સમગ્ર રાજ્ય સહિત અરવલ્લી અને સાબરકાંઠા જિલ્લામાં ટેકાના ભાવે મગફળીની ખરીદીની પ્રક્રિયા જારી છે. પરંતુ ખરીદ પ્રક્રિયા ધીમી ગતિએ ચાલતી હોવાની ફરિયાદો સાથે ખરીદ કેન્દ્રો વધારવાની ખેડૂતોમાંથી માગણીઓ ઉઠી હતી.
આ અંગે સંદેશ દ્વારા અહેવાલ પ્રસિદ્ધ કરાયા બાદ અરવલ્લીના બાયડ તાલુકામાં તેનપુર ખાતે વધુ એક ખરીદ કેન્દ્ર શરૂ કરાતાં ખેડૂતોએ રાહત અનુભવી છે.રાજ્ય સરકાર મગફળીની ટેકાના ભાવે ખરીદી કરી રહી છે. બજારની સરખામણીએ પ્રતિ મણ રૂ.1356.60નો ભાવ મળતો હોઇ ખેડૂતોએ મોટી સંખ્યામાં રજિસ્ટ્રેશન કરાવ્યાં છે. પરંતુ બીજી તરફ ખરીદ પ્રક્રિયા નિર્ધારિત તારીખ કરતાં પણ ચાર-પાંચ દિવસ પછી શરૂ થઇ હતી. તેમાં પણ ખરીદી ધીમી ગતિએ થઇ રહી હોવાની ખેડૂતોમાંથી ફરિયાદો ઉઠી હતી. ખેડૂતોએ ખરીદીના કેન્દ્રો પણ વધારવાની માગણી કરી હતી. ખેતીવાડી વિભાગના સત્તાવાર સુત્રો પ્રમાણે અરવલ્લી જિલ્લામાંથી ટેકાના ભાવે મગફળી વેચવા માટે 8640 ખેડૂતોએ નોંધણી કરાવેલી છે. જેમાં તા. 21મી ડિસેમ્બર 2024ના આંકડાઓ પ્રમાણે કુલ 2801 જેટલા ખેડૂતો પાસેથી મગફળી ખરીદવામાં આવી છે. ટકાવારીની દૃષ્ટિએ ખરીદી 32.76 ટકા થઇ છે. આ જ પ્રમાણે સાબરકાંઠા જિલ્લામાંથી કુલ નવ ખરીદ કેન્દ્રો પર ખરીદી જારી છે. જ્યાં 10,922 નોંધણી સામે 4,632 ખેડૂતો પાસેથી આજની તારીખ સુધીમાં ખરીદી કરવામાં આવી છે. જે ટકાવારીની દૃષ્ટિએ 37 ટકા આસપાસ થવા જાય છે. બંન્ને જિલ્લામાં કુલ નોંધણી સામે સરેરાશ 35 ટકા ખરીદી કરવામાં આવી છે. બાયડ જેવા તાલુકાઓમાં રજીસ્ટ્રેશન વધુ થયું હોઇ ખરીદ પ્રક્રિયામાં ઝડપ લાવવા સાથે કેન્દ્રોની સંખ્યા વધારવા પણ માગણી થઇ હતી. ખેડૂતોના જણાવ્યા પ્રમાણે નોંધણી વધુ થઇ હોય તેવા તાલુકાઓમાં ખરીદ કેન્દ્રોની સંખ્યા વધારવામાં આવે તો જ સમયસર ખરીદીની પ્રક્રિયા આટોપી શકાશે. આ અંગે સંદેશમાં અહેવાલ પ્રસિદ્ધ થયા બાદ બાયડ માર્કેટયાર્ડ ઉપરાંત બાયડ તાલુકાના તેનપુર સબ યાર્ડ ખાતે શુક્રવારથી મગફળીનું વધુ એક ખરીદ કેન્દ્ર શરૂ કરવામાં આવતાં ખેડૂતોને રાહત થઇ છે. બાયડ તાલુકાના પિૃમ ગાળાના ગામડાઓમાંથી ધરતીપુત્રોને છેક બાયડ માર્કેટયાર્ડ સુધી ધક્કા ખાવામાંથી મુક્તિ મળી છે. ખેડૂતોએ સંદેશનો આભાર વ્યક્ત કર્યો હતો. આ જ પ્રમાણે બંન્ને જિલ્લાના જે તાલુકાઓમાં નોંધણી વધુ થઇ હોય તેવા તાલુકાઓમાં પણ ખરીદીના નવા કેન્દ્રો શરૂ કરવામાં આવે તેવી ખેડૂતોમાંથી માગણીઓ ઉઠી છે.
