થિયેટરમાં રિલીઝ બાદ ફિલ્મો OTT પર આવવાનો ટ્રેન્ડ હવે સામાન્ય બની ગયો છે. આ રીતે નિર્માતાઓને બોક્સ ઓફિસ કલેક્શનની સાથે OTT ડીલથી પણ આર્થિક ફાયદો થાય છે. પરંતુ સૌથી મોટો ફાયદો એવી ફિલ્મોને થાય છે, જે બોક્સ ઓફિસ પર ચાલી શકી નહોતી અને OTT પર તેમને નવી તક મળી.
બોક્સ ઓફિસ પર ડિઝાસ્ટર રહી હતી ફિલ્મ
આવી જ એક ફિલ્મ હાલ OTT પર ટોપ 10માં ટ્રેન્ડ કરી રહી છે. આ ફેન્ટસી ફિલ્મ 2 વર્ષ પહેલા એટલે કે 2024માં રિલીઝ થઈ હતી અને હવે 2026માં ટોપ 10માં પોતાનું સ્થાન બનાવી ચૂકી છે. આ ફિલ્મ લગભગ 350 કરોડ રૂપિયાના બજેટમાં બનાવવામાં આવી હતી, પરંતુ બોક્સ ઓફિસ પર તેણે માત્ર 106 કરોડ રૂપિયાની કમાણી કરી અને ફ્લોપ સાબિત થઈ.
ફેન્ટસી ફિલ્મમાં છે પુનર્જન્મની કહાની
આ ફિલ્મ કંગુવા છે, જેમાં સૂર્યાએ ડબલ રોલ ભજવ્યો છે, જ્યારે બોબી દેઓલે વિલન ઉધિરનનું પાત્ર ભજવ્યું છે. કંગુવાની કહાની 2 અલગ દુનિયામાં આગળ વધે છે. એક આધુનિક સમયની અને બીજી ઐતિહાસિક સમયની કહાની છે. બંને કહાનીના મુખ્ય પાત્રો, જેમાં સૂર્યા ડબલ રોલમાં છે, એકબીજા સાથે પુનર્જન્મના સંબંધથી જોડાયેલા છે.
શું છે ફિલ્મની કહાની?
ઝેટા નામનો એક છોકરો રશિયાની એક ગુપ્ત બાયોમેડિકલ લેબમાંથી ભાગી જાય છે, જ્યાં બાળકોને સુપરપાવર આપવા અને તેમની મગજની ક્ષમતા વધારવા માટે પ્રયોગ કરવામાં આવતા હતા. ઝેટા ગોવા જાય છે અને ફ્રાન્સિસ થિયોડોરનો પીછો કરવા લાગે છે. ફ્રાન્સિસ પોલીસ સાથે કામ કરતો એક ચાલાક બાઉન્ટી હન્ટર છે. ફ્રાન્સિસ અને ઝેટા વચ્ચે એક અનોખો અને ગાઢ સંબંધ બની જાય છે, કારણ કે ફ્રાન્સિસ તે છોકરાને દુશ્મન તાકાતો અને લેબના એજન્ટોથી બચાવવાનો પ્રયાસ કરે છે, જેઓ તેનો પીછો કરી રહ્યા હોય છે.
1,000 વર્ષ પહેલાં અલગ-અલગ કબીલાઓ ધરાવતા 5 ટાપુઓના સમૂહને બહારની તાકાતો અને કબીલાઓ વચ્ચેના ઝઘડા જેવા અનેક જોખમોનો સામનો કરવો પડે છે. કંગુવા પેરુમાચી કબીલાનો એક બહાદુર યોદ્ધા રાજકુમાર છે, જે પોતાના લોકોને બચાવવા અને એક નાના છોકરાને આપેલું મહત્વનું વચન પૂરું કરવા માટે લડે છે. ધીમે-ધીમે ફ્રાન્સિસને સમજાય છે કે ઝેટાને બચાવવાની તેની પ્રબળ લાગણી અને તેની સાથેનું જોડાણ અધૂરા વચન સાથે જોડાયેલું છે. આ જોડાણ 950 વર્ષ પહેલાં કંગુવા તરીકે જીવેલી તેની પાછલી જિંદગી સાથે પણ સંકળાયેલું છે.
2 વર્ષ જૂની ફિલ્મનું OTT પર ચમક્યું નસીબ
હાલ કંગુવા જિયો હોટસ્ટાર પર ટ્રેન્ડ કરી રહી છે. ટોપ 10માં આ ફિલ્મ 5મા નંબર પર છે. 155 મિનિટની આ ફિલ્મ 14 નવેમ્બર 2024ના રોજ રિલીઝ થઈ હતી. તેમાં સૂર્યા, બોબી દેઓલ અને દિશા પટણી મુખ્ય ભૂમિકામાં જોવા મળ્યા હતા.
આ પણ વાંચો-TMKOC : શૂટિંગ વિના સૂમસામ લાગે છે ગોકુલધામ સોસાયટી! બબીતાજીએ બતાવી ખાલી સેટની ઝલક!
