તમિલનાડુના મુખ્યમંત્રી સી. જોસેફ વિજય આજે પોતાનો જન્મદિવસ ઉજવી રહ્યા છે. આ ખાસ અવસરે ભારતના પ્રધાનમંત્રી નરેન્દ્ર મોદીએ સોમવારે મુખ્યમંત્રી સી. જોસેફ વિજયને જન્મદિવસની શુભેચ્છા આપી અને તેમના લાંબા તેમજ સ્વસ્થ જીવનની પ્રાર્થના કરી.
PM નરેન્દ્ર મોદીએ આપી શુભેચ્છા
PM નરેન્દ્ર મોદીએ સોશિયલ મીડિયા પ્લેટફોર્મ X પર લખ્યું, તમિલનાડુના મુખ્યમંત્રી થિરૂ સી. જોસેફ વિજયને જન્મદિવસની શુભેચ્છા. હું તેમના લાંબા અને સ્વસ્થ જીવનની પ્રાર્થના કરું છું. 22 જૂન 1974 ના રોજ ચેન્નાઈમાં જન્મેલા વિજય એક એક્ટરથી રાજનેતા બન્યા છે અને તેઓ તમિલનાડુના મુખ્યમંત્રી તરીકે કાર્યરત છે. રાજનીતિમાં આવ્યા પહેલા તેઓ તમિલ સિનેમાના સૌથી સફળ અને પ્રભાવશાળી સિતારાઓમાંના એક રહ્યા છે અને પ્રશંસકો તેમને 'થલાપતિ' ના નામથી બોલાવે છે.
વિજયનું પૂરું નામ જોસેફ વિજય ચંદ્રશેખર છે. તેઓ ફિલ્મ નિર્માતા એસ.એ. ચંદ્રશેખર અને ગાયિકા શોભા ચંદ્રશેખરના દીકરા છે. તેમણે પોતાના પિતા દ્વારા નિર્દેશિત ફિલ્મ વેત્રીમાં એક બાળ કલાકારના રૂપમાં પોતાની અભિનય કારકિર્દીની શરૂઆત કરી હતી અને પાછળથી તમિલ ફિલ્મ જગતમાં એક મુખ્ય સ્ટાર તરીકે ઉભરી આવ્યા.
વિજયની ફિલ્મ કારકિર્દી
વિજયે સાઉથ સિનેમામાં પોતાની જાતને સૌથી મોટા નામોમાંના એક તરીકે સ્થાપિત કરી. ખુશી, થિરૂમલાઈ, ઘિલ્લી, પોક્કીરી અને સરકાર જેવી ફિલ્મોએ તેમની લોકપ્રિયતામાં યોગદાન આપ્યું. જો કે, તેમને શરૂઆતમાં રોમેન્ટિક ભૂમિકાઓ માટે ઓળખ મળી હતી, પરંતુ પછીથી તેમણે પોતાની જાતને એક એક્શન સ્ટાર તરીકે ઢાળી, જેઓ સામાજિક અને રાજકીય ન્યાય માટે લડતા પાત્રો ભજવવા માટે જાણીતા હતા. પ્રશંસકો વચ્ચે તેમની જબરદસ્ત લોકપ્રિયતાના કારણે અવારનવાર તેમની સરખામણી એ મહાન તમિલ એક્ટર્સ સાથે કરવામાં આવતી હતી, જેમણે સફળતાપૂર્વક રાજનીતિમાં પગ મૂક્યો હતો. તેમની ઘણી ફિલ્મોમાં રાજકીય વિષયોને તેમના ભવિષ્યના રાજકીય ઇરાદાઓના સંકેત તરીકે જોવામાં આવતા હતા.
વિજયની રાજકીય કારકિર્દી
2024 માં વિજયે તમિલગા વેત્રી કઝગમ (TVK) પાર્ટી બનાવી અને રાજનીતિમાં સામેલ થયા. પાર્ટીએ 2026 ની તમિલનાડુ વિધાનસભા ચૂંટણીમાં શાનદાર પ્રદર્શન કર્યું અને રાજ્યમાં સૌથી મોટી પાર્ટી બનીને ઉભરી આવી. TVK એ તમિલનાડુ વિધાનસભાની 234 માંથી 108 બેઠકો પર વિજય મેળવ્યો. બહુમતીના આંકડાથી ઓછી બેઠકો આવતા TVK એ કોંગ્રેસ અને અન્ય પક્ષો સાથે ગઠબંધન કર્યું. આ પછી જોસેફ વિજયે 10 મેના રોજ તમિલનાડુના મુખ્યમંત્રી તરીકે શપથ લીધા હતા.
આ પણ વાંચો-Thalapathy Vijay : 18 વર્ષની ઉંમરે બન્યા હીરો, પિતા સાથેના મતભેદ બાદ છોડ્યું હતું ઘર!
