વાઈબ્રન્ટ ગુજરાતમાં 2,433 ગ્રામ પંચાયતોના મકાનો નથી અથવા તો જર્જરિત હાલતમાં છે, એટલું જ નહિ પરંતુ જર્જરિત મકાનો વાળી ગ્રામ પંચાયતોએ રિપેરિંગ ખર્ચ કે નવી પંચાયતના મકાન સંદર્ભેની 402 અરજીઓ પડતર છે. માર્ચ 2023ની સ્થિતિની આ માહિતી રાજ્યના પંચાયત વિભાગે આપી છે. એકંદરે ગુજરાતમાં ગ્રામ પંચાયતોની દશા કફોડી હોવાની સ્થિતિ છે.
ગુજરાતમાં ગ્રામ પંચાયતોના મકાનો નથી અથવા તો જર્જરિત છે તેમાં વડોદરા જિલ્લાની 267 ગ્રામ પંચાયતો, સુરેન્દ્રનગર જિલ્લામાં 116, સાબરકાંઠા 112, સુરત 115, અમદાવાદ 95, અમરેલી 122, આણંદ 107, બનાસકાંઠા 225, ભાવનગર 185, દાહોદ 96, કચ્છ 87, રાજકોટ 89, ભરૂચ 74, ગીર સોમનાથ 55, જૂનાગઢ જિલ્લામાં આવી 54 ગ્રામ પંચાયતો આવેલી છે. રિપેરિંગ કે પછી નવા મકાન માટેની અરજી પેન્ડિંગ છે તેમાં અમરેલીમાં 18, આણંદમાં 22, ભરૂચમાં 35, ભાવનગર 21, છોટા ઉદેપુર 44, જૂનાગઢ 39, કચ્છ 87, નવસારી 30 તેમજ તાપી (વ્યારા)માં 41 ગ્રામ પંચાયતો છે.
