ભણતરના ભારથી કંટાળી આશાસ્પદ યુવકે જીવ ટૂંકાવ્યો

• આર્કિટેક્ચરના વિદ્યાર્થીએ બિલ્ડીંગ પરથી છલાંગ લગાવી 
  
• શિવ મિસ્ત્રી નામના વિદ્યાર્થીએ કર્યું સ્યુસાઇડ
• અલગ અલગ સ્યુસાઈડ નોટ મળી

અમદાવાદની સેપ્ટ યુનિવર્સિટીની આર્કિટેક ફેકલ્ટીમાં છેલ્લા સેમિસ્ટરમાં અભ્યાસ કરતા શિવ મિસ્ત્રીએ ભણતરના ભારથી કંટાળીને આત્મહત્યા કરી લીધી છે. મૂળ વડોદરાનો અને અમદાવાદમાં રહીને અભ્યાસ કરતા યુવકે પંચવટી પાસે આવેલા ધ્રુવીન એપાર્ટમેન્ટના છઠ્ઠા માળેથી કૂદકો મારી મોતને વહાલું કર્યું છે. આ અંગે યુનિવર્સિટી પોલીસને માહિતી મળતા તપાસ શરૂ કરવામાં આવી હતી. જેમાં યુવકે અલગ અલગ સુસાઇડ નોટ લખી હોવાનું પણ સામે આવ્યું છે.

ધ્રુવીન એપાર્ટમેન્ટના 12 નંબરના મકાનમાં રહેતા શિવ મિસ્ત્રીની ઘરની તપાસ કરતા પોલીસને અલગ અલગ સુસાઇડ નોટ મળી હતી. જેમાં માતા-પિતા, મિત્ર અને પોતાની મહિલા મિત્રને પણ એક સુસાઇડ નોટ લખી હોવાનું સામે આવ્યું છે. આ સુસાઇડ નોટ કબજે કરી એફએસએલ મોકલવાની તજવીજ હાથ ધરવામાં આવી છે.

આ સાથે જ મૃતક શિવના શરીર પર રહેલા સેડ ઈમોજી ટેટૂ અંગે પણ તપાસ કરવામાં આવી રહી છે. જેથી કયા કારણોસર વિદ્યાર્થીએ આત્મહત્યા કરી તે જાણી શકાય. પરંતુ હાલ તો પોલીસ પણ તમામ સુસાઈડ નોટ કબજે કરી તેની પણ તપાસ કરી રહી છે કે, ખરેખર આપઘાત પાછળ ભણતર જવાબદાર છે કે પછી અન્ય કોઈ કારણ છે. આ ઉપરાંત તેની સાથે રહેતા અન્ય વિદ્યાર્થીઓની પણ મદદ લઈને કાર્યવાહી થશે કે મૃતક વિધાર્થી કોઈ અન્ય કારણસર દબાણમાં હતો કે કેમ. હાલ પોલીસે પીએમ કરાવીને લાશને પરિવારજનોને સોંપવાની કામગીરી કરી છે.