બોલિવૂડના કિંગ ખાન શાહરૂખ ખાને ગઈ કાલે 2 નવેમ્બરે પોતાના 59માં જન્મદિવસની ઉજવણી કરી. કિંગ ખાનનો જન્મદિવસ તેના ફેન્સ માટે કોઈ સેલિબ્રેશનથી ઓછો નથી. શાહરૂખના કરોડો ફેન્સ તેના જન્મદિવસ પર તેની એક ઝલક મેળવવા માટે મન્નતની બહાર ઉભા રહેતા હોય છે.
શાહરૂખના નિર્ણયથી ફેન્સમાં ખુશી
જોકે આ વખતે સુરક્ષાના કારણોસર મન્નતની બહાર ફેન્સનો કોઈ જમાવડો જોવા મળ્યો ન હતો. શાહરૂખ ખાન એક ઈવેન્ટમાં પોતાના તમામ ફેન્સને મળ્યો હતો અને આ ઈવેન્ટમાં અભિનેતાએ મોટી જાહેરાત કરતા કહ્યું હતું કે તેમણે ધૂમ્રપાન છોડી દીધું છે. કિંગખાનના આ નિર્ણયથી તેમના કરોડો ફેન્સને એક પ્રેરણા મળશે.
શાહરૂખ ખાને ફેન્સના આપ્યા 'ગુડ ન્યૂઝ'
શાહરૂખ ખાનના ફેન પેજ પર કિંગ ખાનનો એક વીડિયો શેર કરવામાં આવ્યો છે. જે વીડિયોમાં શાહરૂખ ખાન તેના ફેન્સને કહેતો જોવા મળી રહ્યો છે કે તેણે સિગારેટ પીવાનું બંધ કરી દીધું છે. શાહરૂખની જે વીડિયો ક્લિપ સામે આવી છે તેમાં શાહરૂખ ખાન કહે છે, "બીજી સારી વાત એ છે કે, હું હવે ધૂમ્રપાન કરતો નથી." શાહરૂખની આ જાહેરાત બાદ ફેન્સ ખુબ જ ખુશ જોવા મળી રહ્યા છે.
ધૂમ્રપાન છોડ્યા પછી પણ શ્વાસ લેવામાં તકલીફ
શાહરૂખ ખાને કહ્યું કે તેણે વિચાર્યું હતું કે ધૂમ્રપાન છોડ્યા પછી તેને શ્વાસ લેવામાં તકલીફ નહીં પડે, પણ તેને હજુ શ્વાસ લેવામાં તકલીફ થઈ રહી છે. વધુમાં અભિનેતાએ કહ્યું કે "ઈન્શાઅલ્લાહ આ પણ સારું થઈ જશે." તમને જણાવી દઈએ કે, શાહરૂખ ખાને 2011માં એક ઈન્ટરવ્યુમાં કહ્યું હતું કે તે એક દિવસમાં 100 સિગારેટ પીતો હતો. તેણે કહ્યું હતું કે તે ખાવાનું ભૂલી જતો હતો અને પાણી પણ પીતો નહોતો.
આગામી આ ફિલ્મમાં જોવા મળશે શાહરૂખ ખાન
શાહરૂખ ખાનના વર્ક ફ્રન્ટની વાત કરીએ તો તે તેની આગામી ફિલ્મ કિંગ પર કામ કરી રહ્યો છે. શાહરૂખની કિંગ એક એક્શન થ્રિલર ફિલ્મ હશે. ફિલ્મમાં સુહાના ખાન અને અભિષેક બચ્ચન પણ જોવા મળશે. આ ફિલ્મનું નિર્દેશન સુજોય ઘોષ કરી રહ્યા છે.
