- મોદીનો જાદુ છવાયો : સત્તાની સેમિફાઇનલમાં કોંગ્રેસની 3-1થી કારમી હાર
- ત્રણ રાજ્યોની જીત સબ કા સાથ, સબ કા વિકાસની જીત : મોદી
- નારીશક્તિ, યુવા શક્તિ, કિસાન અને ગરીબો એ જ મારો પરિવાર છે
મધ્યપ્રદેશ, રાજસ્થાન અને છત્તીસગઢની વિધાનસભા ચૂંટણીઓમાં ભાજપે વિજય પતાકા લહેરાવી. મધ્યપ્રદેશમાં તેણે સત્તા જાળવી જ્યારે રાજસ્થાન અને છત્તીસગઢમાં કોંગ્રેસનાં સૂપડાં સાફ કરતા તેની પાસેથી સત્તા છીનવી હતી. પીએમ મોદી તેમજ ભાજપનાં અશ્વમેધ યજ્ઞનાં વિજયી અશ્વને રોકવામાં કોંગ્રેસ સહિત તમામ વિપક્ષો નબળા પડયા. મતદારો પર પીએમ મોદીની ગેરંટી તેમજ મોદીનાં ચહેરાનો જાદુ છવાયો હતો. મોદી હૈ તો મુમકિન હૈની ઉક્તિમાં લોકોએ ભરપૂર વિશ્વાસ મૂકીને ભાજપને ખોબલે ખોબલે મત આપ્યા. ભાજપે રાજસ્થાનમાં સૌપ્રથમ વખત ધારાસભ્ય ચૂંટાયેલા ભજનલાલ શર્માને, મધ્યપ્રદેશમાં મોહન યાદવને જ્યારે છત્તીસગઢમાં વિષ્ણુદેવ સાયને મુખ્યમંત્રી બનાવ્યા. સત્તાની સેમિફાઇનલમાં કોંગ્રેસની 3-1થી કારમી હાર થઈ. કોંગ્રેસે સમ ખાવા પૂરતી તેલંગાણામાં જીત મેળવી. આ ચૂંટણીમાં પીએમ મોદીનાં નેતૃત્વ, ભાજપનાં ચાણક્ય ગણાતા અમિત શાહનો ચૂંટણી વ્યૂહ તેમજ સરકારની ગરીબો તેમજ ખેડૂતો, મહિલાઓ અને યુવાનોલક્ષી કલ્યાણ યોજનાઓએ ભાજપ માટે જીતની કેડી કંડારી. ત્રણ રાજ્યોમાં લહેરાતી વિજય પતાકાએ 2024ની લોકસભા ચૂંટણીમાં ભાજપ માટે જીતનો માર્ગ ખુલ્લો કર્યો છે.
મધ્યપ્રદેશમાં લાડલી બહેના સ્કીમનો જાદુ પથરાયો હતો અને મહિલાઓએ મોટી સંખ્યામાં ભાજપનાં ઉમેદવારો પર મતની હેલી વરસાવી હતી. રાજસ્થાનમાં લોકોએ ફરી એકવાર સત્તા પરિવર્તનની પરંપરા જાળવી કોંગ્રેસને વિપક્ષમાં બેસવાનો જનાદેશ આપી ભાજપને સત્તા સોંપવાનું પસંદ કર્યું હતું. છત્તીસગઢમાં કોંગ્રેસ સત્તા પર હતી પણ મોદીએ ઝંઝાવાતી પ્રચાર કરીને અનેક રેલીઓ-સભાઓ સંબોધી હતી. મતદારોએ અહીં વિકાસને વરેલી ડબલ એન્જિન સરકારને સત્તા સોંપવા મન બનાવ્યું. ભાજપે આ ચૂંટણીઓમાં કેન્દ્રીય પ્રધાનો, સાંસદોને ચૂંટણી લડાવવાનો કીમિયો અજમાવ્યો હતો. જે સફળ રહ્યો.
