નિતેશ તિવારીના નિર્દેશનમાં બનેલી ફિલ્મ 'રામાયણ' 5 નવેમ્બરે સિનેમાઘરોમાં રિલીઝ થઈ ગઈ છે. ફિલ્મને દર્શકો તરફથી સારો પ્રતિસાદ મળી રહ્યો છે. ફિલ્મની દરેક જગ્યાએ ચર્ચા થઈ રહી છે અને તેને પોઝિટિવ રિવ્યૂ મળી રહ્યા છે. ફિલ્મમાં રણબીર કપૂર, સાઈ પલ્લવી, રવિ દુબે અને યશ મુખ્ય ભૂમિકામાં છે.
એક તરફ ફિલ્મ સિનેમાઘરોમાં દર્શકોનું મનોરંજન કરી રહી છે, તો બીજી તરફ તેની OTT રિલીઝને લઈને પણ નવી માહિતી સામે આવી રહી છે.
'ઇકોનોમિક્સ'ના અહેવાલ અનુસાર, આ ફિલ્મ OTT પ્લેટફોર્મ જિયો હોટસ્ટાર પર રિલીઝ થઈ શકે છે. સિનેમાઘરોમાં ફિલ્મની રિલીઝ પૂરી થયા બાદ તેને જિયો હોટસ્ટાર પર સ્ટ્રીમ કરવામાં આવશે.
ખાસ વાત એ છે કે ફિલ્મ પ્લેટફોર્મ પર 'પે-પર-વ્યૂ' વિકલ્પ સાથે ઉપલબ્ધ રહેશે. એટલે કે દર્શકોએ જિયો હોટસ્ટારનું સક્રિય સબ્સ્ક્રિપ્શન લીધું હશે તો પણ ફિલ્મ જોવા માટે અલગથી પૈસા ચૂકવવા પડશે.
આ ઉપરાંત એવા અહેવાલો પણ સામે આવ્યા છે કે સ્ટાર ગ્રુપે ફિલ્મના ડિજિટલ અને સેટેલાઇટ રાઇટ્સ માટે 450 કરોડ રૂપિયાની મોટી ડીલ કરી છે.
ફિલ્મના બોક્સ ઓફિસ કલેક્શનની વાત કરીએ તો ઓપનિંગ ડે પર જ ફિલ્મ શાનદાર કમાણી કરી રહી છે. સેકનિલ્કના જણાવ્યા અનુસાર, રાત્રે 7:30 વાગ્યા સુધીમાં ફિલ્મે બોક્સ ઓફિસ પર 49.24 કરોડ રૂપિયાનું કલેક્શન કર્યું હતું. જ્યારે ફિલ્મનું ગ્રોસ કલેક્શન 50 કરોડનો આંકડો પાર કરીને 58.10 કરોડ રૂપિયા સુધી પહોંચી ગયું હતું.
યશના રાવણના પાત્રની થઈ રહી છે પ્રશંસા
ફિલ્મને દર્શકો તરફથી પોઝિટિવ રિવ્યૂ મળી રહ્યા છે. ખાસ કરીને ફિલ્મના VFXની ખૂબ પ્રશંસા થઈ રહી છે. રાવણના પાત્રમાં યશના અભિનયને પણ દર્શકો પસંદ કરી રહ્યા છે. યશ અને જટાયુ વચ્ચેની લડાઈનું દૃશ્ય પણ ચર્ચામાં છે.
ફિલ્મમાં જટાયુના પાત્રને અનુપમ ખેરે અવાજ આપ્યો છે, જ્યારે દિલજીત દોસાંજે હનુમાન ચાલીસા ગાઈ છે. ફિલ્મનું સંગીત એ.આર. રહેમાન અને હાન્સ ઝિમરે આપ્યું છે.
આ ઉપરાંત ફિલ્મમાં વિવેક ઓબેરોય, રકુલ પ્રીત સિંહ, અરુણ ગોવિલ અને સની દેઓલ જેવા કલાકારો પણ મહત્ત્વની ભૂમિકામાં જોવા મળે છે.