રાજ્યની જીએસટીની આવકમાં ગત વર્ષ કરતાં 21 ટકાનો વધારો

• પ્રથમ છ માસમાં જીએસટી હેઠળ 18 ટકા વધુ આવક
  
  
  
• સપ્ટે.-2023માં રૂ.5,133 કરોડની આવક નોંધાઈ
• ગત વર્ષના સપ્ટેમ્બર માસની આવક રૂ.4,248 કરોડ કરતા 21 ટકા વધુ

આ વર્ષે સપ્ટેમ્બર માસમાં રાજ્યને મળેલી જીએસટીની આવકમાં ગત વર્ષના સપ્ટેમ્બર કરતા 21 ટકાનો વધારો જોવા મળ્યો છે. ગુજરાત રાજ્યને જીએસટી હેઠળ સપ્ટેમ્બર-2023 દરમિયાન રૂ.5,133 કરોડની આવક થઈ છે. જે ગત વર્ષના સપ્ટેમ્બર માસની આવક રૂ.4,248 કરોડ કરતા 21 ટકા વધુ છે.

નાણાકીય વર્ષ 2023-24ના પ્રથમ છ માસમાં રાજ્યને જીએસટી હેઠળ કુલ રૂ.40,126 કરોડની આવક થયેલ છે. જે ગત વર્ષના સમાન સમયગાળામાં થયેલી આવક કરતા રૂ.6,128 કરોડ એટલે કે 18 ટકા વધુ છે. સપ્ટેમ્બર-2023 દરમિયાન રાજ્યને વેટ હેઠળ રૂ.2,792 કરોડની આવક થયેલ છે.

આમ રાજ્યને સપ્ટેમ્બર-2023ના માસ દરમિયાન જીએસટી અને વેટ હેઠળ કુલ રૂ.7,925 કરોડની આવક થયેલ છે. ચાલુ નાણાકીય વર્ષમાં સપ્ટેમ્બર માસ સુધીમાં રાજ્યને જીએસટી અને વેટ હેઠળ કુલ રૂ.57,000 કરોડની આવક થયેલ છે. જે રાજ્ય કર વિભાગને ફાળવવામાં આવેલ લક્ષ્યાંકના 54 ટકા છે. ચાલુ માસની આવક રૂ.5,133 કરોડમાંથી રાજ્યને અગાઉના સમયમાં આઈજીએસટી પેટે વધુ મળેલ રૂ.896 કરોડ કેન્દ્ર સરકાર દ્વારા સરભર કરવામાં આવેલ છે.