Gujarat Budget 2025: 20 ફેબ્રુઆરીએ ગુજરાતનું બજેટ થશે રજૂ

ગુજરાત વિધાનસભા બજેટ સત્રનું કામચલાઉ કેલેન્ડર જાહેર કરવામાં આવ્યું છે. જેમાં રાજ્યના બજેટસત્ર અંગે જાણકારી આપવામાં આવી છે. રાજ્યપાલના સંબોધનથી ગુજરાતના બજેટસત્રની શરૂઆત થશે. રાજ્યપાલના સંબોધન બાદ શોકદર્શક ઉલ્લેખ રજૂ થશે અને સરકારી વિધાયકો, સરકારી કામકાજના મુદ્દાઓ રજૂ કરશે.

બજેટ સત્ર અંગે સત્તા પક્ષની 15 ફેબ્રુઆરીએ બેઠક યોજાશે

તમને જણાવી દઈએ કે આગામી 20 ફેબ્રુઆરીના દિવસે રાજ્યનું બજેટ વિધાનસભામાં રજૂ થશે. સરકારી વિધેયકો માટે આ પહેલા ચાર બેઠકો થશે. રાજ્યપાલના સંબોધન પર ત્રણ બેઠકમાં ચર્ચા થશે. પૂરક માગણીઓ પર ચર્ચા અને મતદાન માટે બે બેઠક યોજાશે અને બજેટ સંદર્ભે ચાર બેઠકમાં ચર્ચા કરવામાં આવશે. તમામ માગણીઓ પર ચર્ચા અને મતદાન માટે 12 બેઠક યોજાશે. આ સિવાય બજેટ સત્ર અંગે સત્તા પક્ષની 15 ફેબ્રુઆરીએ બેઠક યોજાશે, જેમાં મુખ્યપ્રધાન ભૂપેન્દ્ર પટેલ, સી.આર.પાટીલ બેઠકમાં હાજર રહેશે. આ સિવાય બેઠકમાં અનેક મંત્રીઓ અને ધારાસભ્યો પણ હાજર રહેશે.

ગયા વર્ષે ગુજરાતનું 3.32 લાખ કરોડનું બજેટ રજૂ કરાયુ હતું

તમને જણાવી દઈએ કે ગયા વર્ષે ગુજરાતમાં 2024ના બજેટમાં સરકારે નવા કોઈ વેરા ન નાખી જનતાને રાહત આપી હતી. જેમાં જૂના કોઈ વેરાના દરમાં ફેરફાર કરવામાં આવ્યો નહતો. ગુજરાતનું 3.32 લાખ કરોડનું બજેટ રજૂ કરાયુ હતું. વર્ષ 2024-25નું 900.72 કરોડની પૂરાંતવાળું બજેટ રજુ કરવામાં આવ્યું હતું. જેમાં આદિજાતિ વિકાસ વિભાગ માટે કુલ 4374 કરોડની જોગવાઈ કરવામાં આવી હતી.