્ગેનાઇઝર્સ વચ્ચે એવો સંદેશ જાય કે કલાકારો સાથે સન્માન, સંવેદનશીલતા અને જવાબદારીપૂર્વકનું વર્તન કરવું ખૂબ જ જરૂરી છે. આ પત્ર સામે આવ્યા પછી હવે આ મામલો વધુ ગંભીર બની ગયો છે અને ચારેય તરફ તેની ચર્ચા થઈ રહી છે. આવો જ એક પત્ર FWICE દ્વારા ઉત્તરાખંડના સીએમ પુષ્કર સિંહ ધામીને પણ મોકલવામાં આવ્યો છે.

આ પણ વાંચો-Celebrity Stories : 18 ફ્લોપ ફિલ્મો, મંદિરમાં અડધી રાત્રે કર્યા લગ્ન! શમ્મી કપૂરની કહાની જાણીને ચોંકી જશો