'રામાયણમ્' ફિલ્મમાં માતા સીતાના પાત્ર માટે સાઈ પલ્લવીની પસંદગી થઈ ત્યારથી જ ચર્ચા અને વિવાદ ચાલી રહ્યા છે. આ દરમિયાન ફિલ્મમાં માતા સીતાને રાક્ષસો સામે લડતાં બતાવવા પર પણ વિવાદ ઊભો થયો છે. અનેક ટીકાઓ વચ્ચે અભિનેતા ધનુષે સાઈ પલ્લવીનું ખુલ્લેઆમ સમર્થન કર્યું છે. અભિનેતાએ સ્પષ્ટ શબ્દોમાં કહ્યું છે કે આખા ભારતમાં પણ શોધવામાં આવે તો આ પાત્ર માટે સાઈ પલ્લવી જેવી બીજી કોઈ અભિનેત્રી નહીં મળે.
હવે ફિલ્મ રિલીઝ થયા બાદ પણ ટીકાકારોનું કહેવું છે કે સાઈ પલ્લવીનો દેખાવ અને તેમના વાંકડિયા વાળ માતા સીતાની પરંપરાગત અને દિવ્ય છબી સાથે મેળ ખાતા નથી. જોકે, આ તમામ ટીકાઓ વચ્ચે સાઉથના સુપરસ્ટાર ધનુષે સાઈ પલ્લવીનું સમર્થન કર્યું છે. 43 વર્ષના ધનુષે સ્પષ્ટ શબ્દોમાં કહ્યું છે કે આખા ભારતમાં પણ શોધવામાં આવે તો કોઈ અન્ય અભિનેત્રી માતા સીતાના પાત્રને એટલો ન્યાય આપી શકત નહીં, જેટલો સાઈ પલ્લવીએ આપ્યો છે.
ધનુષનું આ સમર્થન એવા સમયે આવ્યું છે, જ્યારે નિતેશ તિવારીના નિર્દેશનમાં બનેલી 'રામાયણમ્'ના એક દૃશ્યમાં માતા સીતા (સાઈ પલ્લવી)ને ભગવાન રામ (રણબીર કપૂર) સાથે તલવાર લઈને રાક્ષસોની સેના સામે લડતાં યોદ્ધા તરીકે દર્શાવવામાં આવ્યાં છે.
દર્શકો અને સમીક્ષકોનું કહેવું છે કે વાલ્મીકિની 'રામાયણ'માં ક્યાંય માતા સીતાએ યુદ્ધ લડ્યું હોવાનો ઉલ્લેખ નથી. જોકે, નિતેશ તિવારીએ સ્પષ્ટ કર્યું છે કે ફિલ્મ માટે તેમણે 'અદ્ભુત રામાયણ' ગ્રંથમાંથી પ્રેરણા લીધી છે, જેમાં માતા સીતાને યોદ્ધા રાજકુમારી તરીકે દર્શાવવામાં આવ્યાં છે.
ધનુષે કહ્યું- 'રામાયણમ્'માં સાઈ પલ્લવીની પસંદગી પર થતી ચર્ચા સમજાતી નથી
ધનુષ હાલમાં પોતાની ફિલ્મ 'ઓમ: ચેપ્ટર 1'ના પ્રચારમાં વ્યસ્ત છે. આ ફિલ્મમાં તેમની સાથે સાઈ પલ્લવી પણ જોવા મળશે. આ ઉપરાંત ધનુષના રાજકારણમાં પ્રવેશની પણ ચર્ચા ચાલી રહી છે.
ધનુષે સાઈ પલ્લવીની પ્રામાણિકતા અને અભિનયની પણ ખુલ્લા દિલે પ્રશંસા કરી છે. અભિનેતાએ સ્પષ્ટ શબ્દોમાં કહ્યું, "મને સમજાતું નથી કે 'રામાયણમ્'માં સીતાના પાત્ર માટે સાઈ પલ્લવીની પસંદગી થઈ તેને લઈને આટલી ચર્ચા શા માટે થઈ રહી છે. મને લાગે છે કે આખા ભારતમાં પણ શોધવામાં આવે તો કોઈ બીજી અભિનેત્રી આ પાત્રને એટલો ન્યાય આપી શકત નહીં."
