- સોશિયલ મીડિયાના અતિરેકથી નાના બાળકોમાં પણ સ્ટ્રેસ લેવલ વધ્યું હોવાનું તારણ
- વધુ પડતા તણાવથી હૃદયરોગ, સ્ટ્રોક, મગજ, કિડનીની બીમારીનું જોખમ
- 17મી મેના રોજ વર્લ્ડ હાયપર ટેન્શન ડે તરીકે મનાવવામાં આવે છે
એક સમય એવો હતો કે બાળકો ઘરમાં રહેવાને બદલે મેદાનમાં કે તેના મિત્રો સાથે રમવા દોડી જતા હતા. હવે મોટાભાગના બાળકો મોબાઇલની લતે ચડી ગયા છે. જેના કારણે 15 વર્ષના બાળકોમાં પણ હાઈપર ટેન્શન જોવા મળી રહ્યું છે. સોશિયલ મીડિયામાં લાઇક્સ, વ્યૂઝ વધારવાની દેખાદેખીમાં પણ આવા કૂમળાં બાળકોનું સ્ટ્રેસ લેવલ પણ વધતું જોવા મળ્યું છે. 17મી મેના રોજ વર્લ્ડ હાયપર ટેન્શન ડે તરીકે મનાવવામાં આવે છે. છેલ્લા ચાર પાંચ વર્ષના અરસામાં વધુ પડતા તણાવને લીધે હાયપર ટેન્શન કે હાઈ બ્લડ પ્રેશરના કેસનું પ્રમાણ વધ્યું છે. હાયપર ટેન્શનના કારણે હૃદય રોગ, સ્ટ્રોક, મગજ કે કિડની સંબંધિત બીમારીનું કારણ બની શકે છે. અત્યારે ઝડપી લાઇફ સ્ટાઇલ અને તણાવ વચ્ચે હૃદય રોગ કે સ્ટ્રોકનો હુમલો આવે તે પછી ખબર પડતી હોય છે કે, જે તે દર્દી આ પ્રકારની બીમારી હતી. સાયલન્ટ કિલર સમાન ગણાતી આ બીમારી પ્રત્યે લોકોને જાગૃત કરવા વર્લ્ડ હાયપર ટેન્શન ડે મનાવાય છે.
અમદાવાદ મેડિકલ એસોસિયેશનના પ્રમુખ ડો. તુષાર પટેલે જણાવ્યું હતું કે, સ્ટ્રેસના કારણે હાયપર ટેન્શનના કેસ ચોક્કસ વધ્યા છે, ભોજનમાં મીઠાંનો વધુ પડતો ઉપયોગ પણ તેના માટે જવાબદાર છે. જંકફૂડ કે પ્રોસેસ્ડ ફૂડ ખાવાથી સ્વાસ્થ્ય પર અસર પડી શકે છે, મીઠાંની માત્રા વધુ હોય તો બ્લડ પ્રેશર પર અસર થતી હોય છે. બ્લડ પ્રેશર વધુ અથવા ઓછું થઈ શકે છે. તબીબોનું કહેવું છે કે, વિવિધ બીમારીના કારણસર પણ બ્લડ પ્રેશર ઉપર નીચે થઈ શકે છે, આ માટે નિયમિત તપાસ કરાવવી જોઈએ.
