ભુજ તાલુકામાં ફરી એકવાર બોરવેલની ઘટનાએ હાહાકાર મચાવ્યો છે. ભુજના કુકમા ગામે એક ખેતરના વાડી વિસ્તારમાં ખુલ્લા બોરવેલમાં પડી ગયેલા 18 વર્ષીય યુવકને બચાવવાના તમામ પ્રયાસો નિષ્ફળ રહ્યા હતા. આ યુવક ઝારખંડનો રહેવાસી હતો અને લગભગ 150 ફૂટ ઊંડાઈએ ફસાયો હતો.
9 કલાકનું લાંબુ રેસ્ક્યૂ ઓપરેશન
આ યુવકને બહાર કાઢવા માટે ફાયર વિભાગ, પોલીસ, આર્મી, તેમજ સ્થાનિક લોકો દ્વારા તાત્કાલિક દિલધડક રેસ્ક્યૂ ઓપરેશન શરૂ કરવામાં આવ્યું હતું. જોકે, ૯ કલાકની અથાગ જહેમત બાદ પણ યુવકને જીવિત બહાર કાઢી શકાયો નહોતો. વહેલી સવારે ૪ વાગ્યે બોરવેલમાંથી તેનો મૃતદેહ બહાર કાઢવામાં આવ્યો હતો. યુવક જિંદગીની જંગ હારી ગયો હતો, જેને કારણે તેના પરિવાર અને સ્થાનિકોમાં શોકની લાગણી પ્રસરી ગઈ છે. મૃતદેહને પોસ્ટમોર્ટમ માટે હોસ્પિટલ ખસેડીને પોલીસે વધુ તપાસ હાથ ધરી છે.
