દાહોદમાંથી એક અત્યંત હૃદયદ્રાવક અને મોટી દુર્ઘટનાના સમાચાર સામે આવ્યા છે. લીમખેડામાં આવેલી વિજય હોટલ પાસે એક બેફામ ગતિએ આવી રહેલા અજાણ્યા વાહને બાઈક સવારોને જોરદાર ટક્કર મારી હતી. આ અકસ્માત એટલો ભયાનક અને પ્રચંડ હતો કે બાઈક પર સવાર ત્રણેય વ્યક્તિઓ રોડ પર ફંગોળાઈ ગયા હતા. અકસ્માત સર્જ્યા બાદ માનવતા ભૂલીને અજાણ્યો વાહન ચાલક પોતાનું વાહન લઈને ઘટનાસ્થળેથી પૂરપાટ ઝડપે ફરાર થઈ ગયો હતો. આ હિટ એન્ડ રનની ઘટનાને પગલે હાઈવે પર પસાર થતા અન્ય વાહન ચાલકોમાં ભારે અરેરાટી વ્યાપી ગઈ હતી.
ત્રણ વ્યક્તિઓના ઘટનાસ્થળે જ નીપજ્યા કરુણ મોત
આ ગમખ્વાર અકસ્માતમાં બાઈક પર સવાર ત્રણેય કમનસીબ વ્યક્તિઓને શરીરના ભાગે ગંભીર અને જીવલેણ ઈજાઓ પહોંચી હતી. ઈજાઓ એટલી ગંભીર હતી કે ત્રણેય વ્યક્તિઓએ ઘટનાસ્થળે જ દમ તોડી દીધો હતો અને તેમના કરુણ મોત નીપજ્યા હતા. એકસાથે ત્રણ-ત્રણ આશાસ્પદ યુવકોના કાળમુખા અકસ્માતમાં મોત થતાં સ્થાનિક પંથકમાં અને તેમના પરિવારોમાં ભારે આક્રોશ સાથે ઘેરો શોક છવાઈ ગયો છે. અકસ્માતને પગલે આસપાસના લોકો તાત્કાલિક મદદ માટે દોડી આવ્યા હતા અને સ્થાનિક પોલીસને આ અંગેની જાણ કરી હતી.
પોલીસે મૃતદેહોને પીએમ અર્થે ખસેડી તપાસ તેજ કરી
ઘટનાની ગંભીરતાને જોતાં લીમખેડા પોલીસનો કાફલો તાત્કાલિક ઘટનાસ્થળે દોડી આવ્યો હતો. પોલીસે કાયદેસરની કાર્યવાહી હાથ ધરીને ત્રણેય મૃતકોના શબને કબજે કર્યા હતા અને તેમને PM અર્થે નજીકની સરકારી હોસ્પિટલમાં ખસેડવાની તજવીજ હાથ ધરી હતી. પોલીસે અકસ્માત સ્થળની તપાસ કરીને અજાણ્યા ફરાર વાહન ચાલક વિરુદ્ધ ગુનો નોંધી તેને ઝડપી પાડવાના ચક્રો ગતિમાન કર્યા છે. હાઈવે પર આવેલી હોટલ અને આસપાસના CCTV ફૂટેજ તેમજ સાક્ષીઓની મદદથી ફરાર વાહનની ઓળખ મેળવવા પોલીસ દ્વારા સઘન તપાસ શરૂ કરવામાં આવી છે.