આજે છે ગ્લોબલ સુપરસ્ટાર… પરંતુ ક્યારેક કેનેડામાં ટોઇલેટ સાફ કરતો હતો આ સિંગર, પોતે જ કર્યો ખુલાસો!
સિંગર અને એક્ટર ગિપ્પી ગ્રેવાલની ફિલ્મ કેરી ઓન જટ્ટા 4 ટૂંક સમયમાં જ રિલીઝ થવાની છે. આ દરમિયાન એક્ટર ભારતી સિંહ અને હર્ષ લિમ્બાચીયાના પોડકાસ્ટમાં જોવા મળ્યા છે, જેમાં તેમણે પોતાના સંઘર્ષના દિવસોને યાદ કર્યા છે અને જણાવ્યું છે કે પહેલું આલ્બમ હિટ થયા પછી પણ તેમણે કેનેડામાં ઘણો સંઘર્ષ કર્યો હતો. ગિપ્પી ગ્રેવાલે જણાવ્યું કે, ભલે તેનું પહેલું આલ્બમ હિટ રહ્યું હતું, પરંતુ તેમ છતાં ગુજરાન ચલાવવા માટે તે અને તેની પત્ની કેનેડામાં ઘણા નાના-નાના કામો કરતા હતા. જેમાં ન્યૂઝપેપર વહેંચવાથી લઈને મોલમાં ટોયલેટ સાફ કરવા સુધીના કામો સામેલ હતા.
ભારતી સિંહ અને હર્ષ લિમ્બાચીયાના પોડકાસ્ટમાં ગિપ્પી ગ્રેવાલે પોતાના સંઘર્ષને યાદ કર્યો છે. તેણે જણાવ્યું કે તેનું બીજું આલ્બમ આવ્યું ત્યાં સુધી તેણે કેટલી મહેનત કરી હતી. સિંગર કહે છે કે એક દિવસમાં હું 3-4 નોકરીઓ કરતો હતો. ગિપ્પી જણાવે છે- સવારે 4 વાગ્યે ઊઠીને હું અને મારી પત્ની ન્યૂઝપેપર વહેંચવા જતા હતા.
2 કલાક આ કામ કર્યા પછી હું આવીને સૂઈ જતો હતો અને મારી પત્ની પોતાના કામે ચાલી જતી હતી. મારી પત્ની સવારે 6 વાગ્યે સબવેમાં કામ કરવા જતી હતી અને સાંજે 4 વાગ્યા સુધી ત્યાં કામ કરતી હતી. આ પછી તે સિક્યોરિટી ગાર્ડની નોકરી પણ કરતી હતી. બાદમાં તેણે તે કામ છોડી દીધું અને અમે એક મોલની સફાઈનો કોન્ટ્રાક્ટ લઈ લીધો.
તેણે આગળ કહ્યું, કેનેડામાં આ બધી બિલકુલ સામાન્ય નોકરીઓ છે. ત્યાં લોકો આ કામોને અલગ નજરે નથી જોતા. ન્યૂઝપેપર વહેંચતી વખતે હું અને મારી પત્ની આને સાથે વિતાવેલો સમય માનતા હતા. અમે કામ કરતાં-કરતાં વાતો કરતા રહેતા હતા અને બે કલાકમાં કામ પૂરું થઈ જતું હતું. જો કે મોલની સફાઈવાળા કામને સમય મર્યાદામાં પૂરું કરવું પડતું હતું, જ્યારે સિક્યોરિટીની નોકરીમાં વધુ કલાકો આપવા પડતા હતા. ગિપ્પીએ જણાવ્યું કે બીજી નોકરીઓમાં તેમને 8 ડોલર મળતા હતા, પરંતુ મોલની સફાઈના કામથી આશરે 13 ડોલરની કમાણી થઈ જતી હતી.
ગિપ્પીની ફિલ્મ કેરી ઓન જટ્ટા 4 ટૂંક સમયમાં જ રિલીઝ થવાની છે. આ ફિલ્મ 26 જૂનના રોજ સિનેમાઘરોમાં દસ્તક દેશે. ફિલ્મમાં ગિપ્પીની સાથે જેસ્મીન બાજવા, જસવિન્દર ભલ્લા, બિનૂ ઢિલ્લોન, કરમજીત અનમોલ જેવા ઘણા કલાકારો જોવા મળવાના છે.