નવા વર્ષે સોનાક્ષી સિંહા પર ચઢ્યો પ્રેમનો રંગ, પતિ ઝહીર સાથે શેર કરી રોમેન્ટિક સેલ્ફી
દિગ્ગજ અભિનેતા શત્રુઘ્ન સિંહાની પુત્રી અને અભિનેત્રી સોનાક્ષી સિંહાએ પતિ ઝહીર સાથે માલદીવમાં વેકેશનની મજા માણી છે. બંનેએ ત્યાંથી ન્યુ યર સેલિબ્રેશનની કેટલીક તસવીરો પણ શેર કરી છે, જેમાં બંને ખૂબ જ રોમેન્ટિક અંદાજમાં જોવા મળી રહ્યા છે.
દર વર્ષની જેમ આ વર્ષે પણ નવા વર્ષની ઉજવણી માટે બોલીવુડ સિતારાઓ અલગ-અલગ દેશોમાં પહોંચ્યા છે. સોનાક્ષી સિંહા પણ પતિ ઝહીર ઈકબાલ સાથે વેકેશન પર નીકળી ગઈ છે. સોનાક્ષીએ ન્યુ યર વેકેશન માટે માલદીવની પસંદગી કરી છે. તેણે ત્યાંથી ઝહીર સાથેની ઘણી તસવીરો ફેન્સ સાથે શેર કરી છે.
સોનાક્ષીએ વર્ષ 2025ની છેલ્લી રાત એટલે કે 31 ડિસેમ્બરની રાત્રે ખૂબ મસ્તી કરી હતી. તેણે રોમેન્ટિક અંદાજમાં પતિ સાથે નવા વર્ષનું સ્વાગત કર્યું. આ સિવાય બંને એકબીજા સાથે ક્વોલિટી ટાઈમ પસાર કરતા અને મજા કરતા જોવા મળ્યા હતા.
માલદીવના બીચ પરથી સોનાક્ષી સિંહાએ પતિ ઝહીર સાથે એક સેલ્ફી પણ શેર કરી છે. તસવીરમાં અભિનેત્રી ખૂબ જ ખુશ દેખાઈ રહી છે. ઘૂંઘરાળા વાળમાં સોનાક્ષીનો લુક પણ ઘણો સુંદર લાગી રહ્યો છે. સોનાક્ષીએ પોસ્ટ શેર કરતા એક મજેદાર કેપ્શન પણ લખ્યું છે. તે લખે છે, હેલો 2026! છેલ્લે સુધી સ્ક્રોલ કરો અને જુઓ કે ન્યુ યર ઈવની પાર્ટીમાં સૌથી વધુ એન્જોય કોણે કર્યું છે.
સોનાક્ષી સિંહા અને ઝહીરની આ તસવીરો પર ફેન્સ ઘણો પ્રેમ વરસાવી રહ્યા છે. એક યુઝરે લખ્યું, આ જોડીનો મને ખૂબ ગમે છે. તો બીજાએ લખ્યું, તમે બંને સાથે ખૂબ જ શાનદાર લાગો છો.
સોનાક્ષી સિંહા અને ઝહીર ઈકબાલે જ્યારથી લગ્ન કર્યા છે, ત્યારથી આ કપલ અવારનવાર વેકેશન પર જ જોવા મળે છે. બંને ક્યાંક ને ક્યાંક ફરતા રહે છે અને ફેન્સ સાથે પોતાની ટ્રિપની અપડેટ્સ શેર કરવાનું ભૂલતા નથી. ઉલ્લેખનીય છે કે, સોનાક્ષી અને ઝહીરે ઘણા વર્ષો સુધી એકબીજાને ડેટ કર્યા બાદ 23 જૂન 2024ના રોજ મુંબઈમાં કોર્ટ મેરેજ કર્યા હતા.