ધનુષે જણાવ્યું- શૂટિંગના બ્રેક દરમિયાન પણ પ્રાર્થના કરતી રહે છે સાઈ
'ઓમ'ના પ્રી-રિલીઝ કાર્યક્રમમાં ધનુષે પહેલાં તો 'રામાયણમ્'ની રિલીઝ માટે સાઈ પલ્લવીને શુભેચ્છા પાઠવી હતી. ત્યારબાદ તેમણે કહ્યું, "તેમના સીતાના પાત્રને લઈને ઘણી ચર્ચા અને હોબાળો થઈ રહ્યો છે. મને એ સમજાતું નથી. શૂટિંગ દરમિયાન બ્રેકના સમયમાં પણ તે સતત પ્રાર્થના કરતી રહેતી હતી. તેને ભગવાનમાં ઊંડી શ્રદ્ધા છે અને તે ખૂબ જ પવિત્ર હૃદય ધરાવતી વ્યક્તિ છે. તે ખૂબ સુંદર દેખાય છે અને એક ઉત્તમ અભિનેત્રી પણ છે."
'આ પાત્ર ભજવવું સરળ નહોતું, પરંતુ તેમણે હિંમતથી તક સ્વીકારી'
6 વખત રાષ્ટ્રીય ફિલ્મ પુરસ્કાર જીતી ચૂકેલા ધનુષે 'મારી 2' ફિલ્મમાં સાઈ પલ્લવી સાથે કામ કરવાના અનુભવને યાદ કરતાં કહ્યું, "ત્યારે સાઈ પલ્લવી કેમેરા પાછળ ખૂબ શાંત રહેતી હતી અને બહુ ઓછું બોલતી હતી. 9 વર્ષ બાદ જ્યારે અમે 'OM'માં ફરી સાથે કામ કરી રહ્યા છીએ, ત્યારે તેના આત્મવિશ્વાસમાં ઘણો બદલાવ જોવા મળ્યો છે. તે એવી રીતે ઊભી હતી જાણે તેણે સિનેમાની કળામાં સંપૂર્ણ નિપુણતા મેળવી લીધી હોય. તેના હાવભાવ અને અંદાજમાં અદ્ભુત આત્મવિશ્વાસ હતો. આ ખરેખર આશ્ચર્યજનક હતું."
તેમણે વધુમાં કહ્યું, "આ પાત્ર ભજવવું બિલકુલ સરળ નહોતું, પરંતુ તેણે હિંમતથી આ તક સ્વીકારી અને ખૂબ જ સારી રીતે પોતાનું કામ કર્યું."
'ઓમ: ચેપ્ટર 1'માં CBI અધિકારી બની છે સાઈ પલ્લવી
ધનુષની ફિલ્મ 'ઓમ: ચેપ્ટર 1'માં સાઈ પલ્લવી CBI અધિકારી નિત્યા રેડ્ડીની ભૂમિકામાં જોવા મળશે. ફિલ્મમાં તેમને લાલ ચંદનના ગેરકાયદે વેપારની તપાસની જવાબદારી સોંપવામાં આવી છે.
ફિલ્મની પહેલી ઝલકમાં તેમના પાત્રના ભૂતકાળની પણ એક ઝલક જોવા મળે છે, જેમાં તેમણે એવું કંઈક ગુમાવ્યું છે, જેની ભરપાઈ ક્યારેય થઈ શકે તેમ નથી.
'ઓમ: ચેપ્ટર 1 – ઉધિરમ: ધ બ્લડ વુડ' એક્શન-ડ્રામા થ્રિલર ફિલ્મ છે, જે 20 નવેમ્બર 2026ના રોજ સિનેમાઘરોમાં રિલીઝ થશે. આ ફિલ્મનું નિર્દેશન રાજકુમાર પેરિયાસામીએ કર્યું છે. ફિલ્મમાં ધનુષ અને સાઈ પલ્લવી ઉપરાંત મમૂટી, શ્રીલીલા અને નસીરુદ્દીન શાહ પણ મહત્ત્વની ભૂમિકામાં જોવા મળશે.
