Ahmedabad: મોડી રાત્રે પડેલા દોઢ ઈંચ વરસાદે પૂર્વવાસીઓની સવાર બગાડી

વરસાદની હજી તો માંડ શરૂઆત થઈ ત્યાં તો મ્યુનિ. કોર્પોરેશનની પ્રી મોન્સૂન કામગીરીના તમામ દાવા પોકળ સાબિત થઈ ગયા છે.

માત્ર એકથી દોઢ ઈંચ વરસાદમાં પૂર્વના મોટા ભાગના વિસ્તારોમાં પાણી ભરાઈ ગયા હતા. પૂર્વના ગોમતીપુર, બાપુનગર, રખિયાલ, નરોડા મેમકો, વિરાટનગર, ઓઢવ સહિતના વિસ્તારોમાં દોઢ ઈંચ જેટલો વરસાદ પડયો હતો. જ્યારે રામોલ, નિકોલ, કઠવાડા, વટવા, સરદારનગર સહિતના વિસ્તારોમાં અડધોથી એક ઈંચ જેટલો વરસાદ પડયો હતો. જેના કારણે મોડી રાતથી સવાર સુધી ઠેર-ઠેર પાણી ભરાઈ જવાની સ્થિતિ જોવા મળી હતી. ઉલ્લેખનીય છે કે, મ્યુનિ. દ્વારા વરસાદી પાણીનો નિકાલ નહીં થતાં ગટરના પાણી બેક મારતાં હતા. જ્યારે સફાઈ કર્મચારીઓ સહિત મ્યુનિ.ની ટીમો કામે લાગતાં આખરે પાણીનો નિકાલ થયો હતો.

અગાઉ કમોસમી વરસાદના કારણે લોકોની સ્થિતિ બગડી હતી. જે પછી પંદર-વીસ દિવસથી પણ વધુનો સમય મળ્યો છતાં પણ કેચપીટની સફાઈ અને સ્ટ્રોમ વોટર લાઈનની કામગીરી પૂર્ણ થઈ ન હતી. પૂર્વના ઘણાં સ્થાનો પર ડ્રેનેજના પાણી ઉભરાઈને બહાર આવ્યા હતા. આ કારણે મોડી રાત્રે પડેલા વરસાદના પાણી વહેલી સવાર સુધી રસ્તા પર જોવા મળ્યા હતા. જે પછી ફરી એકવાર કેચપીટન યોગ્ય રીતે સફાઈ ન થતા આ પ્રશ્ન ઊભો થયો છે.