- મહારાષ્ટ્રના અનેક જિલ્લામાં વરસાદે ધડબડાટી બોલાવી
- મુંબઈ સહિતના અનેક જિલ્લાઓમાં ભારે વરસાદ
- ભારે વરસાદને લઇ લોકોએ સાવચેત રહેવા સૂચના
મહારાષ્ટ્રમાં વરસાદે ધડબડાટી બોલાવી છે. ભારતીય હવામાન વિભાગ મુજબ, 16 જુલાઇએ એટલે કે મંગળવારે રાયગઢ માટે રેડ એલર્ટ જાહેર કર્યું છે. તે જ સમયે, મુંબઈ, થાણે, પાલઘર, રત્નાગીરી, સિંધુદુર્ગ, પુણે, સતાર અને કોલ્હાપુર માટે ઓરેન્જ એલર્ટ જાહેર કરવામાં આવ્યું છે. આનો અર્થ એ થયો કે મંગળવારે મુંબઈ સહિતના અનેક જિલ્લાઓમાં ભારે વરસાદ થવાનો આગાહી કરવામાં આવી છે. લોકોએ આ બાબતે સાવચેત રહેવા સૂચનાઓ પણ આપવામાં આવી છે.
વરસાદને લઈને હવામાન વિભાગનું એલર્ટ
મહારાષ્ટ્રમાં ભારે વરસાદ બાદ નદીઓના જળસ્તરમાં વધારો થયો છે. રત્નાગીરી, રાયગઢમાં વહીવટીતંત્ર એલર્ટ મોડ પર છે અને ઘણા લોકોને બહાર કાઢવાની પ્રક્રિયા ચાલી રહી છે. રત્નાગીરી જિલ્લાના સંગમેશ્વર તાલુકામાં, કોંડના ફણસવાને વિસ્તારો, આંબેડ-ડીંગાણી-કરજુવે, ધામણી, કસ્બા, જિલ્લા પરિષદના રસ્તાઓ પર પાણી ભરાઈ ગયા છે, તેથી આ વિસ્તારો વચ્ચે વાહનવ્યવહાર બંધ કરવામાં આવ્યો છે. દરેકને એલર્ટ કરી દેવામાં આવ્યા છે.
વરસાદ 1,000 મીમીને પાર
જૂનમાં ચોમાસાની ધીમી શરૂઆત પછી, જુલાઈમાં વરસાદે જોર પકડ્યું અને મુંબઈના શહેર અને ઉપનગરોમાં 1,000 મીમીથી વધુ વરસાદ નોંધાયો છે. હવામાન વિભાગ પાસેથી મળેલી માહિતી મુજબ ઉપનગરમાં 1,066 મીમી અને શહેરમાં 1,071 મીમી વરસાદ નોંધાયો છે.
તળાવોની જળ સપાટીમાં 25%નો વધારો નોંધાયો
મુંબઈને પાણી પૂરું પાડતા 7 તળાવોમાં પાણીનો જથ્થો 3,61,826 MLD એટલે કે તળાવોની કુલ ક્ષમતાના 25 ટકા સુધી પહોંચી ગયો છે. જો કે, છેલ્લા 3 વર્ષની સરખામણીએ હજુ પણ તળાવોમાં પાણીનો જથ્થો ઓછો છે. બીએમસીના એક અધિકારીએ જણાવ્યું કે હવામાન વિભાગે આગામી કેટલાક દિવસો માટે ભારે વરસાદની ચેતવણી આપી છે, એવી અપેક્ષા છે કે સરોવરોમાં પાણીનો જથ્થો વધુ સુધરશે. તુલસી તળાવમાં સૌથી વધુ 66 ટકા અને વિહાર તળાવમાં 46 ટકા પાણી એકઠું થયું છે. ભાતસામાં 25 ટકા, મધ્ય વૈતરણામાં 24 ટકા, તાનસામાં 50 ટકા અને મોડક સાગરમાં 37 ટકા પાણીનો સંગ્રહ થયો છે. બીએમસીના ડેટા અનુસાર, આ તળાવ વિસ્તારમાં 584 મીમી વરસાદ પડયો હોવા છતાં, અપર વૈતરણામાં પાણીના સ્ટોકની ટકાવારી હજુ પણ શૂન્ય બતાવવામાં આવી છે.
