અમદાવાદના ભાડજ હરેકૃષ્ણ મંદિરે ચૈતન્ય મહાપ્રભુની 540મી જન્મજયંતિની ભવ્ય ઉજવણી
ગૌર પૂર્ણિમાનો ઉત્સવ વૈષ્ણવ સંપ્રદાય માટે નવા વર્ષના પ્રારંભ સમાન છે. ચૈતન્ય મહાપ્રભુ, જેઓ પોતાના સુવર્ણ વર્ણને કારણે 'ગૌરાંગ' તરીકે ઓળખાય છે, તેમના 540મા જન્મોત્સવ નિમિત્તે મંદિરમાં વિવિધ ધાર્મિક કાર્યક્રમોનું આયોજન થયું હતું. ભગવાન કૃષ્ણએ પોતે એક ભક્તના રૂપમાં અવતરણ ધારણ કરી જગતને હરિનામ સંકીર્તન અને ભક્તિનો સાચો માર્ગ બતાવ્યો હતો, જેની યાદમાં આ ઉત્સવ ઉજવાય છે. દિવસભર ચાલેલા જાપ, ભવ્ય અભિષેક અને મહાપ્રસાદના વિતરણમાં મોટી સંખ્યામાં ભક્તો જોડાયા હતા.
ઉત્સવનો શુભારંભ: 3 માર્ચ, 2026 મંગળવારના રોજ સવારથી જ મંદિરમાં ભક્તોનું આગમન શરૂ થઈ ગયું હતું. ગૌર પૂર્ણિમા નિમિત્તે મંદિરને વિશેષ રીતે શણગારવામાં આવ્યું હતું.
ચૈતન્ય મહાપ્રભુનું સ્વરૂપ: ચૈતન્ય મહાપ્રભુએ રાધારાણીના મનોભાવ ધારણ કરી ભક્ત રૂપે અવતાર લીધો હતો, જેથી તેઓ જીવમાત્રને કૃષ્ણ પ્રેમની રીત શીખવી શકે.
નવા વર્ષની શરૂઆત: ગૌડીય વૈષ્ણવો માટે આ દિવસ નવા વર્ષનું પ્રતીક છે. આ દિવસે ભક્તો રાત્રે ચંદ્રદર્શન સુધી ઉપવાસ રાખીને સાધના કરે છે.
અખંડ હરિનામ સંકીર્તન: સમગ્ર દિવસ દરમિયાન હરેકૃષ્ણ મહામંત્રના ગુંજારવથી વાતાવરણ ગુંજી ઉઠ્યું હતું. ભક્તોએ સામૂહિક સંકીર્તનમાં જોડાઈને નૃત્ય અને ભક્તિનો આનંદ લીધો હતો.
રાજભોગ અર્પણ: બપોરના સમયે ભગવાનને 108 પ્રકારની વિવિધ વાનગીઓનો રાજભોગ ધરાવવામાં આવ્યો હતો. ત્યારબાદ વિશેષ આરતી કરવામાં આવી હતી.
પાલકી વિહાર: નિતાઈ ગૌરાંગની મૂર્તિઓને ફૂલોથી સજ્જ પાલકીમાં બિરાજમાન કરી મંદિર પરિસરમાં ભ્રમણ કરાવવામાં આવ્યું હતું.
વાદ્યયંત્રોનો નાદ: પાલકી યાત્રા દરમિયાન ઢોલ, નગારા અને કરતાલના તાલે ભક્તોએ ભગવાનના ગુણગાન ગાયા હતા, જેનાથી વાતાવરણમાં દિવ્યતા ફેલાઈ હતી.
ભવ્ય મહાભિષેક: ભગવાનનો પંચામૃત અભિષેક કરવામાં આવ્યો હતો, જેમાં દૂધ, દહીં, ઘી, મધ અને ગોળના પાણીનો ઉપયોગ કરવામાં આવ્યો હતો.
પવિત્ર જળનો ઉપયોગ: સાત પવિત્ર નદીઓમાંથી લાવવામાં આવેલા જળ ભરેલા 108 કળશ દ્વારા ભગવાનને સ્નાન કરાવવામાં આવ્યું હતું.
વિવિધ ફળોના રસ: પંચામૃત ઉપરાંત તાજા ફળોના રસથી પણ ભગવાનનો અભિષેક કરવામાં આવ્યો હતો, જે દ્રશ્ય અત્યંત મનોહર હતું.
પુષ્પ હોળીનો આનંદ: અભિષેક બાદ ભગવાન પર અર્પણ કરાયેલા પુષ્પોની વર્ષા ભક્તો પર કરવામાં આવી હતી. ભક્તોએ ઉત્સાહપૂર્વક પુષ્પ હોળી રમી હતી.
વિશ્વ કલ્યાણની પ્રાર્થના: ઉત્સવના અંતે મહાઆરતી યોજાઈ હતી, જેમાં ભક્તોએ વિશ્વમાં શાંતિ અને સૌના કલ્યાણ માટે ભગવાન ગૌરાંગ સમક્ષ પ્રાર્થના કરી હતી.