- પીડિતાએ હાઈકોર્ટમાં કરેલી અરજીમાં ચોંકાવનારો આક્ષેપ, 4થી ડિસેમ્બરે સુનાવણી થશે
- પહેલા યુવતીને ફ્લાઈટ એટેન્ડન્ટ અને પછી અંગત મદદનીશ બનાવી હતી
- પોલીસે પહેલા ફરિયાદ લેવાની ના પાડી હતી
કેડિલા ફાર્માસ્યૂટિકલ્સના સીએમડી રાજીવ મોદી પહેલા ઘરેલુ હિંસાના કેસ, તે પછી ગુજરાતમાં રૂ. 200 કરોડના સૌથી મોટા છૂટાછેડાના સેટલમેન્ટ બાદ હવે ફરી એક વાર વિવાદોમાં ફસાયા છે. આ વખતે બલ્ગેરિયાની એક યુવતી, જેને રાજીવ મોદીએ પહેલા પોતાની ફ્લાઈટ એટેન્ડન્ટ અને પછી અંગત સચિવ તરીકે રાખી, તેણે રાજીવ મોદી અને કંપનીના અન્ય એક અધિકારીએ પોતાના પર દુષ્કર્મ આચર્યું હોવાની ફરિયાદ કરતાં ઉદ્યોગ જગતમાં સોપો પડી ગયો છે. એટલું જ નહીં, બલ્ગેરિયાની આ યુવતીએ ગુજરાત હાઈકોર્ટમાં જે પિટિશન કરી છે તેમાં એવો પણ આક્ષેપ કર્યો છે કે, રાજીવ મોદી સામે પોલીસે તો પહેલાં ફરિયાદ જ લેવાની ના પાડી દીધેલી. યુવતી કોર્ટમાં ગઈ તો પોલીસે રાજીવ મોદીનો જાણે હાથો બની હોય તેમ તેના વતી ધાક-ધમકી અને દબાણ આચરી સમાધાન કરાવ્યું અને તેના આધારે ગ્રામ્ય કોર્ટે ફરિયાદ રદ કરવાનો નિર્ણય કરેલો. આવા આક્ષેપ સાથે યુવતી હાઈકોર્ટમાં આવી છે અને રાજીવ મોદી, જોન્સન મેથ્યૂ સામે જાતીય સતામણી, દુષ્કર્મ સહિતના ગુના નોંધવા, વસ્ત્રાપુર પોલીસની વર્તણૂંક બાબતે વસ્ત્રાપુર પોલીસ સ્ટેશનના સીસીટીવી ફૂટેજ કોર્ટમાં રજૂ કરાવવાની માગ સાથે હાઈકોર્ટમાં પિટિશન કરી છે. જેના પર ચોથી ડિસેમ્બરે સુનાવણી યોજાય તેવી શક્યતા છે.
