છેલ્લાં એક સપ્તાહથી AMCમાં ચર્ચાને ચકડોળે ચડેલા એન્જિનીયરિંગ વિભાગમાં 93 ટેકનીકલ સુપરવાઇઝર ભરતીમાં ત્રણ ઉમેદવારોનાં માર્ક વધારી આપવાનાં કૌભાંડમાં મ્યુનિ.ની સેન્ટ્રલ ઓફ્સિની ઘોર બેદરકારી નજરે ચઢી છે અને AMCના પૂર્વ અને વર્તમાન કર્મચારીઓનાં સંતાનો- સગાંને AMCમાં નોકરીમાં ગોઠવી દેવા માટે કારસો ઘડાયો હોવાનુ મ્યુનિ. વર્તુળોમાં ચર્ચાઇ રહ્યું છે.
ટેકનીકલ સુપરવાઈઝર તરીકે ત્રણ ઉમેદવારોનીખોટી રીતે માર્ક વધારીને ભરતી કરવાના કૌભાંડમાં કથિત લેવડ દેવડ સહિતની બાબતે તલસ્પર્શી તપાસ હાથ ધરાઈ રહી છે. આ ભરતી પ્રક્રિયામાં આંખ આડા કાન કરાયા હોવાનું તેમજ લાલિયાવાડી ચાલતી હોવાની અને ઘોર બેદરકારી દાખવવામાં આવી જોવા મળ્યું છે. ટેકનીકલ સુપરવાઈઝરની મેરિટ યાદી તૈયાર કરવામાં સેન્ટ્રલ ઓફિસના હેડ ક્લાર્ક પછી કોઈ અધિકારીએ માર્ક ચેક કર્યા હતા કે કેમ ? એવું મ્યુનિ. વર્તુળોમાં ચર્ચાઈ રહ્યું છે. ટેકનીકલ સુપરવાઈઝર ભરતી કૌભાંડના પર્દાફાશને પગલે AMC સેન્ટ્રલ ઓફિસની ભૂમિકા શંકાના દાયરામાં આવી ગઈ છે. એટલું જ નહીં પરંતુ ભૂતકાળમાં થયેલી ભરતીઓ પણ શંકાસ્પદ હોવાની શક્યતા છે. આ ભરતી કૌભાંડમાં પોલીસ ફરિયાદ કરવામાં આવી છે અને AMC કમિશનરે વિજિલન્સ તપાસના આદેશ આપતાં આગામી દિવસોમાં અન્ય અધિકારીઓ, કર્મચારીઓ સુધી તપાસનો રેલો પહોંચશે તેવી દહેશતને પગલે સેન્ટ્રલ ઓફિસ સહિત અન્ય કર્મચારીઓ- અધિકારીઓમાં ફફડાટ ફેલાયો છે.
