લાખણી સહિત સરહદી પંથકમાં વરસાદને પગલે બાજરી- જુવારનો પાક જમીનદોસ્ત

• બિપરજોયની કળ વળી નથી ત્યાં ખેડૂતોને ફરી નુકસાન થયું
  
  
  
• ખેતરોમાં ઢળી પડેલી બાજરી ફરી ઉગી નીકળી
• બાજરી અને જુવારનો પાક જમીનદોસ્ત થઈ ગયો

લાખણી સહિત સરહદી પંથકમાં પાછોતરા ભારે વરસાદથી બાજરી અને જુવારના ઉભા પાકોને વ્યાપક નુકસાન થયું છે. જે ખેતરોમાં ઢળી પડેલી બાજરી ફરી ઉગી નીકળી છે. જેથી ખેડૂતોને વ્યાપક નુકસાન થયું છે.

બનાસકાંઠા જિલ્લામાં બાજરી મુખ્ય ખાદ્યાન્ન પાક ગણાય છે. તેથી તેનું ઉનાળુ અને ચોમાસુ સીઝન એમ બે વખત વાવેતર થાય છે. જેમાં પણ લાખણી, થરાદ, વાવ અને સુઇગામ તાલુકામાં બાજરીનું મોટાપાયે વાવેતર થાય છે. જિલ્લામાં આ વખતે ચોમાસું સિઝનમાં 1,32,203 હેકટર જમીનમાં બાજરીનું વાવેતર થયું છે. પ્રારંભે વાવણી લાયક વરસાદ બાદ ત્રણ રાઉન્ડમાં ભરપૂર વરસાદ થતાં બાજરીનો પાક ખીલી ઉઠયો હતો પરંતુ પાછળથી વરસાદ ખેંચાઈ ગયો હતો. તેમ છતાં ખેડૂતોએ મથામણ કરી પાક તૈયાર કર્યો હતો પણ ભારે વરસાદથી બાજરી અને જુવારનો પાક જમીનદોસ્ત થઈ ગયો છે જ્યારે કાપણી કરેલ પાક બગડી ગયો છે. તેમાં પણ ખેતરોમાં પડેલી બાજરી ફરી ઉગી નીકળતા દાણા સહિત તેનો ઘાસચારો પણ બગડી ગયો છે. ખેડૂતોને ઉનાળુ સિઝનમાં પણ કાપણીના ખરા સમયે બિપરજોય વાવાઝોડું નડયું હતું તેથી ખેડૂતો પાયમાલ થઈ ગયા હતા. જેના નુકસાનની હજી કળ વળી નથી ત્યાં કુદરતની ફરી ક્રુર થપાટથી ધરતીપુત્રોની હાલત કફેડી બની ગઈ છે.

ખેડૂતોને સત્વરે સહાયની માંગ....

કાપણીના ખરા તાકડે બિપરજોય વાવાઝોડા સાથે ખાબકેલા ભારે વરસાદથી ગત ઉનાળુ સીઝન નિષ્ફ્ળ નિવડી હતી.જેથી રાજ્ય સરકારે ખેડૂતો માટે રાહત પેકેજ જાહેર કર્યું હતું પરંતુ ખેડૂતોના હાથમાં હજી સુધી સહાય આવી નથી અને હવે સતત બીજી સિઝન પણ બગડી છે.તેથી જગતનો તાત ગણાતો ખેડૂત ભાંગી પડયો છે ત્યારે સરકાર ખેડૂતોને સહાય કરે તેવી પ્રબળ લોક માંગ ઉઠવા પામી છે.