- NDAના રાષ્ટ્રપતિ પદના ઉમેદવાર છે દ્રોપદી મુર્મુ
- સોમવારે રાષ્ટ્રપતિ પદ માટે ચૂંટણી યોજાશે
- ગાંધીનગર પાસેના રિસોર્ટમાં આજે બેઠક
રાષ્ટ્રપતિની ચૂંટણીમાં ભાજપની આગેવાનીવાળા NDAના ઉમેદવાર દ્રોપદી મુર્મુ રવિવારે પ્રચાર માટે ગુજરાત આવી રહ્યા છે. તે પહેલા ગુજરાત ભાજપે પોતાના 111 ધારાસભ્યોને શનિવારે ગાંધીનગર બોલાવ્યા હતા. અહીના સ્વર્ણિમ સંકૂલ-2ના હોલમાં સોમવારે યોજાનારા મતદાન માટે મોકપોલથી ટ્રેનિંગ શરૂ કરવામાં આવી હતી. એટલુ જ નહી, સોમવારે મતદાન અને ત્યારબાદ મતગણતરી બાદ ચૂંટાયેલા રાષ્ટ્રપતિના નામની જાહેરાત ન થાય ત્યાં સુધી એક પણ ધારાસભ્યોને ગાંધીનગર બહાર ન જવા વિધાનસભાના ચીફ વ્હિપ દ્વારા સુચના આપવામાં આવી છે.
NDAના ઉમેદવાર દ્રોપદી મુર્મુ શનિવારે મહારાષ્ટ્રમાં પોતાનો પ્રચાર કરી રહ્યા હતા. ભાજપમાંથી પ્રાપ્ત માહિતી મુજબ, તેઓ રવિવારે સવારે ગુજરાત આવશે. અમદાવાદ સ્થિત સાબરમતી ગાંધી આશ્રમની મુલાકાત બાદ તેઓ ગાંધીનગર પાસે આવેલા નારાયણી રિસોર્ટમાં ભાજપના ધારાસભ્યો સાથે બેઠક યોજીને પોતાને મત આપવા માટે અપીલ કરશે.
આ તરફ ગુજરાત ભાજપે પોતાના એક પણ ધારાસભ્યને મત બગડે નહી, તે ઉદ્દેશ્યથી શનિવાર અને રવિવાર એમ સળંગ બે દિવસ મોકપોલ મારફતે ટ્રેનિંગ આપવાની કવાયત હાથ ધરી છે. રાજ્યસભા કરતા તદ્દન અલગ એવી રાષ્ટ્રપતિની ચૂંટણીમાં મતદાન ગુપ્ત હોય છે. ધારાસભ્યે મત આપ્યા બાદ મતપત્રકને પાર્ટીના એજન્ટ સમક્ષ દર્શાવવાનું રહેતુ નથી. એટલુ જ નહી, મત આપવા માટે પણ ધારાસભ્યો સ્વંતત્ર હોવાથી મતપત્રકમાં દ્રોપદી મુર્મુના નામની સામે રોમન લીપીમાં એકડો ઘુંટવા માટે ભાજપે મોકપોલ મારફતે તાલીમ વર્ગ શરૂ કર્યો છે.
શનિવારે સ્વર્ણિમ સંકુલ-2ના હોલમાં મળેલી બેઠકમા મુખ્યમંત્રી સહિત ભાજપના તમામ ધારાસભ્યો ઉપસ્થિત રહ્યા હતા. આવતીકાલે મુર્મુની હાજરીમાં રિસોર્ટમાં મળનારી ધારાસભ્યો સાથેની બેઠકમાં પ્રદેશ અધ્યક્ષ સહિતના પદાધિકારીઓ પણ ઉપસ્થિત રહેશે.
ગુજરાતના એક MLAના એક મતનો ભારાંક 147
ગુજરાત વિધાનસભામાં હાલમાં 182 પૈકી 179 ધારાસભ્યો છે. ત્રણ બેઠકો ખાલી છે. આ ચૂંટણીમાં વસ્તી ગણતરીને આધારે જે તે રાજ્યના મતોનો ભારંક નક્કી થતો હોય છે. ગુજરાતના મતોનું મૂલ્ય (ભારાંક) 26,754 થવા જાય છે. આ ગણતરીએ એક ધારાસભ્યના મતનો ભારાંક 147 છે. આથી, ભાજપના 111 ધારાસભ્યોના મતોનું મૂલ્યનું 16,317 થશે.
