- અમદાવાદ-મુંબઈ બુલેટ ટ્રેન પ્રોજેક્ટની કામગીરી યુદ્ધના ધોરણે
- વલસાડ જિલ્લામાં પ્રથમ પર્વતીય ટનલ પણ પૂર્ણ
- ગુજરાતમાં 8 અને મહારાષ્ટ્રમાં ચાર સ્ટેશન હશે
અમદાવાદથી મુંબઈ સુધીના 508 કિલોમીટર લાંબા બુલેટ ટ્રેન કોરિડોરનું બાંધકામ ચાલી રહ્યું છે. આ માર્ગ પર કુલ 24 બ્રિજ બનાવવાના છે. તેમાંથી નવ બ્રિજનું બાંધકામ પૂર્ણ થઈ ગયું છે. વલસાડ જિલ્લામાં પ્રથમ પર્વતીય ટનલ પણ પૂર્ણ થઈ ગઈ છે. બુલેટ ટ્રેનના રૂટમાં કુલ 12 સ્ટેશન હશે. જેમાંથી 8 ગુજરાતમાં અને ચાર મહારાષ્ટ્રમાં હશે.
અમદાવાદ-મુંબઈ બુલેટ ટ્રેનને લઈને એક નવું અપડેટ સામે આવ્યું છે. NHSRCLએ ગુજરાતના વલસાડ જિલ્લામાં કોલક નદી પર 160 મીટર લાંબા પુલનું નિર્માણ પૂર્ણ કર્યું છે. મુંબઈથી અમદાવાદ સુધીની બુલેટ ટ્રેનનો કુલ કોરિડોર 508 કિલોમીટર લાંબો હશે. આ માર્ગ પર આવતી નદીઓ પર 24 પુલ બનાવવાના છે. તેમાંથી નવનું બાંધકામ પૂર્ણ થયું છે. તેમાં વાપી અને બીલીમોરા સ્ટેશન વચ્ચેના બ્રિજમાં દરેક 40 મીટરના ચાર ફુલ-સ્પાન ગર્ડરનો પણ સમાવેશ થાય છે. કોલક નદી વાપીથી સાત કિલોમીટર અને બીલીમોરા રેલવે સ્ટેશનથી 43 કિલોમીટર દૂર છે. આ નદી વાલવેરી નજીક સાપુતારા ટેકરીઓમાંથી નીકળે છે અને અરબી સમુદ્રમાં વહે છે.
આ નદીઓ પર બનેલા પુલ
NHSRCL મુજબ, વલસાડમાં પાર અને ઔરંગા, નવસારીમાં પૂર્ણા, મીંઢોળા, અંબિકા અને વેંગાનિયા, ખેડામાં મોહર અને વડોદરા જિલ્લામાં ધાધર નદીઓ પર પુલ બાંધવામાં આવ્યા છે. નર્મદા, તાપ્તી, મહી અને સાબરમતી નદીઓ પર પુલ બનાવવાનું કામ ચાલી રહ્યું છે.
કુલ 12 સ્ટેશન બનાવવામાં આવશે
મુંબઈ-અમદાવાદ બુલેટ ટ્રેન કોરિડોરમાં 12 સ્ટેશન હશે. જેમાંથી આઠ ગુજરાતમાં અને ચાર મહારાષ્ટ્રમાં હશે. ગુજરાતમાં સાબરમતી, અમદાવાદ, આણંદ, વડોદરા, ભરૂચ, સુરત, બીલીમોરા અને વાપી સ્ટેશન હશે. મહારાષ્ટ્રમાં બોઈસર, વિરાર, થાણે અને મુંબઈમાં સ્ટેશન બનાવવામાં આવશે. NHSRCLએ કહ્યું કે સ્ટેશનોનું બાંધકામ ઝડપથી ચાલી રહ્યું છે. ગુજરાતમાં તમામ આઠ સ્ટેશનો પર ફાઉન્ડેશનનું કામ પૂર્ણ કરવામાં આવ્યું છે. આ સ્ટેશનો પર મુસાફરોને આધુનિક સુવિધાઓ મળશે.
NHSRCLએ તેના અપડેટમાં જણાવ્યું હતું કે 2 જુલાઈ સુધી તમામ સિવિલ કોન્ટ્રાક્ટ આપવામાં આવ્યા છે અને 190 કિમી વાયાડક્ટ અને 321 કિમી પિયરનું કામ પૂર્ણ થઈ ગયું છે. પ્રોજેક્ટ માટે જરૂરી જમીન ગુજરાત, દાદરા અને નગર હવેલી અને મહારાષ્ટ્રમાં સંપાદિત કરવામાં આવી છે.
પ્રથમ પર્વતીય ટનલ તૈયાર
વલસાડના જરોલી ગામ પાસે 350 મીટર લાંબી પ્રથમ પહાડી ટનલનું કામ પૂર્ણ થયું છે. આ સિવાય દેશની પ્રથમ સાત કિલોમીટર લાંબી અન્ડરસી રેલ ટનલ પર કામ શરૂ થઈ ગયું છે. આ ટનલ મહારાષ્ટ્રના બીકેસી અને શિલફાટા વચ્ચે 21 કિલોમીટર લાંબી ટનલનો એક ભાગ છે.
સરકારનું લક્ષ્ય 2026 સુધીમાં દક્ષિણ ગુજરાતના સુરત અને બીલીમોરા વચ્ચે બુલેટ ટ્રેનનો પ્રથમ તબક્કો ચલાવવાનું છે. તમને જણાવી દઈએ કે વડાપ્રધાન નરેન્દ્ર મોદી અને જાપાનના તત્કાલિન પીએમ શિન્ઝો આબેએ 14 સપ્ટેમ્બર 2017ના રોજ ગુજરાતમાં બુલેટ ટ્રેન પ્રોજેક્ટનો શિલાન્યાસ કર્યો હતો.
