ગાંધીનગરના દહેગામમાં પણ વાતાવરણમાં અચાનક પલટો આવ્યો છે અને વરસાદ પણ વરસ્યો છે. ત્યારે આ ભારે પવનના કારણે શ્રીનાથ બંગલો પાસે કાર પર ઝાડ ધરાશાયી થયું છે. જો કે ઝાડ ધરાશાયી થવાની ઘટનામાં કોઈપણ પ્રકારની જાનહાનિ થઈ નથી અને દહેગામના દંપતીનો આબાદ બચાવ થયો છે. દહેગામના શ્રીનાથ બંગલો પાસે વાવાઝોડા દરમિયાન એક કારમાં સવાર દંપતી પર ઝાડ ધરાશાયી થયું હતું. જેમાં શાહ દંપતીનો આબાદ બચાવ થયો છે. હાલમાં ફાયર બ્રિગેડ દ્વારા ઝાડ હટાવવાની કામગીરી ચાલુ કરવામાં આવી છે.
વડોદરાના શિનોરમાં પવનથી પતરાનો શેર ઉડ્યો
બીજી તરફ વડોદરાના શિનોરમાં ભારે પવનથી 100 ફૂટ લંબાઈનો પતરાનો શેડ ઉડી ગયો છે. સાધલીમાં પતરાનો શેડ ઉડી રોડ પર પડ્યો છે. સાધલી વડોદરા માર્ગ પર વીજ પોલ ધરાશાયી થયો છે, વીજપોલ ધરાશાયી થતાં જ વિસ્તારમાં વીજ પુરવઠો ખોરવાયો છે. ઉલ્લેખનીય છે કે અત્યારે શિનોર પંથકમાં ધીમીધારે વરસાદ ચાલુ છે. શહેરના સોમા તળાવ સર્કલ પાસે ભારે પવનથી રેલિંગ ધરાશાયી થઈ છે. ક્રોસ લેન્ડ કોમ્પ્લેક્સની રેલિંગ ધરાશાયી થઈ છે. રેલિંગ પડતા કેટલાક લોકોને સામાન્ય ઈજા પહોંચી છે અને ચાર જેટલા વાહનોનો કચ્ચરઘાણ નીકળી ગયો છે.
ગોંડલમાં કમોસમી વરસાદથી ખેડૂતોની ચિંતા વધી
ગોંડલ શહેર અને પંથકમાં પણ કમોસમી વરસાદ વરસ્યો છે. ઉલ્લેખનીય છે કે માવઠાની અગાહીને પગલે ગોંડલના ગ્રામ્ય વિસ્તારોમાં વરસાદ વરસ્યો છે. ગોંડલ શહેર તેમજ પંથકમાં બપોર બાદ વાદળછાયું વાતાવરણ જોવા મળ્યું હતું. ગોંડલ શહેરમાં વરસાદી છાંટા તો ગ્રામ્યમાં રિબડા, શાપર સહિતના વિસ્તારોમાં પવન સાથે વરસાદ વરસ્યો છે. કમોસમી વરસાદ વરસતા ખેડૂતોની ચિંતા વધી ગઈ છે.