યુવતીના વકીલે આપેલી વિગતો મુજબ, કેડીલા ફાર્માસ્યૂટિકલ્સ કંપનીમાં બલ્ગેરિયાની 27 વર્ષની યુવતી એમ્પ્લોઈ તરીકે 24મી નવેમ્બર 2022ના રોજ જોડાઈ હતી. કેડીલા ફાર્માસ્યૂટિકલ્સ કંપની દ્વારા છારોડી ખાતે રહેવાની વ્યવસ્થા કરી હતી. જે કેડીલા ફાર્માસ્યુટીકલ્સ કંપનીના સીએમડી રાજીવ મોદીના ઘરની બાજુમાં રાખવામાં આવી હતી. આ પછી કંપનીમાં કામ કરતા જોન્સન મેથ્યુએ યુવતીને બટલર કમ પર્સનલ ફલાઈટ અટેન્ડેન્ટ તરીકે રાખી હતી. પરંતુ બટલર પર્સનલ આસિસ્ટન્ટની કામગીરી કરાવામાં આવી હતી. તા.24મીના રોજ ભોગ બનેલી યુવતીને ઈન્ડકશન પ્રોગ્રામ શરૂ કરીને જુદા જુદા વિભાગોમાં કામગીરી બતાવવામાં આવી હતી. તા.21મી ફેબ્રુઆરી 2023ના રોજ કંપનીના મેનેજરનો યુવતી પર આવ્યો હતો અને કહ્યુ કે, સીએમડી સાથે ઉદેપુર જવાનું છે. ઉદેપુરથી પરત ફરતા સીએમડીએ યુવતીની જાતીય ટિપ્પણી કરીને કહ્યુ કે, એકદમ શરમાળ છે અને ખુબજ વાચાળ થવુ જોઈએ. આ પછી તા.23મી ફેબ્રુઆરી 2023ના રોજ સીએમડી સાથે જમ્મુ ગઈ હતી. જ્યાં સીએમડીએ યુવતીને કહ્યુ કે, પી.એ. તરીકે નોકરી કરવા માંગતી હોય તો કોઈ છોછ હોવો ન જોઈએ. આ સમયે યુવતી અનકન્ફર્ટેબલ સીચ્યુએશનમાં મુકાઈ હતી. તા.24મી અને 26મી ફેબ્રુઆરીના રોજ યુવતી સાથે સીએમડીએ અણછાજતું કૃત્યુ અને વ્યવહારની જાતીય સતામણી કરી હતી. આ અંગે ભોગ બનેલી યુવતીએ મહિલા આયોગ, નવરંગપુરા પોલીસ મથક, સોલા પોલીસ મથક. મહિલા પોલીસ સ્ટેશનમાં કેડીલા ફાર્માસ્યૂટિકલ્સ કંપનીના સીએમડી રાજીવ ઈન્દ્રવદનભાઈ મોદી અને તેમને મદદ કરનાર જોન્સન મેન્થુ સામે જાતીય સતામણી અને દુષ્કર્મની ફરિયાદ દાખલ કરવા માટે લેખિત જાણ કરી હતી. પરંતુ પોલીસ દ્વારા કોઈ કાર્યવાહી કરવામાં આવી નહોતી. આ પછી ભોગ બનેલ યુવતીએ અમદાવાદ ગ્રામ્ય કોર્ટમાં કેડીલા ફાર્માસ્યુટીકલ્સ કંપનીના સીએમડી રાજીવ ઈન્દ્રવદનભાઈ મોદી અને તેમને મદદ કરનાર જોન્સન મેન્થુ સામે ખાનગી ફરિયાદ કરી હતી. જેમાં ભોગ બનેલી યુવતીએ એફિડેવિટની સાથે 28 દસ્તાવેજો રજૂ કર્યા હતા.કોર્ટમાં યુવતીએ ACP હિમલા જોષી પર કેટલાક કાગળો પર સહી કરાવી લેવાનો આક્ષેપ કર્યો હતો પણ કોર્ટે તેની અરજી ફગાવી દેતાં જે હુકમ કર્યો હતો તેની સામે યુવતીએ તેના એડવોકેટ રાજેશ મિશ્રા મારફતે ગુજરાત હાઈકોર્ટમાં સ્પેશયલ ક્રિમિનલ રિટ અરજી કરીને દાદ માંગી હતી, કે વસ્ત્રાપુર પોલીસ મથકમાં મારી પાસે ધાક ધમકી આપીને એફિડેવિટ કરાવવામાં આવી છે. જેથી તાકીદે વસ્ત્રાપુર પોલીસ મથકના સીસીટીવી ફૂટેજ કબજે કરવા જોઈએ. મહિલા પોલીસ મથકમાં કરેલી ફરિયાદના આધારે એફઆઈઆર દાખલ કરવી અને યોગ્ય તપાસ કરાવી જોઈએ. જેના આધારે કોર્ટે સરકારને નોટિસ કાઢીને આગામી 4થી ડિસેમ્બરના રોજ સુનાવણી માટે રાખી છે.
