ગન લાઈસન્સના દેશ વ્યાપી રેકેટના મુખ્ય સૂત્રધાર સોકતઅલી સૈયદ સહિત વધુ 17 આરોપીઓની એટીએસએ ધરપકડ કર્યાનો ઘટસ્ફોટ શનિવારે કર્યો હતો. નકસલ પ્રભાવીત રાજ્ય નાગાલેન્ડ -મણિપુરમાંથી ગેરકાયદેસર રીતે ગન લાઈસન્સ લેવાના રેકેટમાં ધરપકડ કરાયેલા આરોપીઓની સંખ્યા 40 પર પહોંચી છે. ગુજરાત એટીએસએ પકડેલા આરોપીઓ પાસેથી વધુ 8 હથિયાર અને 170 કારતૂસ જપ્ત કર્યા છે.
ગુજરાત એટીએસએ ગન લાઈસન્સના દેશ વ્યાપી રેકેટનો પર્દાફાશ કરી અગાઉ સાત એજન્ટ અને 16 આરોપીઓની ધરપકડ કરી હતી. આ કેસની તપાસમાં હરિયાણાના નુહમાં ગન હાઉસ ચલાવતા સૌકતઅલી સૈયદ, ફારૂકઅલી, સોહીમઅલી તથા આસીફનાઓ લાખો રૂપિયા લઈ ગેરકાયદેસર રીતે ગન લાઈસન્સ અપાવતા હોવાનો ઘટસ્ફોટ થયો હતો. એટીએસએ ગત તા.7મીએ આર્મ્સ એકટની કલમ 25(1-બી)(એ), 27,29,30 હેઠળ ગુનો દાખલ કર્યો અને સૌકતઅલીના સાત એજન્ટો સેલા બોળીયા, વિશાલ પંડયા, અર્જુન અલગોતર, ધૈર્ય ઝરીવાલા, સદ્દામ હુસૈન, બ્રીજેશ ઉર્ફ બિટ્ટુ મહેતા અને મુકેશ બાંભાની ધરપકડ કરી હતી. પોલીસ તપાસમાં ખુલેલી વિગત મુજબ હથિયારો લેવા માટે આરોપીઓએ બોગસ હથિયાર લાઈસન્સ બનાવ્યા, અન્યના નામના હથિયાર લાઈસન્સમાં ચેડાં કર્યા અને જૂના હથિયાર લાઈસન્સના રેકર્ડની વિગતોમાં ફેરફાર કરવા જેવી વિવિધ મોડસ ઓપરેન્ડી અપનાવી મુખ્ય સૂત્રધાર લોકોને બોગસ ગન લાઈસન્સ તૈયાર કરી આપતો હતો. ગુજરાત એટીએસએ અગાઉ આ રેકેટમાં 23 આરોપીઓની ધરપકડ કરી હતી. બીજા 17 આરોપીઓ પકડાયા જેમાં ગત તા.8મીએ સૌકતઅલી છોટુખાન સૈયદ તેમજ ગત તા.11મીએ ગોપાલ હિરાભાઈ જોગરાણા, વરંજાગ હનુભાઈ મિર, દિગેશ કરનશ સભાડ, હરી રણુ જોગરાણા, રમેશ કુંવરા વરૂ, મયુર લક્ષ્મણ સોંડલા, અશોક રમેશ કલોત્રા, ભરત રમેશ અલગોતર, નથુ કાળા બાંભા, ઉમેશ ઉર્ફ બાબુ ડાહ્યા આલ, રાહુલ જાગા અલગોતર, રૂપા ખોડા જો ગરાણા, જયેશ ઉર્ફ નાનુ દેવા સરૈયા, કનુ વના ગમારા, પિયુષ ઉર્ફ બલ્લુ હિરા દેસાઈ અને સતીષ મોહન ગમારાનો સમાવેશ થાય છે.
