રોટરી ક્લબ દ્વારા કિચન ગાર્ડનિંગ અને કોમ્પોસ્ટિંગ સત્રનું આયોજન, રસોડાના કચરામાંથી ખાતર બનાવવાનું અપાયું માર્ગદર્શન
ભાવનગરની રોટરી ક્લબ ઓફ ભાવનગર વાયબ્રન્ટ દ્વારા પર્યાવરણ અને સ્વાસ્થ્યની જાળવણી માટે એક પ્રશંસનીય પહેલ કરવામાં આવી છે. 29મી ડિસેમ્બરના રોજ ક્લબ દ્વારા 'કિચન ગાર્ડનિંગ અને હોમ કોમ્પોસ્ટિંગ' વિષય પર એક સત્રનું સુંદર આયોજન કરવામાં આવ્યું હતું.
આજની આધુનિક અને દોડધામભરી જીવનશૈલીમાં ઓર્ગેનિક ખેતી અને પર્યાવરણનું મહત્વ સમજાવવા માટે રોટરી ક્લબ ઓફ ભાવનગર વાયબ્રન્ટ દ્વારા એક વિશેષ સત્રનું આયોજન કરવામાં આવ્યું હતું. આ સત્રમાં નિષ્ણાતોએ રસોડાના કચરાનું વ્યવસ્થાપન અને ઘરે બેઠા તાજા શાકભાજી ઉગાડવાની કળા શીખવી હતી.
આ સત્રમાં મુખ્ય વક્તા તરીકે ઉપસ્થિત પેથોલોજિસ્ટ ડૉ. આમી ત્રિવેદીએ ખૂબ જ સરળ શૈલીમાં ઘરના કચરાનો નિકાલ કરવાની પદ્ધતિ સમજાવી હતી. તેમણે જણાવ્યું હતું કે, રસોડામાંથી નીકળતો ભીનો કચરો અને ઘરઆંગણે એકઠા થતા સૂકા પાંદડા ફેંકી દેવાને બદલે તેનો ઉપયોગ કરીને ઉત્તમ પ્રકારનું ઓર્ગેનિક ખાતર (કોમ્પોસ્ટ) બનાવી શકાય છે.
કાર્યક્રમમાં જાણીતા સર્જન ડૉ. ભરતભાઈ પટેલ પણ ખાસ ઉપસ્થિત રહ્યા હતા. તેમણે ઘરઆંગણે ઉગાડી શકાય તેવા ઔષધીય છોડના મહત્વ પર પ્રકાશ પાડ્યો હતો. આ ઉપરાંત, તેમણે 'માઇક્રોગ્રીન્સ' કેવી રીતે ઉગાડવા અને તેનાથી સ્વાસ્થ્યમાં થતા અદભૂત ફાયદાઓ વિશે વિસ્તૃત માર્ગદર્શન આપ્યું હતું.
આ માહિતીપ્રદ સત્રમાં ક્લબના પ્રેસિડેન્ટ નમ્રિતા ચઢા, સેક્રેટરી સુનિતા શાહ અને પ્રોજેક્ટ ચેર તેજલ વ્યાસ સહિત આશરે 25 સભ્યોએ હાજરી આપી હતી. સમગ્ર કાર્યક્રમનું સંચાલન અને આયોજન સુચારૂ રીતે કરવામાં આવ્યું હતું.