- ગુજરાતમાં દરેક ખૂણે વરસ્યો મેઘો
- સુરેન્દ્રનગરમાં નોંધાયો સૌથી વધુ વરસાદ
- ચૂડામાં સૌથી વધુ પોણા ચાર ઈંચ
ગુજરાતમાં આજે કમોસમી માવઠાની આગાહી હતી. જેના અનુસાર આજે રાજ્યમાં સાર્વત્રિક વરસાદ ખાબક્યો હતો. વહેલી સવારથી જ ચોમાસા જેવો માહોલ જોવા મળ્યો હતો. શિયાળામાં વરસાદ ખાબકતાં જો કે રોગચાળો વધે તેવી સંભાવનાઓ મેડિકલ એક્સપર્ટ્સ દ્વારા વ્યક્ત કરવામાં આવી છે. આ ઉપરાંત રાજ્યમાં મોટા પાયે કરા અને ગાજવીજ સાથે વરસાદ પડતા ખેતરોમાં ઉભેલા પાકનો પણ સોથ વળી ગયો હતો. તેમજ રાજ્યમાં ઘણી જગ્યાએ વીજળી પડતા લોકો પ્રભાવિત થયા હતા. 6થી વધુ લોકોના મોત અને 12થી વધુ લોકો ઘાયલ થયા હતા.
હવામાન વિભાગની આગાહી અનુસાર આજે વહેલી સવારથી ગુજરાતના વાતાવરણમાં પલટો જોવા મળી રહ્યો છે. સૌરાષ્ટ્ર, ઉત્તર ગુજરાત અને દક્ષિણ ગુજરાતમાં ભરશિયાળે અષાઢી માહોલ છવાયો હોય તેવા દ્રશ્યો સર્જાયા છે. આજે સાંજે 6 વાગ્યા સુધીમાં રાજ્યના 229 તાલુકામાં હળવોથી ભારે વરસાદ નોંધાયો છે. જે પૈકી સુરેન્દ્રનગર જિલ્લાના ચુડામાં સૌથી વધુ પોણા 4 ઈંચ વરસાદ ખાબક્યો છે.
ગાંધીનગર સ્થિત સ્ટેટ ઈમરજન્સી સેન્ટર દ્વારા રજૂ કરવામાં આવેલા આંકડા અનુસાર, આજે સાંજે 6 વાગ્યા સુધીમાં રાજ્યના 43 તાલુકામાં 1 ઈંચ કે તેથી વધુ વરસાદ નોંધાયો છે. જે પૈકી સૌથી વધુ પોણા 3 ઈંચ વરસાદ સુરેન્દ્રનગર જિલ્લાના ચૂડામાં નોંધાયો છે. આ સિવાય સુરત શહેરમાં સવા 3 ઈંચ તેમજ બનાસકાંઠાના ભાભર અને પાટણ જિલ્લાના રાધનપુરમાં અઢી ઈંચની આસપાસ વરસાદ વરસ્યો છે. જ્યારે પાટણ જિલ્લાના સાંતલપુર અને ભરૂચ જિલ્લાના અંકલેશ્વરમાં સવા 2 ઈંચ વરસાદ વરસ્યો છે.
જો સાંજે 4 થી 6 વાગ્યા સુધીના આંકડા પર નજર નાંખીએ તો, આ બે કલાકના સમયગાળા દરમિયાન કુલ 98 તાલુકામાં વરસાદ નોંધાયો છે. જે પૈકી સુરેન્દ્રનગર જિલ્લાના ચુડામાં સૌથી વધુ 2.7 ઈંચ વરસાદ વરસ્યો છે. આ સિવાય સુરતમાં 1.8 ઈંચ અને અમરેલી જિલ્લામાં દોઢ ઈંચ વરસાદ વરસ્યો છે.
