નવાઝુદ્દીન સિદ્દીકી પોતાના ગંભીર અને દમદાર રોલ માટે જાણીતા છે, પરંતુ આ વખતે તેઓ એક કોમેડી શોમાં મજાકનું નિશાન બન્યા. સમય રૈનાએ ‘ઇન્ડિયાઝ ગોટ લેટેન્ટ 2’માં પહેલા તેમની પ્રશંસા કરી અને પછી તેમની ફિલ્મ ‘થામા’થી લઈને ‘સેક્રેડ ગેમ્સ’ સુધીના અનેક રોલને લઈને એવી મજાક કરી કે નવાઝને પણ જવાબ આપવો પડ્યો.
સમય રૈનાના શો ‘ઇન્ડિયાઝ ગોટ લેટેન્ટ’ની સીઝન 2ના લેટેસ્ટ એપિસોડમાં આ વખતે નવાઝુદ્દીન સિદ્દીકી સાથે ભુવન બામ, મુકેશ છાબરા અને કૌસ્તુભ અગ્રવાલ પણ શોના પેનલમાં જોવા મળ્યા. નવાઝુદ્દીન શોમાં પહોંચ્યા ત્યારે શરૂઆતમાં સમય રૈનાએ તેમની ખૂબ પ્રશંસા કરી. પરંતુ થોડા સમય બાદ તેમની સાથે મજાકનો સિલસિલો શરૂ થઈ ગયો.
મજાકની શરૂઆત તેમની ફિલ્મ ‘થામા’થી થઈ. આ ઉપરાંત નવાઝુદ્દીનના ‘સેક્રેડ ગેમ્સ’ના રોલને લઈને પણ તેમની મજાક કરવામાં આવી.
‘થામા કેમ કરી?’થી શરૂ થઈ નવાઝુદ્દીનની મજાક
નવાઝુદ્દીન સિદ્દીકી સાથે વાતચીત દરમિયાન સમય રૈનાએ અચાનક તેમની ફિલ્મ ‘થામા’નો ઉલ્લેખ કર્યો. તેમણે નવાઝુદ્દીનને પૂછ્યું કે તેમણે ‘થામા’ કેમ કરી અને આ ફિલ્મ બનાવી જ શા માટે. સવાલ સાંભળીને નવાઝુદ્દીન થોડી ક્ષણ માટે અટક્યા અને પછી મજાકિયા અંદાજમાં કહ્યું, ‘થામા? હા ઠીક છે. બની ગઈ, બની ગઈ.’
આટલું જ નહીં, શોમાં વધુ એક વખત ‘થામા’નો ઉલ્લેખ થયો. એક કન્ટેસ્ટન્ટે એક્ટિંગ માટે નવાઝુદ્દીન પાસે મદદ માંગી ત્યારે સમય રૈનાએ પૂછ્યું, ‘એક્ટિંગ આવડે છે ને.’ આના પર નવાઝુદ્દીને આત્મવિશ્વાસ સાથે હા પાડી ત્યારે સમય રૈનાએ કહ્યું, ‘તો થામામાં શું ગરબડ થઈ?’
આના પર નવાઝુદ્દીને પણ મજાકમાં કહ્યું કે તેઓ ‘થામા’ જેવી જ એક્ટિંગ કરીને બતાવશે. તેઓ કંઈ કરે એ પહેલાં જ સમય રૈનાએ તેમને રોકીને કહ્યું, ‘થામાવાળી એક્ટિંગ નથી જોઈતી.’
નવાઝુદ્દીને કહ્યું, ‘ડ્રગ એડિક્ટ કે ક્રિમિનલનો રોલ મને જ કેમ મળે?’
શોમાં નવાઝુદ્દીનની વેબ સિરીઝ ‘સેક્રેડ ગેમ્સ’ વિશે પણ વાત થઈ. સમય રૈનાએ પહેલાં સિરીઝ અને નવાઝુદ્દીનના કામની પ્રશંસા કરી, પરંતુ પછી તેમના રોલને લઈને મજાક કરવા લાગ્યા. તેમણે કહ્યું કે તેમાં નવાઝુદ્દીને જે રોલ કર્યો છે, તે કેરેક્ટર ડ્રગ્સ લે છે, દારૂ પીવે છે, ખોટાં કામ કરે છે અને પછી સેટ પર પહોંચી જાય છે.
આના પર નવાઝુદ્દીને પણ મજાકિયા અંદાજમાં કહ્યું, ‘હું આજે પણ એવી જ તૈયારી કરીને આવ્યો છું.’ શોમાં નવાઝુદ્દીન અને કાસ્ટિંગ ડિરેક્ટર મુકેશ છાબરા વચ્ચેની મિત્રતાનો પણ ઉલ્લેખ થયો. આ પછી મજાકમાં સમય રૈનાએ કહ્યું, ‘જ્યારે પણ કોઈ ડ્રગ એડિક્ટ કે ક્રિમિનલનું કેરેક્ટર હોય છે, ત્યારે તે નવાઝુદ્દીનને જ મળે છે.’
ત્યારબાદ નવાઝે હસીને વાત ટાળી નહીં, પરંતુ પોતાની વાત પણ કહી. તેમણે કહ્યું, ‘મેં આ સિવાય પણ અનેક પ્રકારના રોલ કર્યા છે, પરંતુ કદાચ લોકોએ તેમને જોયા નથી.’ ત્યારબાદ તેમણે કહ્યું કે લોકોને બદમાશી વધુ જોવી ગમે છે.
