નિતેશ તિવારીની રામાયણનું ટ્રેલર રિલીઝ થતાં જ સોશિયલ મીડિયા પર છવાઈ ગયું છે. આ રોમાંચક ટ્રેલરમાં રાવણના પાત્રમાં યશ અને રામના પાત્રમાં રણબીર કપૂરની જોરદાર પ્રશંસા થઈ રહી છે. માત્ર ભારતમાં જ નહીં, પાકિસ્તાનમાં પણ આ ટ્રેલરની ખૂબ ચર્ચા થઈ રહી છે. ઘણા પાકિસ્તાની ઇન્ફ્લુએન્સર્સ અને ફિલ્મ સમીક્ષકોએ આ ટ્રેલરનું રિવ્યૂ કર્યું છે. ટ્રેલર જોયા બાદ સરહદ પારથી પણ સારા પ્રતિસાદ સામે આવ્યા છે. લોકો તેની સ્ટોરી, શાનદાર VFX અને કલાકારોના અભિનયની ખૂબ પ્રશંસા કરી રહ્યા છે.

પાકિસ્તાની કન્ટેન્ટ ક્રિએટરે કરી પ્રશંસા

કામ વાલી બાત નામથી જાણીતો ડિજિટલ કન્ટેન્ટ ક્રિએટર માવિયા ઉમર ફારૂકીએ સોશિયલ મીડિયા પર ટ્રેલર અંગે પોતાનો પ્રતિભાવ શેર કર્યો. તેણે કહ્યું, આ ફિલ્મનું બજેટ 4000 કરોડ રૂપિયા છે અને તેની અસર ટ્રેલરમાં સ્પષ્ટ જોવા મળે છે. વીડિયોમાં માવિયાએ ફિલ્મના VFXની પણ ખૂબ પ્રશંસા કરી. તેણે કહ્યું કે ફિલ્મના વિઝ્યુઅલ ઇફેક્ટ્સ માટે બોલીવુડે હોલીવુડ સાથે મળીને શાનદાર કામ કર્યું છે. ટ્રેલર જોયા બાદ તેણે કહ્યું, એક પાકિસ્તાની તરીકે હું કહીશ કે ભાઈ, ટ્રેલર જોઈને તો હું ઉત્સાહિત થઈ ગયો છું. તેણે યશ અને રણબીર કપૂરના અભિનયની પણ પ્રશંસા કરી અને કહ્યું કે નિર્માતાઓએ ફિલ્મને ખૂબ મોટા લેવલે તૈયાર કરી છે.
https://www.instagram.com/reel/DbZZGc7ILTu/?utm_source=ig_web_copy_link&igsh=MzRlODBiNWFlZA==

યૂટ્યુબર હસનાત ખાને પણ કરી પ્રશંસા

પાકિસ્તાની ફિલ્મ સમીક્ષક અને યૂટ્યુબર હસનાત ખાને પણ પોતાની યૂટ્યુબ ચેનલ પર રામાયણના ટ્રેલરની ખૂબ પ્રશંસા કરી. તેણે ખાસ કરીને યશના અભિનય અને એક્શન દૃશ્યોને ખૂબ જ દમદાર ગણાવ્યા. હસનાતે ટ્રેલરને અમેઝિંગ ગણાવીને કહ્યું કે ફિલ્મના VFX શાનદાર લાગી રહ્યા છે.

રામાયણ 2 ભાગમાં રિલીઝ થશે

નિતેશ તિવારીના દિગ્દર્શનમાં બનેલી રામાયણને ભારતીય સિનેમાની સૌથી મોટી ફિલ્મોમાંની એક માનવામાં આવી રહી છે. ફિલ્મનું નિર્માણ નમિત મલ્હોત્રાએ પ્રાઇમ ફોકસ સ્ટુડિયોઝ અને મોન્સ્ટર માઇન્ડ ક્રિએશન્સ સાથે મળીને કર્યું છે. ફિલ્મમાં રણબીર કપૂર ભગવાન રામ, યશ રાવણ, સાઈ પલ્લવી માતા સીતા, રવિ દુબે લક્ષ્મણ અને સની દેઓલ ભગવાન હનુમાનના પાત્રમાં જોવા મળશે. 4000 કરોડના બજેટમાં બનેલી આ ફિલ્મના હાઈ-એન્ડ VFX માટે દુનિયાના અનેક આંતરરાષ્ટ્રીય VFX નિષ્ણાતો સાથે કામ કરવામાં આવ્યું છે. ફિલ્મનું સંગીત ઓસ્કાર વિજેતા હાન્સ ઝિમર અને એ. આર. રહેમાને તૈયાર કર્યું છે. ‘રામાયણ’ને 2 ભાગમાં રિલીઝ કરવાની તૈયારી છે. પહેલો ભાગ દિવાળી 2026 અને બીજો ભાગ દિવાળી 2027માં રિલીઝ થશે.

આ પણ વાંચો-TMKOCમાં સ્પાઈડર મેનની સરપ્રાઈઝ એન્ટ્રી! ગુસ્સે થયેલા ફેન્સે કહ્યું- જો આને લાવી શક્યા, તો દયાબેનને કેમ નહીં?