સામાન્ય રીતે ભારત સહિત અન્ય દેશોમાં રહેતા અને લોકોને અમેરિકા જવાનું ઘેલુ લાગ્યુ હોય તેમ કેટલાક લોકો અમેરિકામાં ગેરકાયદે પ્રવેશ કરવા માટે અનેક દિવસો સુધી અમેરિકાની સરહદમાં રાત-દિવસ ચાલીને કેટલાક લાલચુ એજન્ટો ખાસ કરીને ગુજરાતીઓને અમેરિકા મોકલી આપે છે.
ત્યારે થોડાક સમય અગાઉ મોયદ ગામના એક યુવક, પત્નિ અને સગીરને એજન્ટે અમેરિકા મોકલવા માટે લાખો રૂપિયા લીધા બાદ તેમને અમેરિકાની સરહદેથી અમેરિકામાં પ્રવેશ કરવા લઈ ગયો હતો. જયાં મોયદના એક યુવાનનું મોત નિપજયું હોવાની ઘટના સોમવારે સોશિયલ મીડીયામાં જાહેર થયા બાદ સાબરકાંઠા સહિત ગુજરાતમાંથી અમેરિકા ગયેલા કેટલાક પરિવારોમાં ચિંતાની લાગણી પ્રસરી ચૂકી છે. સોશિયલ મીડીયામાં જાહેર થયેલી વિગતો મુજબ, મોયદનો આ યુવાનને દોઢેક માસની સફર દરમિયાન ડાયાબિટીસની દવાઓના અભાવને કારણે બેહોશ થઈ કોમામાં સરી પડયો હતો. જેથી તેને નિકારગુઆમાં દાખલ કરાયો હતો. જ્યાં સારવાર દરમિયાન યુવક મોતને ભેટયો હતો. જયારે મૃતક યુવાનની પત્નિ અને સગીર બાળક હાલ નિકારગુઆમાં મદદની રાહ જોઈને બેઠા છે. સોશિયલ મીડીયાના આધારે મળતી માહિતી મુજબ, મોયદ ગામના રૂપાજીવાસમાં રહેતા દિલીપભાઈ મગનભાઈ પટેલ તેમના પરિવાર સાથે ત્રણ મહિના અગાઉ ઘરેથી નીકળ્યા હતા. દિલીપભાઈની માતા લખમીબેનના જણાવ્યા મુજબ, તેમનો પુત્ર પરિવાર સાથે ફરવા જવાનું કહીને મોયદથી નીકળ્યો હતો. જો કે તેઓ ક્યાં ગયા છે તેની કોઈ માહિતી નથી. લખમીબેન હાલ તો દરેક પ્રશ્નોના એક જ જવાબ આપે છે કે મને મારા પુત્ર અને પરિવારની કોઈ જ ખબર નથી. હાલમાં મૃતકના પરિવારનું ઘર એકદમ સૂમસામ છે. માતા લખમીબેન વારંવાર એક જ વાત જણાવી રહ્યા છે કે, તેમનો પુત્ર ફરવા જવાનું કહીને ગયો હતો અને હજુ સુધી પરત આવ્યો નથી. જો કે સૂત્રો દ્વારા મળેલી વિગતો મુજબ મૃતક યુવકે નિકારગુઆ થઈને અમેરિકામાં પહોંચવા માટે એજન્ટ મારફતે ગોઠવણ કરાવી હોવાની શકયતા નકારી શકાતી નથી. દિલીપભાઈનું જે રીતે મોત નિપજયું છે તે જોતાં તેમને લઈ જનાર એજન્ટ હવે શંકાના દાયરામાં આવી ગયો છે.
