જો તમે નામ લેશો તો તમને છોડશું નહીં. ભારત માત્ર આટલું જ કહેતું નથી પણ તે કરીને બતાવે છે અને તેનો એક નવો પુરાવો બધાની સામે છે. જમ્મુ-કાશ્મીરના પહલગામમાં થયેલા આતંકવાદી હુમલાનો ભારતે જે રીતે બદલો લીધો છે તેના વખાણ દરેક લોકો કરી રહ્યા છે.
દેશના દરેક નાગરિકને ભારતીય સેના પર ગર્વ છે. ભારતે પાકિસ્તાન અને પીઓકેમાં 9 ટાર્ગેટ પર હુમલો કર્યો અને 100 થી વધુ આતંકવાદીઓને ઠાર કર્યા. બોલીવુડ ફિલ્મોમાં ભારત અને પાકિસ્તાન વચ્ચેના તણાવ અને યુદ્ધને ઘણીવાર બતાવવામાં આવે છે. પરંતુ બે ફિલ્મો છે જ્યાં હીરો નહીં પણ હિરોઈનોએ પાકિસ્તાનમાં ઘૂસીને દુશ્મનોને ઠાર કર્યા છે.
જોકે સની દેઓલ, અક્ષય કુમાર અને વિકી કૌશલ સહિત ઘણા સ્ટાર્સે દેશભક્તિ આધારિત ફિલ્મો બનાવી છે. પરંતુ આ દેશભક્તિની ફિલ્મોમાં મહિલા અભિનેત્રીઓને હીરો બનવાના ઓછી તકો મળે છે. પરંતુ જેમને આ તક મળી, તેમણે પ્રેક્ષકોને ખુરશીઓ છોડીને તાળીઓ પાડવા માટે મજબૂર કરી દીધા. આ બે હિરોઈન અન્ય કોઈ નહીં પણ આલિયા ભટ્ટ અને પ્રીતિ ઝિન્ટા છે.
આલિયા ભટ્ટ - ફિલ્મ રાઝી
વર્ષ 2018માં રિલીઝ થયેલી ફિલ્મ રાઝીમાં આલિયા ભટ્ટએ પોતાના કામથી સાબિત કરી દીધું હતું કે તે બોલીવુડની મોટી અભિનેત્રી બનવા જઈ રહી છે. રિયલ લાઈફ સ્ટોરી પર આધારિત આ ફિલ્મમાં આલિયા ભટ્ટે પાકિસ્તાનમાં ઘૂસીને દુશ્મનોને સ્તબ્ધ કર્યા હતા. આ કામ માટે તેણે પોતાના બધા પરિવાર અને પ્રેમનું બલિદાન આપ્યું હતું. આલિયા પર દેશભક્તિના રંગો ખૂબ જ સુંદર લાગતા હતા. ફિલ્મની વાર્તા વર્ષ 1971ની છે જ્યારે ભારત અને પાકિસ્તાન વચ્ચે ચાલી રહેલા યુદ્ધ દરમિયાન ભારત વિરુદ્ધ કાવતરું ઘડનારાઓને શોધવા માટે, સેહમત પાકિસ્તાની આર્મી પરિવાર સાથે લગ્ન કરે છે. નિર્માતાઓએ આ ફિલ્મ બનાવવા માટે રૂ. 35 કરોડનો ખર્ચ કર્યો હતો અને આ ફિલ્મનું બોક્સ ઓફિસ કલેક્શન લગભગ રૂ. 195.75 કરોડ હતું. બધાએ આલિયાના કામના વખાણ કર્યા હતા.
પ્રીતિ ઝિન્ટા - ધ હીરોઃ લવ સ્ટોરી ઓફ અ સ્પાય
આલિયા ભટ્ટ સિવાય પ્રીતિ ઝિન્ટાએ પણ પાકિસ્તાની દુશ્મનોને પાઠ ભણાવવાનું કામ કર્યું હતું. ધ હીરોઃ લવ સ્ટોરી ઓફ અ સ્પાય એક જાસૂસ ફિલ્મ છે. આ ફિલ્મને અનિલ શર્માએ ડિરેક્ટ કરી હતી. આ ફિલ્મમાં પ્રીતિ સિવાય સની દેઓલ અને પ્રિયંકા ચોપરા લીડ રોલમાં હતા. સની દેઓલ પ્રીતિ ઝિન્ટાને દુશ્મનોના કાવતરાં શોધવાની તાલીમ આપે છે અને તેને સરહદ પારના આતંકવાદ વિશે ખાનગી માહિતી એકત્ર કરવા મોકલે છે. આ ફિલ્મમાં પ્રીતિએ શાનદાર કામ કર્યું હતું. આ ફિલ્મ ભલે કમાણીના મામલામાં કંઈ ખાસ કમાલ ન કરી શકી હોય, પરંતુ લોકો આ ફિલ્મને જોવાનું પસંદ કરે છે.
