અમરેલી જિલ્લાના બાબરા તાલુકામાં આવેલા મોટા દેવળીયા ગામે એક અત્યંત કરુણ અને ચોંકાવનારી ઘટના સામે આવી છે. ગામમાં રહેતો ભરત મેરામભાઈ નામનો આશરે 10 વર્ષનો સગીર બાળક સ્થાનિક તળાવના પાણીમાં ડૂબી ગયો હતો. બાળક તળાવ કિનારે પોતાના ઘેટા-બકરા ચરાવી રહ્યો હતો, તે દરમિયાન અકસ્માતે પગ લપસી જતાં અથવા ઊંડા પાણીમાં ઉતરી જતાં તે તળાવમાં ખાબક્યો હતો. બાળક પાણીમાં ગરકાવ થઈ જતાં આસપાસના વિસ્તારમાં અરેરાટી વ્યાપી ગઈ હતી.
ઘટનાના પગલે સ્થાનિક લોકોના ટોળાં ઉમટ્યા
બાળક તળાવમાં ડૂબ્યો હોવાની જાણ થતાં જ વાયુવેગે સમાચાર સમગ્ર ગામમાં પ્રસરી ગયા હતા. જેને પગલે મોટી સંખ્યામાં ગ્રામજનો અને સ્થાનિક લોકો તળાવ કિનારે દોડી આવ્યા હતા. ઘટના અંગે તાત્કાલિક જાણ કરવામાં આવતાં બાબરા પોલીસ કાફલો તેમજ અમરેલી ફાયર બ્રિગેડની ટીમ તાબડતોબ ઘટનાસ્થળે પહોંચી ગઈ હતી. ફાયર ફાઇટરો દ્વારા બોટ અને ખાસ રેસ્ક્યૂ સાધનોની મદદથી તળાવના ઊંડા પાણીમાં બાળકની શોધખોળ હાથ ધરવામાં આવી હતી.