બોલીવુડ એક્ટર ગોવિંદા અને તેમની પત્ની સુનીતા આહુજા વચ્ચે ચાલી રહેલો વિવાદ અટકવાનું નામ લઈ રહ્યો નથી. છૂટાછેડાની અરજી પાછી ખેંચ્યા બાદ પણ બંનેના સંબંધોને લઈને અવારનવાર અલગ-અલગ સમાચાર સામે આવી રહ્યા છે. તાજેતરમાં સુનીતાએ રાખી સાવંત સાથે ફોન પર વાતચીત દરમિયાન દાવો કર્યો હતો કે ગોવિંદા બીજા લગ્ન કરવાની તૈયારી કરી રહ્યા હતા. આ કારણે તેમણે છૂટાછેડાની અરજી પાછી ખેંચી હતી. હવે સુનીતાના આ દાવા પર ગોવિંદાના મેનેજરે મૌન તોડ્યું છે.
ગોવિંદાના મેનેજરે જણાવી હકીકત
ઈન્ડિયા ટુડે સાથેની વાતચીતમાં ગોવિંદાના મેનેજર શશિ સિંહાએ ગોવિંદાના બીજા લગ્નના દાવાને ફગાવી દીધો. શશિએ કહ્યું, આ વાત હું તમારી પાસેથી સાંભળી રહ્યો છું. આવું કંઈ નથી અને ન તો થશે. કોઈ બીજા લગ્ન થઈ રહ્યા નથી. સુનીતા જી ગોવિંદાની પત્ની છે અને કદાચ તેમના મનમાં કંઈક ચાલી રહ્યું હશે, જેના કારણે તેમણે આવી વાત કહી. ગોવિંદાના બીજા લગ્નને લઈને ક્યારેય કોઈ વાત થઈ નથી. તેમનું સંપૂર્ણ ધ્યાન પોતાના કામ પર છે. શશિ સિંહાએ એમ પણ કહ્યું કે જો ગોવિંદા ખરેખર લગ્નજીવન પૂરું કરવા અથવા ફરીથી લગ્ન કરવા માગતા હોત, તો તેઓ પોતે જ છૂટાછેડાની અરજી કરતા. પરંતુ છૂટાછેડાની અરજી સુનીતાએ જ કરી હતી અને બાદમાં તેને પાછી ખેંચવાનો નિર્ણય પણ તેમણે જ લીધો.
સુનીતા આહુજાએ જ ઘરની વાતો બહાર કરી
શશિ સિંહાએ કહ્યું, બંને સમજદાર લોકો છે. ગોવિંદાએ ક્યારેય જાહેરમાં સુનીતા વિશે કંઈ ખરાબ કહ્યું નથી, જ્યારે સુનીતાએ જ ઘરની વાતો બહાર કરી છે. મને વિશ્વાસ છે કે બંને પોતાના અને પોતાના બાળકોના ભલા વિશે જ વિચારે છે. અમને ખબર નથી કે તેમની સાથે એવું શું થયું કે તેમણે પોતાનો નિર્ણય બદલી નાખ્યો, પરંતુ અમે આશા રાખી શકીએ કે બધું ઠીક થઈ જશે. બાળકોના ભલા માટે પણ આ જરૂરી છે, કારણ કે આ પ્રકારની નકારાત્મકતાની તેમના પર ખરાબ અસર પડે છે.
બીજા લગ્ન અંગે કોઈ વાત થઈ નથી
શશિ સિંહાએ કહ્યું, ગોવિંદા સમાજના એક જવાબદાર અને સન્માનિત સભ્ય છે. તેઓ એવું કોઈ કામ નહીં કરે, જેનાથી તેમની જાહેર છબીને નુકસાન થાય. તેમણે સુનીતાને માત્ર તેમના કામના પરિણામો વિશે સમજાવવાનો પ્રયાસ કર્યો છે, તેમની વિરુદ્ધ ક્યારેય કંઈ કહ્યું નથી. બીજા લગ્ન અંગે કોઈ વાત થઈ નથી. હાલમાં ગોવિંદા માત્ર પોતાના કામ પર ધ્યાન આપવા માગે છે.
https://www.instagram.com/reel/DcVbs_4Tg02/?utm_source=ig_web_copy_link&igsi=MzRlODBiNWFlZA==
સુનીતા આહુજાએ કર્યો મોટો દાવો
તાજેતરમાં રાખી સાવંતે પાપારાઝી સામે સુનીતાને ફોન કર્યો હતો અને સ્પીકર પર તેમની સાથે વાત કરી હતી. આ દરમિયાન સુનીતાએ જણાવ્યું હતું કે ગોવિંદા બીજા લગ્ન કરવાની યોજના બનાવી રહ્યા હતા. ત્યારબાદ સુનીતા તેમના પુત્ર યશવર્ધન આહુજા સાથે બાંદ્રા ફેમિલી કોર્ટની બહાર જોવા મળ્યા હતા, જેના કારણે બંનેના છૂટાછેડાની અફવાઓ ફેલાઈ હતી. જોકે, બાદમાં સુનીતાના મેનેજરે જણાવ્યું હતું કે સુનીતા અગાઉ દાખલ કરેલા છૂટાછેડાના કેસને પાછો ખેંચવા માટે ફેમિલી કોર્ટ ગઈ હતી.
શું છે સમગ્ર મામલો?
હાલમાં ગોવિંદાનું નામ તેમની આગામી ફિલ્મ રૂપાની એક્ટ્રેસ કોમલ રાણી સ્વર્ણકાર સાથે જોડાઈ રહ્યું છે. તાજેતરમાં ગોવિંદા અને તેમની અફવાઓમાં રહેલી ગર્લફ્રેન્ડ રાણી સ્વર્ણકારને એરપોર્ટ પર સાથે જોવા મળ્યા હતા. બંનેની તસવીરો સોશિયલ મીડિયા પર ખૂબ વાયરલ થઈ હતી, ત્યારબાદ આ વિવાદ વધુ વકર્યો હતો.
આ પણ વાંચો-Legendary Singer : એક જ શ્વાસમાં ગાયું હતું કિશોર કુમારે આ આઇકોનિક ગીત! 56 વર્ષ પછી પણ લોકો છે દિવાના!
